Shiva Purana · Chapter 4.37

// ṛṣaya ūcuḥ //
sūtasūta mahābhāga jñānavānasi suvrata //
punareva śivasya vai caritaṃ brūhi vistarāt

purātanāśca rājāna ṛṣayo devatāstathā//
ārādhanañca tasyaiva cakurdevavarasya hi

sūta uvāca//
sādhu pṛṣṭamṛṣiśreṣṭhāḥ śrūyatāṃ kathayāmi vaḥ // /
caritraṃ śāṃkaraṃ ramyaṃ śṛṇvatāṃ bhuktimuktidam

etadeva purā pṛṣṭo nāradena pitāmahaḥ //
pratyuvāca prasannātmā nāradaṃ munisattamam /

brahmovāca //
śṛṇu nārada suprītyā śāṃkaraṃ caritaṃ varam//
pravakṣyāmi bhavatsnehānmahāpātakanāśanam

ramayā sahito viṣṇuśśivapūjāṃ cakāra ha //
kṛpayā parameśasya sarvānkāmānavāpa hi

ahaṃ pitāmahaścāpi śivapūjanakārakaḥ //
tasyaiva kṛpayā tāta viśvasṛṣṭikarassadā

śivapūjākarā nityaṃ matputrāḥ paramarṣayaḥ //
anye ca ṛṣayo ye te śivapūjanakārakāḥ

//
nārada tvaṃ viśeṣeṇa śivapūjanakārakaḥ //
saptarṣayo vasiṣṭhādyāḥ śivapūjanakārakāḥ

aruṃdhatī madāsādhvī lopāmudrā tathaiva ca //
ahalyā gautamastrī ca śivapūjanakārikāḥ

durvāsāḥ kauśikaśśaktirdadhīco gautamastathā //
kaṇādo bhārgavo jīvo vaiśaṃpāyana eva ca

ete ca munayassarve śivapūjākarā matāḥ//
tathā parāśaro vyāsaśśivapūjāratassadā

upamanyurmahābhaktaśśivasya paramātmanaḥ //
yājñavalkyo mahāśaivo jaiminirgarga eva ca

śukaśca śaunakādyāśca śaṅkarasya prapūjakāḥ //
anye'pi bahavassanti munayo munisattamāḥ

aditirdevamātā ca nityaṃ prītyā cakāra ha //
pārthivīṃ śaivapūjāṃ vai savadhūḥ prematatparā

śakrādayo lokapālā vasavaśca surāstathā //
mahārājikadevāśca sādhyāśca śivapūjakāḥ

gandharvā kinnarādyāścopasurāśśivapūjakāḥ //
tathā'surā mahātmānaśśivapūjākarā matāḥ

hiraṇyakaśipurdetyassānujatsasuto mune//
śivapūjākaro nityaṃ virocanabalī tathā

mahāśaiva smṛto bāṇo hiraṇyākṣasutāstathā//
vṛṣaparvā danustāta dānavāḥ śivapūjakāḥ

śeṣaśca vāsukiścaiva takṣakaśca tathā pare //
śivabhaktā mahānāgā garuḍādyāśca pakṣiṇaḥ

sūryacandrāvubhau devau pṛthvyāṃ vaṃśapravarttakau//
śivasevāratau nityaṃ savaṃśyau tau munīśvara

manavaśca tathā cakrussvāyaṃbhuvapurassarāḥ //
śivapūjāṃ viśeṣeṇa śivaveṣadharā mune

priyavrataśca tatputrāstathā cottānapātsutaḥ //
tadvaṃśāścaiva rājānaśśivapūjanakārakāḥ

dhruvaśca ṛṣabhaścaiva bharato nava yoginaḥ //
tadbhrātaraḥ pare cāpi śivapūjanakārakāḥ

vaivasvatasutāstārkṣya ikṣvākupramukhā nṛpāḥ//
śivapūjāratātmānaḥ sarvadā sukhabhoginaḥ

kakutsthaścāpi māṃdhātā sagaraśśaivasattamaḥ//
mucukundo hariścandraḥ kalmāṣāṃghristathaiva ca

bhagīrathādayo bhūpā bahavo nṛpasattamāḥ//
śivapūjākarā jñeyāḥ śivaveṣavidhāyinaḥ

khaṭvāṃgaśca mahārājo devasāhāyyakārakaḥ //
vidhitaḥ pārthivīmmūrtiṃ śivasyāpūjayatsadā

tatputro hi dilīpaśca śivapūjanakṛtsadā //
raghustattanayaḥ śaivaḥ suprītyāḥ śivapūjakaḥ

ajaśśivārcakastasya tanayo dharmayuddhakṛt //
jāto daśaratho bhūyo mahārājo viśeṣataḥ

putrārthe pārthivī mūrtti śaivī daśaratho hi saḥ //
samānarca viśeṣeṇa vasi ṣṭhasyājñayā muneḥ

putreṣṭiṃ ca cakārāsau pārthivo bhavabhaktimān//
ṛṣyaśṛṅgamunerājñāṃ saṃprāpya nṛpasattamaḥ

kausalyā tatpriyā mūrtti pārthivīṃ śāṃkarīṃ mudā //
ṛṣyaśṛṃgasamādiṣṭā samānarca sutāptaye

sumitrā ca śivaṃ prītyā kaikeyī nṛpavallabhā//
pūjayāmāsa satputraprāptaye munisattama

śivaprasādatastā vai putrānprāpuśśubhaṃkarān //
mahāpratāpino vīrānsanmārganiratānmune

tataḥ śivājñayā tasmāttāsu rājñassvayaṃ hariḥ //
caturbhiścaiva rūpaiścāvirbabhūva nṛpātmajaḥ

kausalyāyāḥ suto rāma sumitrāyāśca lakṣmaṇa //
śatrughnaścaiva kaikeyyā bharataśceti suvratāḥ

rāmassasahajo nityaṃ pārthivaṃ samapūjayat //
bhasma rudrākṣadhārī ca virajāgamamāsthitaḥ

tadvaṃśe ye samutpannā rājānaḥ sānugā mune //
te sarve pārthivaṃ liṃgaṃ śivasya samapūjayan

sudyumnaśca mahārājaśśaivo munisuto mune //
śivaśāpātpriyāhetorabhūnnārī sasevakaḥ

pārthiveśasamarcātaḥ punasso'bhūtpumānvaraḥ //
māsaṃ strī puruṣo māsamevaṃ strītvaṃ nyavarttata

tato rājyaṃ parityajya śivadharmaparāyaṇaḥ //
śivaveṣadharo bhaktyā durlabhaṃ mokṣamāptavān

purūravāśca tatputro mahārājastu pūjaka //
śivasya devadevasya tatsutaḥ śivapūjakaḥ

bharatastu mahāpūjāṃ śivasyaiva sadākarot //
nahuṣaśca mahā śaivaḥ śivapūjārato hyabhūt

yayātiḥ śivapūjātaḥ sarvānkāmānavāptavān //
ajījanatsutānpaṃca śivadharmaparāyaṇān

tatsutā yadumukhyāśca paṃcāpi śivapūjakāḥ //
śivapūjāprabhāveṇa sarvānkāmāṃśca lebhire

anye'pi ye mahābhāgāḥ samānarcuśśivaṃ hi te //
tadvaṃśyā anyavaṃśyāśca bhuktimuktipradaṃ mune

kṛṣṇena ca kṛtaṃ nityaṃ badarīparvatottame //
pūjanaṃ tu śivasyaiva saptamāsāvadhi svayam

prasannādbhagavāṃstasmādvarāndivyānane kaśaḥ//
samprāpya ca jagatsarvaṃ vaśe'nayata śaṅkarāt

pradyumnaḥ tatsutastāta śivapūjākarassadā //
anye ca kārṣṇipravarāssāmbādyāśśivapūjakāḥ // 4.37.५०
jarāsaṃdho mahāśaivastadvaṃśyāśca nṛpāstathā //
nimiśśaivaśca janakastatputrāśśivapūjakāḥ

nalena ca kṛtā pūjā vīrasenasutena vai //
pūrvajanmani yo bhillo vane pānthasurakṣakaḥ

yatiśca rakṣitastena purā harasamīpataḥ //
svayaṃvyāghrādibhī rātrau bhakṣitaśca mṛto vṛṣāt

tena puṇyaprabhāveṇa sa bhillo hi nalo'bhavat //
cakravartī mahārājo damayantī priyo'bhavat

iti te kathitaṃ tāta yatpṛṣṭaṃ bhavatānagha //
śāṅkaraṃ caritaṃ divyaṃ kimanyatpraṣṭumicchasi

iti śrīśivamahāpurāṇe caturthyāṃ koṭirudrasahitāyāṃ devarṣinṛpaśaivatvavarṇanaṃ nāma saptatriṃśo'dhyāyaḥ