Shiva Purana · Chapter 4.36

// sūta uvāca //
śrutvā viṣṇukṛtaṃ divyaṃ paranāmavibhūṣitam //
sahasranāmasvastotraṃ prasanno'bhūnmaheśvaraḥ

parīkṣārthaṃ harerīśaḥ kamaleṣu maheśvaraḥ //
gopayāmāsa kamalaṃ tadaikaṃ bhuvaneśvaraḥ

paṃkajeṣu tadā teṣu sahasreṣu babhūva ca //
nyūnamekaṃ tadā viṣṇurvihvalaśśivapūjane

hṛdā vicāritaṃ tena kuto vai kamalaṃ gatam //
yātaṃ yātu sukhenaiva mannetraṃ kamalaṃ na kim

jñātveti netramuddhṛtya sarvasattvāvalambanāt //
pūjayāmāsa bhāvena stavayāmāsa tena ca

tataḥ stutamatho dṛṣṭvā tathābhūtaṃ haro harim //
mā meti vyāharanneva prādurāsījjagadguruḥ

tasmādavatatārāśu maṇḍalātpārthivasya ca //
pratiṣṭhitasya hariṇā svaliṃgasya maheśvaraḥ

yathoktarūpiṇaṃ śambhuṃ tejorāśisamutthitam //
namaskṛtya puraḥ sthitvā sa tuṣṭāva viśeṣataḥ

tadā prāha mahādevaḥ prasannaḥ prahasanniva //
samprekṣya kṛpayā viṣṇuṃ kṛtāṃjalipuṭaṃ sthitam

śaṅkara uvāca//
jñātaṃ mayedaṃ sakalaṃ tava cittepsitaṃ hare //
devakāryaṃ viśeṣeṇa devakāryyaratātmanaḥ

devakāryyasya siddhyarthaṃ daityanāśāya cāśramam //
sudarśanākhyaṃ cakraṃ ca dadāmi tava śobhanam

yadrūpaṃ bhavatā dṛṣṭaṃ sarvalokasukhāvaham //
hitāya tava deveśa dhṛtaṃ bhāvaya taddhruvam

raṇājire smṛtaṃ tadvai devānāṃ duḥkhanāśanam //
idaṃ cakramidaṃ rūpamidaṃ nāmasahasrakam

ye śṛṇvanti sadā bhaktyā siddhi syādanapāyinī //
kāmānāṃ sakalānāṃ ca prasādānmama suvrata

sūta uvāca //
evamuktvā dadau cakraṃ sūryāyutasamaprabham //
sudarśanaṃ svapādotthaṃ sarvaśatruvināśanam

viṣṇuścāpi susaṃskṛtya jagrāhodaṅmukhastadā//
namaskṛtya mahādevaṃ viṣṇurvacanamabravīt

viṣṇuruvāca //
śṛṇu deva mayā dhyeyaṃ paṭhanīyaṃ ca kiṃ prabho //
duḥkhānāṃ nāśanārthaṃ hi vada tvaṃ lokaśaṃkara

sūta uvāca //
iti pṛṣṭastadā tena santuṣṭastu śivo'bravīt //
prasannamānaso bhūtvā viṣṇuṃ devasahāyakam

// śiva uvāca //
rūpaṃ dhyeyaṃ hare me hi sarvānarthapraśāntaye //
anekaduḥkhanāśārthaṃ paṭha nāmasahasrakam

dhāryyaṃ cakraṃ sadā me hi savārbhīṣṭasya siddhaye //
tvayā viṣṇo prayatnena sarvacakravaraṃ tvidam

anye ca ye paṭhiṣyanti pāṭhayiṣyanti nityaśaḥ //
teṣāṃ duḥkhaṃ na svapne'pi jāyate nātra saṃśayaḥ

rājñā ca saṃkaṭe prāpte śatāvṛttiṃ caredyadā //
sāṅgaḥ ca vidhisaṃyuktaṃ kalyāṇaṃ labhate naraḥ

roganāśakaraṃ hyetadvidyāvittadamuttamam //
sarvakāmapradaṃ puṇyaṃ śivabhaktipradaṃ sadā

yaduddiśya phalaṃ śreṣṭhaṃ paṭhiṣyanti narāstviha //
sapsyante nātra saṃdehaḥ phalaṃ tatsatyamuttamam

yaśca prātassamutthāya pūjāṃ kṛtvā madīyikām //
paṭhate matsamakṣaṃ vai nityaṃ siddhirna dūrataḥ

aihikīṃ siddhimāpnoti nikhilāṃ sarvakāmikām //
ante sāyujyamuktiṃ vai prāpnotyatra na saṃśayaḥ

sūta uvāca //
evamuktvā tadā viṣṇuṃ śaṃkaraḥ prītamānasaḥ //
upaspṛśya karābhyāṃ tamuvāca giriśaḥ punaḥ

// śiva uvāca //
varado'smi suraśreṣṭha varānvṛṇu yathepsitān //
bhaktyā vaśīkṛto nūnaṃ stavenānena suvrataḥ

// sūta uvāca //
ityukto devadevena devadevaṃ praṇamya tam //
suprasannataro viṣṇussāṃjalirvākyamabravīt

viṣṇuruvāca //
yathedānīṃ kṛpānātha kriyate cānyataḥ parā //
kāryyā caiva viśeṣeṇa kṛpālutvāttvayā prabho

tvayi bhaktirmahādeva prasīda varamuttamam //
nānyamicchāmi bhaktānāmārttayo naiva yatprabho

sūta uvāca //
tacchrutvā vacanaṃ tasya dayā vānsutarāṃ bhavaḥ //
pasparśa ca tadaṃgaṃ vai prāha śītāṃśuśekharaḥ

śiva uvāca //
mayi bhaktissadā te tu hare syādanapāyinī //
sadā vandyaśca pūjyaśca loke bhava surairapi

viṣvaṃbhareti te nāma sarvapāpaharaṃ param //
bhaviṣyati na saṃdeho matprasādātsurottama

// sūta uvāca //
ityuktvāṃtardadhe rudrassarvadeveśvaraḥ prabhuḥ //
paśyatastasya viṣṇostu tatraiva ca munīśvarāḥ

janārdano'pi bhagavānvacanācchaṅkarasya ca //
prāpya cakraṃ śubhaṃ tadvai jaharṣāti svacetasi

kṛtvā dhyānaṃ ca tacchambhoḥ stotrametannirantaram //
papāṭhādhyāpayāmāsa bhaktebhyastadupādiśat

iti pṛṣṭaṃ mayākhyātaṃ śṛṇvatāmpāpahārakam//
ataḥparaṃ ca kiṃ śreṣṭhāḥ praṣṭumicchatha vai punaḥ

iti śrīśivamahāpurāṇe caturthyāṃ koṭirudrasaṃhitāyāṃ śivasahasranāmastotraphalavarṇanaṃ nāma ṣaṭtriṃśodhyāyaḥ