Shiva Purana · Chapter 4.28

sūta uvāca //
rāvaṇaḥ rākṣasaśreṣṭho mānī mānaparāyaṇaḥ //
ārarādha haraṃ bhaktyā kailāse parvatottame

ārādhitaḥ kiyatkālaṃ na prasanno haro yadā//
tadā cānyattapaścakre prāsādārthe śivasya saḥ

nataścāyaṃ himavatassiddhisthānasya vai gireḥ//
paulastyo rāvaṇaśśrīmāndakṣiṇe vṛkṣakhaṃḍake//३/
bhūmau gartaṃ vara kṛtvā tatrāgniṃ sthāpya sa dvijāḥ//
tatsannidhau śivaṃ sthāpya havanaṃ sa cakāra ha

grīṣme paṃcāgnimadhyastho varṣāsu sthaṃḍileśayaḥ //
śīte jalāṃtarastho hi tridhā cakre tapaśca saḥ

cakāraivaṃ bahutapo na prasannastadāpi hi //
paramātmā maheśāno durārādhyo durātmabhiḥ

tataśśirāṃsi chittvā ca pūjanaṃ śaṃkarasya vai //
prārabdhaṃ daityapatinā rāvaṇena mahātmanā

ekaikaṃ ca śiraśchinnaṃ vidhinā śivapūjane //
evaṃ satkramatastena cchinnāni nava vai yadā

ekasminnavaśiṣṭe tu prasannaśśaṃkarastadā //
āvirbabhūva tatraiva saṃtuṣṭo bhaktavatsalaḥ

śirāṃsi pūrvavatkṛtvā nīrujāni tathā prabhuḥ //
manorathaṃ dadau tasmādatulaṃ balamuttamam

prasādaṃ tasya saṃprāpya rāvaṇassa ca rākṣasaḥ //
pratyuvāca śivaṃ śambhuṃ nataskaṃdhaḥ kṛtāṃjaliḥ

rāvaṇa uvāca //
prasanno bhava deveśa laṃkāṃ ca tvāṃ nayāmyaham //
saphalaṃ kuru me kāmaṃ tvāmahaṃ śaraṇaṃ gataḥ

sūta uvāca //
ityuktaśca tadā tena śaṃbhurvai rāvaṇena saḥ //
pratyuvāca vicetaskaḥ saṃkaṭaṃ paramaṃ gataḥ

// śiva uvāca //
śrūyatāṃ rākṣasaśreṣṭha vaco me sāravattayā //
nīyatāṃ svagṛhe me hi sadbhaktyā liṃgamuttamam

bhūmau liṃgaṃ yadā tvaṃ ca sthāpayiṣyasi tatra vai //
sthāsyatyatra na saṃdeho yathecchasi tathā kuru

sūta uvāca //
ityuktaśśaṃbhunā tena rāvaṇo rākṣaseśvaraḥ/
tatheti tatsamādāya jagāma bhavanaṃ nijam

āsīnmūtrotsargakāmo mārge hi śivamāyayā//
tatstaṃbhituṃ na śaktobhūtpaulastyo rāvaṇaḥ prabhuḥ

dṛṣṭvaikaṃ tatra vai gopaṃ prārthya liṃgaṃ dadau ca tat//
muhūrtake hyatikrāṃte gopobhūdvikalastadā

bhūmau saṃsthāpayāmāsa tadbhāreṇātipīḍitaḥ //
tatraiva tatsthitaṃ liṃgaṃ vajasārasamudbhavam //
sarvakāmapradaṃ caiva darśanātpāpahārakam

vaidyanātheśvaraṃ nāmnā talliṃgamabhavanmune //
prasiddhaṃ triṣu lokeṣu bhuktimuktipradaṃ satām

jyotirliṃgamidaṃ śreṣṭhaṃ darśanātpūjanādapi //
sarvapāpaharaṃ divyaṃ bhuktivarddhanamuttamam

tasmim̐liṃge sthite tatra sarvalokahitāya vai //
rāvaṇaḥ svagṛhaṃ gatvā varaṃ prāpya mahottamam //
priyāyai sarvamācakhyau sukhenāti mahāsuraḥ

tacchrutvā sakalā devāśśakrādyā munayastathā //
parasparaṃ samāmantrya śivāsaktadhiyo'malāḥ

tasminkāle surāssarve haribrahmādayo mune //
ājagmustatra suprītyā pūjāṃ cakrurviśeṣataḥ

pratyakṣaṃ taṃ tadā dṛṣṭvā pratiṣṭhāpya ca te surāḥ //
vaidyanātheti saṃprocya natvā nutvā divaṃ yayuḥ

ṛṣaya ūcuḥ //
tasmim̐lliṃge sthite tatra rāvaṇe ca gṛhaṃ gate //
kiṃ ki caritramabhūttāta tatastadvada vistarāt

sūta uvāca //
rāvaṇopi gṛhaṃ gatvā varaṃ prāpya mahottamam//
priyāyai sarvamācakhyau mumodāti mahāsuraḥ

tacchrutvā sakalaṃ devāśśakrādyā munayastathā //
parasparaṃ sumūcuste samudvignā munīśvarāḥ

devādaya ūcuḥ //
rāvaṇoyaṃ durātmā hi devadrohī khalaḥ kudhīḥ //
śivādvaraṃ ca saṃprāpya duḥkhaṃ dāsyati no'pi saḥ

kiṃ kurmaḥ kva ca gacchāmaḥ kiṃ bhaviṣyati vā punaḥ //
duṣṭaśca dakṣatāṃ prāptaḥ kiṃkiṃ no sādhayiṣyati

iti duḥkhaṃ samāpannāśśakrādyā munayassurāḥ//
nāradaṃ ca samāhūya papracchurvikalāstadā

devā ūcuḥ //
sarvaṃ kāryyaṃ samarthosi kartuṃ tvaṃ munisattama //
upāyaṃ kuru devarṣe devānāṃ duḥkhanāśane

rāvaṇoyaṃ mahāduṣṭaḥ kiṃki naiva kariṣyati //
kva yāsyāmo vayaṃ cātra duṣṭenāpīḍitā vayam

nārada uvāca //
duḥkhaṃ tyajata bho devā yuktiṃ kṛtvā ca yāmyaham //
devakāryaṃ kariṣyāmi kṛpayā śaṃkarasya vai

sūta uvāca//
ityuktvā sa tu devarṣiragamadrāvaṇālayam //
satkāraṃ samanuprāpya prītyovācākhilaṃ ca tat

nārada uvāca //
rākṣasottama dhanyastvaṃ śaivavaryyastapomanāḥ //
tvāṃ dṛṣṭvā ca mano medya prasannamati rāvaṇa

svavṛttaṃ brūhyaśeṣeṇa śivārādhanasaṃbhavam//
iti pṛṣṭastadā tena rāvaṇo vākyamabravīt

rāvaṇa uvāca //
gatvā mayā tu kailāse taporthaṃ ca mahāmune //
tatraiva bahukālaṃ vai tapastaptaṃ sudāruṇam

yadā na śaṃkarastuṣṭastataśca parivartitam //
āgatya vṛkṣakhaṃḍe vai punastaptaṃ mayā mune

grīṣme paṃcāgnimadhye tu varṣāsu sthaṃḍileśayaḥ //
śīte jalāṃtarastho hi kṛtaṃ caiva tridhā tapaḥ

evaṃ mayā kṛtaṃ tatra tapotyugraṃ munīśvara //
tathāpi śaṃkaro mahyaṃ na prasanno'bhavanmanāk

tadā mayā tu kruddhena bhūmau gartaṃ vidhāya ca //
tatrāgniṃ samādhāya pārthivaṃ ca prakalpya ca

gaṃdhaiśca caṃdanaiścaiva dhūpaiśca vividhaistadā //
naivedyaiḥ pūjitaśśambhurārārtikavidhānataḥ

praṇipātaiḥ stavaiḥ puṇyaistoṣitaśśaṃkaro mayā//
gītairnṛtyaiśca vādyaiśca mukhāṃgulisamarpaṇaiḥ

etaiśca vividhaiścānyairupāyairbhūribhirmune //
śāstroktena vidhānena pūjito bhagavān haraḥ

na tuṣṭaḥ sanmukho jāto yadā ca bhagavānharaḥ //
tadāhaṃ duḥkhitobhūvaṃ tapaso'prāpya satphalam

dhik śarīraṃ balaṃ caiva dhik tapaḥ karaṇaṃ mama //
ityuktvā tu mayā tatra sthāpitegnau hutaṃ bahu

punaśceti vicāryaiva tvakṣāmyagnau nijāṃ tanum //
saṃchinnāni śirāṃsyeva tasmin prajvalite śucau

succhitvaikaikaśastāni kṛtvā śuddhāni sarvaśaḥ //
śaṃkarāyārpitānyeva navasaṃkhyāni vai mayā

yāvacca daśamaṃ chettuṃ prārabdhamṛṣisattama //
tāvadāvirabhūttatra jyotīrūpo harassvayam

māmeti vyāharat prītyā drutaṃ vai bhaktavatsalaḥ //
prasannaśca varaṃ brūhi dadāmi manasepsitam

ityukte ca tadā tena mayā dṛṣṭo maheśvaraḥ //
prāṇatassaṃstutaścaiva karau baddhvā subhaktitaḥ

tadā vṛtaṃ mayaitacca dehi me hyatulaṃ balam //
yadi prasanno deveśa durllabhaṃ kiṃ bhavenmama

śivena parituṣṭena sarvaṃ dattaṃ kṛpālunā //
mahyaṃ manobhilaṣitaṃ girā procya tathāstviti

amoghayā sudṛṣṭyā vai vaidyavadyojitāni me //
śirāṃsi saṃdhayitvā tu dṛṣṭāni paramātmanā

/
evaṃkṛte tadā tatra śarīraṃ pūrvavanmama //
jātaṃ tasya prasādācca sarvaṃ prāptaṃ phalaṃ mayā

tadā ca prārthito me saṃsthitosau vṛṣabhadhvajaḥ//
vaidyanātheśvaro nāmnā prasiddhobhūjjagattraye

darśanātpūjanājjyotirliṃgarūpo maheśvaraḥ //
bhuktimuktiprado loke sarveṣāṃ hitakārakaḥ

jyotirliṃgamahaṃ tadvai pūjayitvā viśeṣataḥ //
praṇipatyāgataścātra vijetuṃ bhuvanatrayam

sūta uvāca //
tadīyaṃ tadvacaḥ śrutvā devarṣirjātasaṃbhramaḥ //
vihasya ca manasyeva rāvaṇaṃ nārado'bravīt

nārada uvāca //
śrūyatāṃ rākṣasaśreṣṭha kathayāmi hitaṃ tava //
tvayā tadeva karttavyaṃ maduktaṃ nānyathā kvacit

tvayoktaṃ yacchivenaiva hitaṃ dattaṃ mamādhunā //
tatsarvaṃ ca tvayā satyaṃ na mantavyaṃ kadācana

ayaṃ vai vikṛtiṃ prāptaḥ kiṃ kiṃ naiva bravīti ca //
satyaṃ naiva bhavettadvai kathaṃ jñeyaṃ priyosti me

iti gatvā punaḥ kāryyaṃ kuru tvaṃ hyahitāya vai//
kailāsoddharaṇe yatnaḥ kartavyaśca tvayā punaḥ

yadi caivoddhṛtaścāyaṃ kailāso hi bhaviṣyati //
tadaiva saphalaṃ sarvaṃ bhaviṣyati na saṃśayaḥ

pūrvavatsthāpayitvā tvaṃ punarāgaccha vai sukham //
niścayaṃ paramaṃ gatvā yathecchasi tathā kuru

sūta uvāca //
ityuktassa hitaṃ mene rāvaṇo vidhimohita//
satyaṃ matvā munervākyaṃ kailāsamagamattadā

gatvā tatra samuddhāraṃ cakre tasya giressa ca //
tatrasthaṃ caiva tatsarvaṃ viparyastaṃ parasparam

girīśopi tadā dṛṣṭvā kiṃ jātamiti sobravīt//
girijā ca tadā śaṃbhuṃ pratyuvāca vihasya tam

girijovāca//
sacchiśyasya phalaṃ jātaṃ samyagjātaṃ tu śiṣyataḥ//
śāntātmane suvīrāya dattaṃ yadatulaṃ balam

sūta uvāca //
girijāyāśca sākūtaṃ vacaḥ śrutvā maheśvaraḥ //
kṛtaghnaṃ rāvaṇaṃ matvā śaśāpa baladarpitam

mahādeva uvāca //
re re rāvaṇa durbhakta mā garvaṃ vaha durmate //
śīghraṃ ca tava hastānāṃ darpaghnaśca bhavediha

sūta uvāva //
iti tatra ca yajjātaṃ nāradaḥ śrutavāṃstadā //
rāvaṇopi prasannātmā'gātsvadhāma yathāgatam

niścayaṃ paramaṃ kṛtvā balī balavimohitaḥ //
jagadvaśaṃ hi kṛtavānrāvaṇaḥ paradarpahā

śivājñayā ca prāptena divyāstreṇa mahaujasā//
rāvaṇasya prati bhaṭo nālaṃ kaścidabhūttadā

ityetacca samākhyātaṃ vaidyanātheśvarasya ca //
māhātmyaṃ śṛṇvatāṃ pāpaṃ nṛṇāṃ bhavati bhasmasāt

iti śrīśivamahāpurāṇe caturthyāṃ koṭirudrasaṃhitāyāṃ vaidyanātheśvarajyotirliṃgamāhātmyavarṇanaṃ nāmāṣṭāviṃśo'dhyāyaḥ