Shiva Purana · Chapter 4.24

sūta uvāca //
śrūyatāmṛṣayaḥ śreṣṭhāḥ kathāṃ pāpapraṇāśinīm//
kathayāmi yathā vyāsātsadgurośca śrutā mayā

purā ṛṣivaraścāsīdgautamo nāma viśrutaḥ //
ahalyā nāma tasyāsītpatnī paramadhārmikī

dakṣiṇasyāṃ diśi hi yo girirbrahmeti saṃjñakaḥ //
tatra tena tapastaptaṃ varṣāṇāma yutaṃ tathā

kadācicca hyanāvṛṣṭirabhavattatra suvratāḥ //
varṣāṇāṃ ca śataṃ raudrī lokā duḥkhamupāgatāḥ

ārdraṃ ca pallavaṃ na sma dṛśyate pṛthivītale //
kuto jalaṃ vidṛśyeta jīvānāṃ prāṇadhārakam

tadā te munayaścaiva manuṣyāḥ paśavastathā //
pakṣiṇaśca mṛgāstatra gatāścaiva diśo daśa

tāṃ dṛṣṭvā carṣayo viprāḥ prāṇāyāmaparāyaṇāḥ //
dhyānena ca tadā kecitkālaṃ ninyussudāruṇam

gautamo'pi svayaṃ tatra varuṇārthe tapaśśubham //
cakāra caiva ṣaṇmāsaṃ prāṇāyāmaparāyaṇaḥ

tataśca varuṇastasmai varaṃ dātuṃ samāgatāḥ //
prasanno'smi varaṃ brūhi dadāmi ca vaco'bravīt

tataśca gautamastaṃ vai vṛṣṭiṃ ca prārthayattadā //
tatassa varuṇastaṃ vai pratyuvāca muniṃ dvijāḥ

varuṇa uvāca //
devājñāṃ ca samullaṃghya kathaṃ kuryāmahaṃ ca tām //
anyatprārthaya sujño'si yadahaṃ karavāṇi te

sūta uvāca //
ityetadvacanaṃ tasya varuṇasya mahātmanaḥ //
paropakārī tacchutvā gotamo vākyamabravīta

gautama uvāca //
yadi prasanno deveśa yadi deyo varo mama //
yadahaṃ prārthayāmyadya kartavyaṃ hi tvayā tathā

yatastvaṃ jalarāśīśastasmāddeyaṃ jalaṃ mama //
akṣayaṃ sarvadeveśa divyaṃ nityaphalapradam

sūta uvāca //
iti saṃprārthitastena varuṇo gautamena vai //
uvāca vacanaṃ tasmai gartaśca kriyatāṃ tvayā

ityukte ca kṛtastena gartto hastapramāṇataḥ //
jalena pūritastena divyena varuṇena saḥ

athovāca muniṃ devo varuṇo hi jalādhipaḥ //
gautamaṃ muniśārdūlaṃ paropakṛtiśālinam

varuṇa uvāca //
akṣayyaṃ ca jalaṃ te'stu tīrthabhūtaṃ mahāmune //
tava nāmnā ca vikhyātaṃ kṣitāvetadbhaviṣyati

/
atra dattaṃ hutaṃ taptaṃ surāṇāṃ yajanaṃ kṛtam //
pitṝṇāṃ ca kṛtaṃ śrāddhaṃ sarvamevākṣayaṃ bhavet

sūta uvāca//
ityuktāṃtarddadhe devasstutastena maharṣiṇā//
gautamo'pi sukhaṃ prāpa kṛtvānyopakṛtiṃ muniḥ

maddatto hyāśrayaḥ puṃsāṃ mahattvāyopajāyate //
mahāṃtastatsvarūpaṃ ca paśyaṃti netare'śubhāḥ

yādṛṅnaraṃ ca seveta tādṛśaṃ phalamaśnute//
mahatassevayocca tvaṃ kṣudrasya kṣudratāṃ tathā

siṃhasya maṃdire sevā muktāphalakarī matā //
śṛgālamaṃdire sevā tvasthilābhakarī smṛtā

uttamānāṃ svabhāvoyaṃ paraduḥkhāsahiṣṇutā //
svayaṃ dukhaṃ ca saṃprāptaṃ manyatenyasya vāryate

vṛkṣāśca hāṭakaṃ caiva caṃdanaṃ cekṣukastathā //
ete bhuvi parārthe ca dakṣā evaṃ na kecana

dayāluramadasparśa upakārī jitendriyaḥ //
etaiśca puṇyastambhaistu caturbhirdhāryyate mahī

tataśca gautamastatra jalaṃ prāpya sudurlabham //
nityanaimittikaṃ karma cakāra vidhivattadā

tato vrīhīnyavāṃścaiva nīvārānapyanekadhā//
vāpayāmāsa tatraiva havanārthaṃ munīśvaraḥ

dhānyāni vividhānīha vṛkṣāśca vividhāstathā //
puṣpāṇi ca phalānyeva hyāsaṃstatrāyanekaśaḥ

tacchutvā ṛṣayaścānye tatrāyā tāssahasraśaḥ //
paśavaḥ pakṣiṇaścānye jīvāśca bahavo'gaman

tadvanaṃ sundaraṃ hyāsītpṛthivyāṃ maṃḍale param //
tadakṣayakarāyogādanāvṛṣṭirna duḥkhadā

ṛṣayo'pi vane tatra śubhakarmaparāyaṇāḥ //
vāsaṃ cakruraneke ca śiṣyabhāryyāsutānvitāḥ

dhānyā ni vāpayāmāsuḥ kālakramaṇahetave//
ānaṃdastadvane hyāsītprabhāvādgautamasya ca

iti śrīśivamahāpurāṇe caturthyāṃ koṭirudrasaṃ hitāyāṃ tryaṃbakeśvaramāhātmye gautamaprabhāvavarṇanaṃ nāma caturviśo'dhyāyaḥ