Shiva Purana · Chapter 4.12

ṛṣaya ūcuḥ //
sūta jānāsi sakalaṃ vastu vyāsaprasādataḥ //
tavājñātaṃ na vidyeta tasmātpṛcchāmahe vayam

liṃgaṃ ca pūjyate loke tattvayā kathitaṃ ca yat//
tattathaiva na cānyadvā kāraṇaṃ vidyate tviha

bāṇarūpā śrutā loke pārvatī śivavallabhā//
etatkiṃ kāraṇaṃ sūta kathaya tvaṃ yathāśrutam

sūta uvāca //
kalpabhedakathā caiva śrutā vyāsānmayā dvijāḥ //
tāmeva kathayāmyadya śrūyatāmṛṣisattamāḥ

purā dāruvane jātaṃ yadvṛttaṃ tu dvijanmanām//
tadeva śrūyatāṃ samyak kathayāmi kathāśrutam

dārunāmavanaṃ śreṣṭhaṃ tatrāsannṛṣisattamāḥ//
śivabhaktāssadā nityaṃ śivadhyānaparāyaṇāḥ

trikālaṃ śivapūjāṃ ca kurvaṃti sma nirantaram //
nānāvidhaiḥ stavairdivyaistuṣṭuvuste munīśvarāḥ

te kadācidvane yātāssamidhāharaṇāya ca //
sarve dvijarṣabhāśśaivāśśivadhyānaparāyaṇāḥ

etasminnaṃtare sākṣācchaṃkaro nīla lohitaḥ //
virūpaṃ ca samāsthāya parīkṣārthaṃ samāgataḥ

digambaro'titejasvī bhūtibhūṣaṇabhūṣitaḥ//
sa ceṣṭāmakarodduṣṭāṃ haste liṃgaṃ vidhārayan

manasā ca priyaṃ teṣāṃ kartuṃ vai vanavāsinām //
jagāma tadvanaṃ prītyā bhaktaprīto haraḥ svayam

taṃ dṛṣṭvā ṛṣipatnyastāḥ paraṃ trāsamupāgatāḥ //
vihvalā vismitāścānyāssamājagmustathā punaḥ

aliliṃgustathā cānyāḥ karaṃ dhṛtyā tathāparāḥ //
parasparaṃ tu saṃgharṣātsaṃmagnāstāḥ striyastadā

etasminneva samaye ṛṣivaryāḥ samāgaman//
viruddhaṃ taṃ ca te dṛṣṭvā duḥkhitāḥ krodhamūrcchitāḥ

tadā duḥkhamanuprāptāḥ koyaṃ koyaṃ tathā'buvan //
samastā ṛṣayaste vai śivamāyāvimohitāḥ

yadā ca noktavānkiṃcitsovadhūto digambaraḥ //
ūcustaṃ puruṣaṃ bhīmaṃ tadā te paramarṣayaḥ

tvayā viruddhaṃ kriyate vedamārga vilopi yat //
tatastvadīyaṃ talliṃgaṃ patatāṃ pṛthivītale

sūta uvāca //
ityukte tu tadā taiśca liṃgaṃ ca patitaṃ kṣaṇāt //
avadhūtasya tasyāśu śivasyādbhutarūpiṇaḥ

talliṃgaṃ cāgnivatsarvaṃ yaddadāha purā sthitam //
yatrayatra ca tadyāti tatratatra dahetpunaḥ

pātāle ca gataṃ taśca svarge cāpi tathaiva ca //
bhūmau sarvatra tadyātaṃ na kutrāpi sthiraṃ hi tat

lokāśca vyākulā jātā ṛṣayastetiduḥkhitāḥ //
na śarma lebhire keciddevāśca ṛṣayastathā

na jñātastu śivo yaistu te sarve ca surarṣayaḥ//
duḥkhitā militāśśīghraṃ brahmāṇaṃ śaraṇaṃ yayuḥ

tatra gatvā ca te sarve natvā stutvā vidhiṃ dvijāḥ //
tatsarvamavadanvṛttaṃ brahmaṇe sṛṣṭikāriṇe

brahmā tadvacanaṃ śrutvā śivamāyāvimohitān //
jñātvā tāñcchaṃkaraṃ natvā provāca ṛṣisattamān

// brahmovāca //
jñātāraśca bhavanto vai kurvate garhitaṃ dvijāḥ //
ajñātāro yadā kuryuḥ kiṃ punaḥ kathyate punaḥ

viruddhyaivaṃ śivaṃ devaṃ kuśalaṃ kassamīhate //
madhyāhnasamaye yo vai nātithiṃ ca parāmṛśet

tasyaiva sukṛtaṃ nītvā svīyaṃ ca duṣkṛtaṃ punaḥ//
saṃsthāpya cātithiryāti kiṃ punaḥ śivameva vā

yāvalliṃgaṃ sthiraṃ naiva jagatāṃ tritaye śubham //
jāyate na tadā kvāpi satyametadvadāmyaham

bhavadbhiśca tathā kāryaṃ yathā svāsthyaṃ bhavediha //
śivaliṃgasya ṛṣayo manasā saṃvicāryyatām

sūta uvāca //
ityuktāste praṇamyocurbrahmāṇamṛṣayaśca vai //
kimasmābhirvidhe kāryaṃ tatkāryaṃ tvaṃ samādiśa

ityuktaśca munīśaistaissarvalokapitāmahaḥ //
munīśāṃstāṃstadā brahmā svayaṃ provāca vai tadā

brahmovāca //
ārādhya girijāṃ devīṃ prārthayantu surāśśivam //
yonirūpā bhaveccedvai tadā tatsthiratāṃ vrajet

tadvidhimpravadāmyadya sarve śṛṇuta sattamāḥ //
tāmeva kuruta premṇā prasannā sā bhaviṣyati

kumbhamekaṃ ca saṃsthāpya kṛtvāṣṭadalamuttamam //
dūrvāyavāṃkuraistīrthodakamāpūrayettataḥ

vedamaṃtraistatastaṃ vai kuṃbhaṃ caivābhimaṃtrayet //
śrutyuktavidhinā tasya pūjāṃ kṛtvā śivaṃ smaran

talliṃgaṃ tajjalenābhiṣecayetparamarṣayaḥ //
śatarudriyamaṃtraistu prokṣitaṃ śāṃtimāpnuyāt

girijāṃ yonirūpāṃ ca bāṇaṃ sthāpya śubhaṃ punaḥ //
tatra liṃgaṃ ca tatsthāpyaṃ punaścaivābhimaṃtrayet

sugandhaiścandanaiścaiva puṣpadhūpādibhistathā //
naivedyādikapūjābhistoṣayetparameśvaram

praṇipātaiḥ stavaiḥ puṇyairvādyairgānaistathā punaḥ //
tataḥ svastyayanaṃ kṛtvā jayeti vyāharettathā

prasanno bhava deveśa jagadāhlādakāraka //
kartā pālayitā tvañca saṃhartā tvaṃ nirakṣaraḥ

jagadādirjagadyonirjagadantargatopi ca //
śānto bhava maheśāna sarvāṃllokāṃśca pālaya

evaṃ kṛte vidhau svāsthyaṃ bhaviṣyati na saṃśaya //
vikāro na trilokesminbhaviṣyati sukhaṃ sadā

sūta uvāca //
ityuktāste dvijā devāḥ praṇipatya pitāmaham //
śivaṃ taṃ śaraṇaṃ prāptassarvalokasukhepsayā

pūjitaḥ parayā bhaktyā prārthitaḥ śaṃkarastadā //
suprasannastato bhūtvā tānuvāca maheśvaraḥ

maheśvara uvāca //
he devā ṛṣayaḥ sarve madvacaḥ śṛṇutādarāt //
yonirūpeṇa malliṃgaṃ dhṛtaṃ cetsyāttadā sukham

pārvatīṃ ca vinā nānyā liṃgaṃ dhārayituṃ kṣamā//
tayā dhṛtaṃ ca malliṃgaṃ drutaṃ śāntiṃ gamiṣyati

sūta uvāca//
tacchrutvā ṛṣibhirdevaissuprasannairmunīśvarāḥ //
gṛhītvā caiva brahmāṇaṃ girijā prārthitā tadā

prasannāṃ girijāṃ kṛtvā vṛṣabhadhvajameva ca //
pūrvoktaṃ ca vidhiṃ kṛtvā sthāpitaṃ liṃgamuttamam

maṃtroktena vidhānena devāśca ṛṣayastathā //
cakruḥ prasannāṃ girijāṃ śivaṃ ca dharmahetave

samānarcurviśeṣeṇa sarve devarṣayaḥ śivam //
brahmā viṣṇuḥ pare caiva trailokyaṃ sacarācaram

suprasannaḥ śivo jātaḥ śivā ca jagadambikā//
dhṛtaṃ tayā ca talliṃgaṃ tena rūpeṇa vai tadā

lokānāṃ sthāpite liṃge kalyāṇaṃ cābhavattadā //
prasiddhaṃ caiva talliṃgaṃ trilokyāmabhavaddvijāḥ

hāṭakeśamiti khyātaṃ tacchivāśivamityapi//
pūjanāttasya lokānāṃ sukhaṃ bhavati sarvathā

iha sarvasamṛddhiḥ syānnānāsukhavahādhikā //
paratra paramā muktirnātra kāryā vicāraṇā

iti śrīśivamahāpurāṇe caturthyāṃ koṭirudrasaṃhitāyāṃ liṃgasvarūpakāraṇavarṇanaṃ nāma dvādaśo'dhyāyaḥ