Shiva Purana · Chapter 4.11

ṛṣaya ūcuḥ //
sūtasūta mahābhāga dhanyastvaṃ śivasaktadhīḥ //
mahābalasya liṃgasya śrāviteyaṃ kathādbhutā

uttarasyāṃ diśāyāṃ ca śivaliṃgāni yāni ca //
teṣāṃ māhātmyamanagha vada tvaṃ pāpanāśakam

sūta uvāca//
śṛṇutādarato viprā auttarāṇāṃ viśeṣataḥ //
māhātmyaṃ śivaliṃgānāṃ pravadāmi samāsataḥ

gokarṇaṃ kṣetramaparaṃ mahāpātakanāśanam //
mahāvanaṃ ca tatrāsti pavitramativistaram

tatrāsti candrabhālākhyaṃ śivaliṃgamanuttamam //
rāvaṇena samānītaṃ sadbhaktyā sarvasiddhidam

tasya tatra sthitirvaidyanāthasyeva munīśvarāḥ //
sarvalokahitārthāya karuṇāsāgarasya ca

snānaṃ kṛtvā tu gokarṇe candrabhālaṃ samarcya ca //
śivalokamavāpnoti satyaṃsatyaṃ na saṃśayaḥ

candrabhālasya liṃgasya mahimā paramādbhutaḥ //
na śakyo varṇituṃ vyāsādbhaktasnehitarasya hi

candrabhālamahādeva liṃgasya mahimā mahān //
yathākathaṃcitsaṃproktaḥ paraliṃgasya vai śṛṇu

dādhīcaṃ śivaliṃgaṃ tu miśrarṣivaratīrthake //
dadhīcinā munīśena suprītyā ca pratiṣṭhitam

tatra gatvā ca tattīrthe snātvā samyagvidhānataḥ //
śivaliṃgaṃ samarcedvai dādhīceśvaramādarāt

dādhīcamūrtistatraiva samarcyā vidhipūrvakam //
śivaprītyarthamevāśu tīrthayātrā phalārthibhiḥ

evaṃ kṛte muniśreṣṭhāḥ kṛtakṛtyo bhavennaraḥ //
iha sarvasukhaṃ bhuktvā paratra gatimāpnuyāt

naimiṣāraṇyatīrthe tu nikhilarṣipratiṣṭhitam //
ṛṣīśvaramiti khyātaṃ śivaliṃgaṃ sukhapradam

taddarśanātpūjanācca janānāṃ pāpināmapi //
bhuktimuktiśca teṣāṃ tu paratreha munīśvarāḥ

hatyāharaṇatīrthe tu śivaliṃgamaghāpaham //
pūjanīyaṃ viśeṣeṇa hatyākoṭivināśanam

devaprayāgatīrthe tu laliteśvaranāmakam//
śivaliṃgaṃ sadā pūjyaṃ naraissarvāghanāśanam

nayapālākhyapuryyāṃ tu prasiddhāyāṃ mahītale //
liṃgaṃ paśupatīśākhyaṃ sarvakāmaphalapradam

śirobhāgasvarūpeṇa śivaliṃgaṃ tadasti hi //
tatkathāṃ varṇayiṣyāmi kedāreśvaravarṇane

tadārānmuktināthākhyaṃ śivaliṃgaṃ mahādbhutam //
darśanādarcanāttasya bhuktirmuktiśca labhyate

iti vaśca samākhyātaṃ liṃgavarṇanamuttamam//
caturdikṣu muniśreṣṭhāḥ kimanyacchrotumicchatha

iti śrīśivamahāpurāṇe caturthyāṃ koṭirudrasaṃhitāyāṃ candrabhālapaśupatināthaliṃgamāhātmyavarṇanaṃ nāmaikādaśo'dhyāyaḥ