શિવ પુરાણ · અધ્યાય 4.11

ઋષય ઊચુઃ ॥
સૂતસૂત મહાભાગ ધન્યસ્ત્વં શિવસક્તધીઃ ॥
મહાબલસ્ય લિંગસ્ય શ્રાવિતેયં કથાદ્ભુતા

ઉત્તરસ્યાં દિશાયાં ચ શિવલિંગાનિ યાનિ ચ ॥
તેષાં માહાત્મ્યમનઘ વદ ત્વં પાપનાશકમ્

સૂત ઉવાચ॥
શૃણુતાદરતો વિપ્રા ઔત્તરાણાં વિશેષતઃ ॥
માહાત્મ્યં શિવલિંગાનાં પ્રવદામિ સમાસતઃ

ગોકર્ણં ક્ષેત્રમપરં મહાપાતકનાશનમ્ ॥
મહાવનં ચ તત્રાસ્તિ પવિત્રમતિવિસ્તરમ્

તત્રાસ્તિ ચન્દ્રભાલાખ્યં શિવલિંગમનુત્તમમ્ ॥
રાવણેન સમાનીતં સદ્ભક્ત્યા સર્વસિદ્ધિદમ્

તસ્ય તત્ર સ્થિતિર્વૈદ્યનાથસ્યેવ મુનીશ્વરાઃ ॥
સર્વલોકહિતાર્થાય કરુણાસાગરસ્ય ચ

સ્નાનં કૃત્વા તુ ગોકર્ણે ચન્દ્રભાલં સમર્ચ્ય ચ ॥
શિવલોકમવાપ્નોતિ સત્યંસત્યં ન સંશયઃ

ચન્દ્રભાલસ્ય લિંગસ્ય મહિમા પરમાદ્ભુતઃ ॥
ન શક્યો વર્ણિતું વ્યાસાદ્ભક્તસ્નેહિતરસ્ય હિ

ચન્દ્રભાલમહાદેવ લિંગસ્ય મહિમા મહાન્ ॥
યથાકથંચિત્સંપ્રોક્તઃ પરલિંગસ્ય વૈ શૃણુ

દાધીચં શિવલિંગં તુ મિશ્રર્ષિવરતીર્થકે ॥
દધીચિના મુનીશેન સુપ્રીત્યા ચ પ્રતિષ્ઠિતમ્

તત્ર ગત્વા ચ તત્તીર્થે સ્નાત્વા સમ્યગ્વિધાનતઃ ॥
શિવલિંગં સમર્ચેદ્વૈ દાધીચેશ્વરમાદરાત્

દાધીચમૂર્તિસ્તત્રૈવ સમર્ચ્યા વિધિપૂર્વકમ્ ॥
શિવપ્રીત્યર્થમેવાશુ તીર્થયાત્રા ફલાર્થિભિઃ

એવં કૃતે મુનિશ્રેષ્ઠાઃ કૃતકૃત્યો ભવેન્નરઃ ॥
ઇહ સર્વસુખં ભુક્ત્વા પરત્ર ગતિમાપ્નુયાત્

નૈમિષારણ્યતીર્થે તુ નિખિલર્ષિપ્રતિષ્ઠિતમ્ ॥
ઋષીશ્વરમિતિ ખ્યાતં શિવલિંગં સુખપ્રદમ્

તદ્દર્શનાત્પૂજનાચ્ચ જનાનાં પાપિનામપિ ॥
ભુક્તિમુક્તિશ્ચ તેષાં તુ પરત્રેહ મુનીશ્વરાઃ

હત્યાહરણતીર્થે તુ શિવલિંગમઘાપહમ્ ॥
પૂજનીયં વિશેષેણ હત્યાકોટિવિનાશનમ્

દેવપ્રયાગતીર્થે તુ લલિતેશ્વરનામકમ્॥
શિવલિંગં સદા પૂજ્યં નરૈસ્સર્વાઘનાશનમ્

નયપાલાખ્યપુર્ય્યાં તુ પ્રસિદ્ધાયાં મહીતલે ॥
લિંગં પશુપતીશાખ્યં સર્વકામફલપ્રદમ્

શિરોભાગસ્વરૂપેણ શિવલિંગં તદસ્તિ હિ ॥
તત્કથાં વર્ણયિષ્યામિ કેદારેશ્વરવર્ણને

તદારાન્મુક્તિનાથાખ્યં શિવલિંગં મહાદ્ભુતમ્ ॥
દર્શનાદર્ચનાત્તસ્ય ભુક્તિર્મુક્તિશ્ચ લભ્યતે

ઇતિ વશ્ચ સમાખ્યાતં લિંગવર્ણનમુત્તમમ્॥
ચતુર્દિક્ષુ મુનિશ્રેષ્ઠાઃ કિમન્યચ્છ્રોતુમિચ્છથ

ઇતિ શ્રીશિવમહાપુરાણે ચતુર્થ્યાં કોટિરુદ્રસંહિતાયાં ચન્દ્રભાલપશુપતિનાથલિંગમાહાત્મ્યવર્ણનં નામૈકાદશોઽધ્યાયઃ