Shiva Purana · Chapter 4.1

// śrīgaṇeśāya nama. //
atha caturthī koṭirudrasaṃhitā prārabhyate //
yo dhatte nijamāyayaiva bhuvanākāraṃ vikārojjhito
yasyāhuḥ karuṇākaṭākṣavibhavau svargāpavarggābhidhau //
pratyagbodhasukhādvayaṃ hṛdi sadā paśyanti yaṃ yoginastasmai
śailasutāñjitārddhavapuṣe śaśvannamastejase

kṛpālalitavīkṣaṇaṃ smitamanojñavaktrāmbujaṃ śaśāṃkakalayojjvalaṃ śamitaghoratāpatrayam //
karotu kimapi sphuratparamasaukhyasaccidvapurdharādharasutābhujodvalayitaṃ maho maṃgalam

ṛṣaya ūcuḥ //
samyaguktaṃ tvayā sūta lokānāṃ hitakāmyayā //
śivāvatāramāhātmyaṃ nānākhyānasamanvitam

punaśca kathyatāṃ tāta śivamāhātmyamuttamam //
liṃgasambandhi suprītyā dhanyastvaṃ śaivasattamaḥ

śṛṇvantastvanmukhāmbhojānna tṛptāssmo vayaṃ prabho //
śaivaṃ yaśo'mṛtaṃ ramyaṃ tadeva punarucyatām/

pṛthivyāṃ yāni yāni liṃgāni tīrthetīrthe śubhāni hi //
anyatra vā sthale yāni prasiddhāni sthitāni vai

tāni tāni ca divyāni liṃgāni parameśituḥ //
vyāsaśiṣya samācakṣva lokānāṃ hitakāmyayā

sūta uvāca //
sādhupṛṣṭamṛṣiśreṣṭha lokānāṃ hitakāmyayā//
kathayāmi bhavatsnehāttāni saṃkṣepato dvijāḥ

sarveṣāṃ śivaliṃgānāṃ mune saṃkhyā na vidyate //
sarvaṃ liṃgamayī bhūmiḥ sarvaliṃgamayaṃ jagat

liṃgamayāni tīrthāni sarvaṃ liṃge pratiṣṭhitam //
saṃkhyā na vidyate teṣāṃ tāni kiṃcidbravīmyaham

yatkiṃciddṛśyate dṛśyaṃ varṇyate smaryate ca yat //
tatsarvaṃ śivarūpaṃ hi nānyadastīti kiṃcana

tathāpi śrūyatāmprītyā kathayāmi yathāśrutam//
liṃgāni ca ṛṣiśreṣṭhāḥ pṛthivyāṃ yāni tāni ha

pātāle cāpi vartante svarge cāpi tathā bhuvi //
sarvatra pūjyate śambhuḥ sadevāsuramānuṣaiḥ

trijagacchambhunā vyāptaṃ sadevāsuramānuṣam//
anugrahāya lokānāṃ liṃgarūpeṇa sattamāḥ

anugrahāya lokānāṃ liṃgāni ca maheśvaraḥ //
dadhāti vividhānyatra tīrthe cānyasthale tathā

yatrayatra yadā śaṃbhurbhaktyā bhaktaiśca saṃsmṛtaḥ //
tatratatrāvatīryātha kāryaṃ kṛtvā sthitastadā

lokānāmupakārārthaṃ svaliṃgaṃ cāpyakalpayat//
talliṃgaṃ pūjayitvā tu siddhiṃ samadhigacchati

pṛthibyāṃ yāni liṃgāni teṣāṃ saṃkhyā na vidyate //
tathāpi ca pradhānāni kathyate ca mayā dvijāḥ

pradhāneṣu ca yānīha mukhyāni pravadāmyaham//
yacchrutvā sarvapāpebhyo mucyate mānavaḥ kṣaṇāt

jyotirliṃgāni yānīha mukhyamukhyāni sattama//
tānyahaṃ kathayāmyadya śrutvā pāpaṃ vyapohati

saurāṣṭre somanāthaṃ ca śrīśaile mallikārjunam //
ujjayinyāṃ mahākālamoṃkāre parameśvaram

kedāraṃ himavatpṛṣṭhe ḍākinyāṃ bhīmaśaṃkaram//
vārāṇasyāṃ ca viśveśaṃ tryambakaṃ gautamītaṭe

vaidyanāthaṃ citābhūmau nāgeśaṃ dārukāvane //
setubaṃdhe ca rāmeśaṃ ghuśmeśaṃ ca śivālaye

dvādaśaitāni nāmāni prātarutthāya yaḥ paṭhet //
sarvapāpavinirmuktaḥ sarvasiddhiphalaṃ labhet

yaṃ yaṃ kāmamapekṣyaiva paṭhiṣyanti narottamāḥ //
prāpsyaṃti kāmaṃ taṃ taṃ hi paratreva munīśvarāḥ

/
ye niṣkāmatayā tāni paṭhiṣyanti śubhāśayāḥ //
teṣāṃ ca jananīgarbhe vāso naiva bhaviṣyati

eteṣāṃ pūjanenaiva varṇānāṃ duḥkhanā śanam //
iha loke paratrāpi muktirbhavati niścitam

grāhyameṣāṃ ca naivedyaṃ bhojanīyaṃ prayatnataḥ //
tatkartuḥ sarvvapāpāni bhasmasād yānti vai kṣaṇāt

jyotiṣāṃ caiva liṃgānāṃ bahmādibhiralaṃ dvijāḥ //
viśeṣataḥ phalaṃ vaktuṃ śakyate na paraistathā

ekaṃ ca pūjitaṃ yena ṣaṇmāsaṃ tannirantaram //
tasya duḥkhaṃ na jāyeta mātṛkukṣisamudbhavam

hīnayonau yadā jāto jyotirliṃgaṃ ca paśyati //
tasya janma bhavettatra vimale satkule punaḥ

satkule janma saṃprāpya dhanāḍhyo vedapāragaḥ //
śubhakarma tadā kṛtvā muktiṃ yātyanapāyinīm

mleccho vāpyantyajo vāpi ṣaṇḍho vāpi munīśvarāḥ//
dvijo bhūtvā bhavenmuktastasmāttaddarśanaṃ caret

jyotiṣāṃ caiva liṃgānāṃ kiṃcitproktaṃ phalaṃ mayā //.
jyotiṣāṃ copaliṃgāni śrūyantāmṛṣisattamāḥ

someśvarasya yalliṃgamantakeśamudāhṛtam //
mahyāssāgarasaṃyoge talliṃgamupaliṅgakam

mallikārjunasaṃbhūtamupaliṃgamudāhṛtam //
rudreśvaramiti khyātaṃ bhṛgukakṣe sukhāvaham

mahākālabhavaṃ liṃgaṃ dugdheśamiti viśrutam//
narmadāyāṃ prasiddhaṃ tatsarvapāpaharaṃ smṛtam //

ॐkārajaṃ ca yalliṃgaṃ kardameśamiti śrutam //
prasiddhaṃ bindusarasi sarvakāmaphalapradam

kedāreśvarasaṃjātaṃ bhūteśaṃ yamunā taṭe //
mahāpāpaharaṃ proktaṃ paśyatāmarcatāntathā

bhīmaśaṃkarasaṃbhūtaṃ bhīmeśvaramiti smṛtam //
sahyācale prasiddhaṃ tanmahābalavivarddhanam

nāgeśvarasamudbhūtaṃ bhūteśvaramudāhṛtam//
mallikāsarasvatītīre darśanātpāpahārakam

rāmeśvarācca yajjātaṃ gupteśvaramiti smṛtam //
ghuśmeśāccaiva yajjātaṃ vyāghreśvaramiti smṛtam

jyotirliṃgopaliṃgāni proktānīha mayā dvijāḥ//
darśanātpāpahārīṇi sarvakāmapradāni ca

etāni supradhānāni mukhyatāṃ hi gatāni ca //
anyāni cāpi mukhyāni śrūyatāmṛṣisattamā/

iti śrīśivamahāpurāṇe caturthyāṃ koṭirudrasaṃhitāyāṃ jyotirligatadupaliṃga māhātmyavarṇanaṃ nāma prathamo'dhyāyaḥ