Shiva Purana · Chapter 4.2

sūta uvāca //
gaṃgātīre suprasiddhā kāśī khalu vimuktidā //
sā hi liṃgamayī jñeyā śivavāsasthalī smṛtā

liṃgaṃ tatraiva mukhyaṃ ca samproktamavimuktakam //
kṛttivāseśvaraḥ sākṣāttattulyo vṛddhabālakaḥ

tilabhāṇḍeśvaraścaiva daśāśvamedha eva ca //
gaṃgā sāgarasaṃyoge saṃgameśa iti smṛtaḥ

bhūteśvaro yaḥ saṃprokto bhaktasarvārthadaḥ sadā//
nārīśvara iti khyātaḥ kauśikyāḥ sa samīpagaḥ

vartate gaṇḍakītīre baṭukeśvara eva saḥ//
pūreśvara iti khyātaḥ phalgutīre sukhapradaḥ

siddhanātheśvaraścaiva darśanātsiddhido nṛṇām //
dūreśvara iti khyātaḥ pattane cottare tathā

śṛṃgeśvaraśca nāmnā vai vaidyanāthastathaiva ca //
japyeśvarastathā khyāto yo dadhī ciraṇasthale

gopeśvaraḥ samākhyātaḥ raṃgeśvara iti smṛtaḥ //
vāmeśvaraśca nāgeśaḥ kājeśo vimaleśvaraḥ

vyāseśvaraśca vikhyātaḥ sukeśaśca tathaiva hi //
bhāṇḍeśvarāśca vikhyāto huṃkāreśastathaiva ca

surocanaśca vikhyāto bhūteśvara iti svayam//
saṃgameśastathā prokto mahāpātakanāśanaḥ

tataśca taptakātīre kumāreśvara eva ca//
siddheśvaraśca vikhyātaḥ seneśaśca tathā smṛtaḥ //
rāmeśvara iti proktaḥ kuṃbheśaśca paro mataḥ //
nandīśvaraśca puṃjeśaḥ pūrṇāyāṃ pūrṇakastathā

brahmeśvaraḥ prayoge ca brahmaṇā sthāpitaḥ purā//
daśāśvamedhatīrthe hi caturvargaphalapradaḥ

tathā someśvarastatra sarbvāpadvinivārakaḥ //
bhāradvājeśvaraścaiva brahmavarcaḥpravarddhakaḥ

śūlaṭaṃkeśvaraḥ sākṣātkāmanāprada īritaḥ //
mādhaveśaśca tatraiva bhaktarakṣāvidhāyakaḥ

nāgeśākhyaḥ prasiddho hi sāketanagare dvijā //
sūryyavaṃśodbhavānāṃ ca viśeṣeṇa sukhapradaḥ

puruṣottamapuryāṃ tu bhuvaneśastu siddhidaḥ //
lokeśaśca mahāliṃgaḥ sarvānandapradāyakaḥ

kāmeśvaraḥ śaṃbhuliṃgo gaṃgeśaḥ paraśuddhikṛt //
śakreśvaraḥ śukrasiddho lokānāṃ hitakāmyayā

tathā vaṭeśvaraḥ khyātaḥ sarvakāmaphalapradaḥ //
sindhutīre kapāleśo vaktreśaḥ sarvapāpahā

dhautapāpeśvaraḥ sākṣādaṃśena parameśvara.//
bhīmeśvara iti proktaḥ sūryeśvara iti smṛtaḥ

nandeśvaraśca vijñeyo jñānado lokapūjitaḥ//
nākeśvaro mahāpuṇyastathā rāmeśvaraḥ smṛtaḥ

vimaleśvaranāmā vai kaṃṭakeśvara eva ca//
pūrṇasāgarasaṃyoge dhartukeśastathaiva ca

candreśvaraśca vijñeyaścandrakāntiphalapradaḥ//
sarvakāma pradaścaiva siddheśvara iti smṛtaḥ

bilveśvaraśca vikhyātaścāndhakeśastathaiva ca //
yatra vā hyandhako daityaḥ śaṃkareṇa hataḥ purā

ayaṃ svarūpamaṃśena dhṛtvā śaṃbhuḥ punaḥ sthitaḥ //
śaraṇeśvaravikhyāto lokānāṃ sukhadaḥ sadā

kardameśaḥ paraḥ prokta koṭīśaścārbudācale //
acaleśaśca vikhyāto lokānāṃ sukhadaḥ sadā

nāgeśvarastu kauśikyāstīre tiṣṭhati nityaśaḥ//
ananteśvarasaṃjñaśca kalyāṇaśubhabhājanaḥ

yogeśvaraśca vikhyāto vaidyanātheśvarastathā //
koṭīśvaraśca vijñeyaḥ sapteśvara iti smṛtaḥ

bhadreśvaraśca vikhyāto bhadranāmā haraḥ svayam//
caṇḍīśvarastathā proktaḥ saṃgameśvara eva ca

pūrvasyāṃ diśi jātāni śivaliṃgāni yāni ca//
sāmānyānyapi cānyāni tānīha kathitāni te

dakṣiṇasyāṃ diśi tathā śivaliṃgāni yāni ca//
saṃjātāni muniśreṣṭha tāni te kathayāmyaham

iti śrīśivamahāpurāṇe caturthyāṃ koṭirudrasaṃhitāyāṃ śivaliṃgamāhātmyavarṇanaṃnāma dvitīyo'dhyāyaḥ