Shiva Purana · Chapter 3.38

nandīśvara uvāca //
arjunopi tadā tatra dīpyamāno vyadṛśyata //
mantreṇa śivarūpeṇa tejaścātulamāvahat

te sarve cārjunandṛṣṭvā pāṇḍavā niścayaṃ gatāḥ //
jayo'smākaṃ dhuvañjātantejaśca vipulaṃ yataḥ

idaṅkāryyantvayā sādhyannānyena ca kadācana //
vyāsasya vacanādbhāti saphalaṃ kuru jīvitam

iti procyārjunante vai virahautsukyakātarāḥ //
anicchantopi tatraiva preṣayāmāsurādarāt

draupadī duḥkhasaṃyuktā netrāśrūṇi nirudhya ca //
preṣayantī śubhaṃ vākyantadovāca pativratā

draupadyuvāca //
vyāsopadiṣṭaṃ yadrājaṃstvayā kāryaṃ prayatnataḥ //
śubhaprado'stu te panthāśśaṃkaraśśaṃkarostu vai

te sarve cāvasaṃstatra visṛjyārjunamādarāt //
atyantaduḥkhamāpannā militvā pañca eva ca

sthitāstatra vadanti sma śrūyatāmṛṣisattama//
duḥkhepi priyasaṃgo vai na duḥkhāya prajāyate

viyoge dviguṇantasya duḥkhambhavati nityaśaḥ ///
tatra dhairyyadharasyāpi kathandhairyyambhavediha

nandīśvara uvāca //
kurvatastveva tadā duḥkhampāṇḍaveṣu munīśvaraḥ //
kṛpāsiṃdhuśca sa vyāsa ṛṣivaryyassamāgata

tantadā pāṇḍavāste vai natvā sampūjya cādarāt //
dattvāsanaṃ hi duḥkhāḍhyāḥ karau baddhvā vaco'bruvan

pāṇḍavā ūcuḥ //
śrūyatāmṛṣabhaśreṣṭha duḥkhadagdhā vayamprabho //
darśanante'dya samprāpya hyānandaṃ prāpnumo mune

kiyatkālaṃ vasātraiva duḥkhanāśāya naḥ prabho //
darśanāttava viprarṣessarvaṃ duḥkhaṃ vilīyate

nandīśvara uvāca//
ityuktassa ṛṣiśreṣṭho nyavasattatsukhāya vai //
kathābhirvividhābhiśca tadduḥkhaṃ nodayaṃstadā

vārtāyāṃ kriyamāṇāyāntena vyāsena sanmune //
supraṇamya vinītātmā dharmarājo'bravīdidam

dharmarāja uvāca //
śṛṇu tvaṃ hi ṛṣiśreṣṭha duḥkhaśāntirmatā mama //
pṛcchāmi tvāṃ mahāprājña kathanīyantvayā prabho

īdṛśaṃ caiva duḥkhaṃ ca purā prāptaśca kaścana//
vayameva paraṃ duḥkhaṃ prāptā vai naiva kaścana

vyāsa uvāca //
rājñastu nalanāmno vai niṣadhādhipateḥ purā //
bhavadduḥkhādhikaṃ duḥkhaṃ jātantasya mahātmanaḥ

hariścandrasya nṛpaterjātaṃ duḥkhammahattaram //
akathyantadviśeṣeṇa paraśokāvahantathā

duḥkhamtathaiva vijñeyaṃ rāmasyāpyatha pāṇḍava //
yacchrutvā strīnarāṇāṃ ca bhavenmoho mahattaraḥ

tasmādvarṇayitunnaiva śakyate hi mayā punaḥ //
śarīraṃ duḥkharāśiṃ ca matvā tyājyantvayādhunā

yenedañca dhṛtantena vyāptameva na saṃśayaḥ //
prathamammātṛgarbhe vai janma duḥkhasya kāraṇam

kaumāre'pi mahāduḥkhaṃ bālalīlānusāri yat //
tatopi yauvane kāmānbhunjāno duḥkharūpiṇaḥ

gatāgatairdinānāṃ hi kāryabhārairanekaśaḥ //
āyuśca kṣīyate nityaṃ na jānāti ha tatpunaḥ

ante ca maraṇaṃ caiva mahāduḥkhamataḥ param //
nānānarakapīḍāśca bhujyaṃtejñairnaraissadā

tasmādidamasatyaṃ ca tvantu satyaṃ samācara //
yenaiva tuṣyate śambhustathā kāryaṃ nareṇa ca

nandīśvara uvāca //
evaṃ vividhavārtābhiḥ kālaniryāpaṇantadā //
cakruste bhrātaraḥ sarve manorathapathaiḥ punaḥ

arjunopi svayaṃ gacchandurgādriṣu dṛḍhavrataḥ //
yakṣaṃ labdhvā ca tenaiva dasyūnnighnannanekaśaḥ

manasā harṣasaṃyukto jagāmācalamuttamam //
tatra gatvā ca gaṃgāyāssamīpaṃ sundaraṃ sthalam

aśokakānanaṃ yatra tiṣṭhati svarga uttamaḥ //
tatra tasthau svayaṃ snātvā natvā ca gurumuttamam

yathopadiṣṭaṃ veṣādi tathā caivākarotsvayam //
indriyāṇyapakṛṣyādau manasā saṃsthito'bhavat

punaśca pārthivaṃ kṛtvā sundaraṃ samasūtrakam //
tadagre praṇidadhyau sa tejorāśimanuttamam

trikālaṃ caiva susnātaḥ pūjanaṃ vividhaṃ tadā //
cakāropāsanantatra harasya ca punaḥ punaḥ

tasyaiva śirasastejo nissṛtantaccarāstadā //
dṛṣṭvā bhayaṃ samāpannāḥ praviṣṭaśca kadā hyayam

punaste ca vicāryaivaṃ kathanīyaṃ biḍaujase//
ityuktvā tu gatāste vai śakrasyāntikamañjasā

carā ūcuḥ //
devo vā'tha ṛṣiścaiva sūryo vātha vibhāvasuḥ //
tapaścarati deveśa na jānīmo vane ca tam

tasyaiva tejasā dagdhā āgatāstava sannidhau //
niveditañcaritraṃ tatkriyatāmucitantu yat

nandīśvara uvāca//
ityuktastaiścaraissarvaṃ jñātvā putracikīrṣitam //
sagotrapānvisṛjyaiva tatra gantuṃ mano dadhe

sa vṛddhabrāhmaṇo bhūtvā brahmacārī śacīpatiḥ //
jagāma tatra viprendra parīkṣārthaṃ hi tasya vai

tamāgatantadā dṛṣṭvākārṣītpūjāśca pāṇḍavaḥ//
sthitogre ca stutiṃ kṛtvā kvāyātosi vadādhunā

ityuktastena deveśo dhairyyārthantasya prītitaḥ //
parīkṣāgarvitaṃ vākyaṃ pāṇḍavantaṃ tato'bravīt

brāhmaṇa uvāca //
nave vayasi vai tāta kintapasyasi sāmpratam //
muktyarthaṃ vā jayārthaṃ kiṃ sarvathaitattapastava

nandīśvara uvāca//
iti pṛṣṭastadā tena sarvaṃ saṃveditampunaḥ //
tacchrutvā sa punarvākyamuvāca brāhmaṇastadā //४३/
brāhmaṇa uvāca //
yuktaṃ na kriyate vīra sukhaṃ prāptuṃ ca yattapaḥ //
kṣātradharmeṇa kriyate muktyarthaṃ kurusattama

indrastu sukhadātā vai muktidātā bhavenna hi //
tasmāttvaṃ sarvathā śreṣṭha kartumarhasi sattapaḥ//
nandīśvara uvāca//
idantadvacanaṃ śrutvā krodhaṃ cakre'rjunastadā//
pratyuvāca vinītātmā tadanādṛtya suvrataḥ/४६//
arjuna uvāca //
rājyārthaṃ na ca muktyartha kimarthaṃ bhāṣase tvidam //
vyāsasya vacanenaiva kriyate tapa īdṛśam

ito gaccha brahmacārinmā pātayitumicchasi //
prayojanaṃ kimatrāsti tava vai brahmacāriṇaḥ

nandīśvara uvāca//
ityuktaḥ sa prasannobhūtsundaraṃ rūpamadbhutam //
svopaskaraṇasaṃyuktaṃ darśayāmāsa vai nijam

śakrarūpantadā dṛṣṭvā lajjitaścārjunastadā//
sa indrastaṃ samāśvāsya punareva vacobravīt

iṃdra uvāca //
varaṃ vṛṇīṣva he tāta dhanaṃjaya mahāmate //
yadicchasi manobhīṣṭannādeyaṃ vidyate tava

tacchrutvā śakravacanampratyuvācārjunastadā //
vijayandehi me tāta śatrukliṣṭasya sarvathā

śakra uvāca //
baliṣṭhāśśatravaste ca duryodhanapuraḥsarāḥ //
droṇo bhīmaśca karṇaśca sarve te durjayā dhuvam

aśvatthāmā droṇaputro raudroṃśo durjayo'ti saḥ //
mayā sādhyā bhaveyuste sarvathā svahitaṃ śṛṇu

etadvīra japaṃ kartuṃ na śaktaḥ kaścanādhunā //
vartate hi śivovaryastasmācchambhorjayo' dhunā

śaṃkaraḥ sarvalokeśaścarācarapatiḥ svarāṭ //
sarvaṃ kartuṃ samarthosti bhuktimuktiphalapradaḥ

ahaṃ manye ca brahmādyā viṣṇuḥ sarvavarapradaḥ //
anye jigīṣavo ye ca te sarve śivapūjakāḥ

adyaprabhṛti tanmantraṃ hitvā bhaktyā śivaṃ bhaja //
pārthivena vidhānena dhyānenaiva śivasya ca

upacārairanekaiśca sarvabhāvena bhārata //
siddhiḥ syādacalā tedya nātra kāryā vicāraṇā

nandīśvara uvāca //
ityuktvā ca carānsarvānsamāhūyābravīdidam //
sāvadhānena vai stheyametatsaṃrakṣaṇe sadā

prabodhya svacarānindro'rjunasaṃrakṣaṇādikam //
vātsalyapūrṇahṛdayaḥ punarūce kapidhvajam

indra uvāca//
rājyaṃ tvayā pramādādvai na kartavyaṃ kadācana //
śreyase bhadra vidyeyaṃ bhavettava parantapa

dhairyaṃ dhārya sādhakena sarvathā rakṣakaḥ śivaḥ//
saṃpattīśca phalantulyaṃ dāsyate nātra saṃśayaḥ

nandīśvara uvāca //
iti dattvā varantasya bhāratasya sureśvaraḥ //
smarañchivapadāmbhojañjagāma bhavanaṃ svakam

arjunopi mahāvīrassupraṇamya sureśvaram //
tapastepe saṃyatātmā śivamuddiśya tadvidham

iti śrīśivamahāpurāṇe tṛtīyāyāṃ śatarudrasaṃhitāyāṃ kirātāvatāravarṇanaprasaṃge'rjunatapovarṇanaṃ nāmāṣṭatriṃśo'dhyāyaḥ