Shiva Purana · Chapter 3.37

nandīśvara uvāca //
śṛṇu prājña kirātākhyamavatārampinākinaḥ //
mūkaṃ ca hatavānprīto yo'rjunāya varandadau

suyodhanajitāste vai pāṇḍavāḥ pravarāśca te//
draupadyā ca tayā sādhvyā dvaitākhyaṃ vanamāyayuḥ

tatraiva sūryyadattāṃ vai sthālīṃ cāśritya te tadā //
kālaṃ ca vāhayāmāsussukhena kila pāṇḍavāḥ

chalārthaṃ preritastena durvāsā munipuṅgavaḥ //
suyodhanena viprendra pāṇḍavāntikamādarāt

chātraiḥ svairvāyutaissārddhaṃ yayāce tatra tānmudā //
bhojyaṃ cittepsitaṃ vai sa tebhyaścaiva samāgataḥ

svīkṛtya pāṇḍavaistaistaiḥ snānārthaṃ preṣitāstadā //
durvāsaḥpramukhāścaiva munayaśca tapasvinaḥ

atha te pāṇḍavāḥ sarve annābhāvānmunīśvara //
duḥkhitāśca tadā prāṇāṃstyaktuṃ citte samādadhuḥ

draupadyā ca smṛtaḥ kṛṣṇa āgatastatkṣaṇādapi //
śākaṃ ca bhakṣayitvā tu teṣāṃ tṛptiṃ samādadhat

durvāsāśca tadā śiṣyāṃstṛptāñjñātvā yayau punaḥ //
pāṇḍavāḥ kṛcchranirmuktāḥ kṛṣṇasya kṛpayā tadā

atha te pāṇḍavāḥ kṛṣṇaṃ papracchuḥ kimbhaviṣyati //
balavāñchatrurutpannaḥ kiṃ kāryyantadvada prabho

nandīśvara uvāca //
iti pṛṣṭhastadā taistu śrīkṛṣṇaḥ pāṇḍavairmune //
smṛtvā śivapadāmbhojau pāṇḍavānidamabravīt

śrīkṛṣṇa uvāca //
śrūyatāṃ pāṇḍavāḥ śreṣṭhāḥ śrutvā kartavyameva hi //
madvṛttāntaṃ viśeṣeṇa śivasevāsamanvitam

dvārakāṃ ca mayā gatvā śatrūṇāṃ vijigīṣayā//
vicāryya copadeśāṃśca upamanyormahātmanaḥ

mayā hyārādhitaḥ śambhuḥ prasannaḥ parameśvaraḥ //
baṭuke parvataśreṣṭhe saptamāsaṃ susevitaḥ

iṣṭānkāmānadānmahyaṃ viśveśaśca svayaṃ sthitaḥ //
tatprabhāvānmayā sarvasāmarthyaṃ labdhamuttamam

idānīṃ sevyate devo bhuktimukti phalapradaḥ //
yūyaṃ sevata taṃ śambhumapi sarvasukhāvaham

nandīśvara uvāca //
ityuktvāntardadhe kṛṣṇa āśvāsyātha ca pāṇḍavān //
dvārakāmagamacchīghraṃ smaracchivapadāmbujam

pāṇḍavā atha bhillaṃ ca preṣayāmāsurojasā //
guṇānāṃ ca parīkṣārthaṃ tasya duryodhanasya ca

sopi sarvaṃ ca tatratyanduryodhanaguṇodayam //
samīcīnaṃ ca tajjñātvāpunaḥ prāpa prabhūnprati

taduktante niśamyaivaṃ dukhamprāpurmunīśvara //
parasparaṃ samūcuste pāṇḍavā atiduḥkhitāḥ

kiṅkartavyaṃ kva gantavyamasmābhiradhunā yudhi//
samarthā api vai sarve satyapāśena yantritāḥ

nandīśvara uvāca //
etasminsamaye vyāso bhasmabhūṣitamastakaḥ //
rudrākṣābharaṇaścāyājjaṭājūṭavibhūṣitaḥ

pañcākṣaraṃ japanmaṃtraṃ śivapremasamākulaḥ //
tejasāṃ ca svayaṃrāśissākṣāddharma ivāparaḥ

tandṛṣṭvā te tadā prītā utthāya purataḥ sthitāḥ //
dattvāsanaṃ tadā tasmai kuśājinasuśobhitam

tatropaviṣṭaṃ taṃ vyāsaṃ pūjayanti sma harṣitāḥ//
stutiṃ ca vividhāṃ kṛtvā dhanyāḥ sma iti vādinaḥ

tapaścaiva susantaptaṃ dānāni vividhāni ca //
tatsarvaṃ saphalaṃ jātaṃ tṛptāste darśanātprabho

duḥkhaṃ ca dūrato jātandarśanātte pitāmaha //
duṣṭaiścaiva mahāduḥkhaṃ dattaṃ naḥ krūrakarmabhiḥ

śrīmatāndarśane jāte duḥkhaṃ caiva gamiṣyati //
kadācinna gataṃ tatra niścayoyaṃ vicāritaḥ

mahatāmāśrame prāpte samarthe sarvakarmaṇi //
yadi duḥkhaṃ na gacchetu daivamevātra kāraṇam

niścayenaiva gacchetu dāridyaṃ duḥkhakāraṇam //
mahatāṃ ca svabhāvoyaṃ kalpavṛkṣasamo mataḥ

tadguṇāneva gaṇayenmahato vastumātrataḥ //
āśrayasya vaśādeva puṃso vai jāyate prabho

laghutvaṃ ca mahattvaṃ ca nātra kāryyā vicāraṇā //
uttamānāṃ svabhāvoyaṃ yaddīnapratipālanam

raṃkasya lakṣaṇaṃ loke hyatiśreyaskaraṃ matam //
puro'sya parayatno vai sujanānāṃ ca sevanam

ataḥ paraṃ ca bhāgyaṃ vai doṣaścaiva na dīyatām //
etasmātkāraṇātsvāmiṃstvayi dṛṣṭo śubhantadā

tvadāgamanamātreṇa santuṣṭāni manāṃsi naḥ //
diśopadeśaṃ yenāśu duḥkhaṃ naṣṭambhavecca naḥ

nandīśvara uvāca //
ityetadvacanaṃ śrutvā pāṇḍavānāṃ mahāmuniḥ //
prasannamānaso bhūtvā vyāsaścaivābravīdidam

he pāṇḍavāśca yūyaṃ vai na kaṣṭaṃ kartumarhatha //
dhanyāḥ stha kṛtakṛtyāḥ stha satyaṃ naiva vilopitam

sujanānāṃ svabhāvoyaṃ prāṇānte'pi suśobhanaḥ //
dharmaṃ tyajanti naivātra satyaṃ saphalabhājanam

asmākaṃ caiva yūyaṃ ca te cāpi samatāṅgatāḥ //
tathāpi pakṣapāto vai dharmiṣṭhānāṃ mato budhaiḥ

dhṛtarāṣṭrena duṣṭena prathamaṃ ca hyacakṣuṣā //
dharmastyaktaḥ svayaṃ lobhādyuṣmākaṃ rājyamāhṛtam

tasya yūyaṃ ca te cāpi putrā eva na saṃśayaḥ//
pitaryyuparate bālā anukaṃpyā mahātmanaḥ

paścātputraśca tenaiva vārito na kadācana //
anartho naiva jāyeta yaccaivaṃ ca kṛtantadā

ataḥ paraṃ ca yajjātaṃ tajjātaṃ nānyathābhavet //
ayanduṣṭo bhavantaśca dharmiṣṭhāḥ satyavādinaḥ

tasmādante ca tasyaivāśubhaṃ hi bhavitā dhuvam //
yaccaiva vāpitaṃ bījaṃ tatpraroho bhavediha

tasmādduḥkhaṃ na kartavyaṃ bhavadbhiḥ sarvathā dhruvam //
bhaviṣyati śubhaṃ vo hi nātra kāryyā vicāraṇā

// nandīśvara uvāca//
ityuktvā pāṇḍavāḥ sarve tena vyāsena prīṇitāḥ//
yudhiṣṭhiramukhāste ca punarevābruvanvacaḥ

pāṇḍavā ūcuḥ //
satyamuktantvayā nātha duṣṭairduḥkhaṃ niraṃtaram //
duṣṭātmabhirvane cāpi dīyate hi muhurmuhuḥ

tannāśayāśubhammedya kiṃciddeyaṃ śubhaṃ vibho //
kṛṣṇena kathitaṃ pūrvamārādhyaśśaṅkarassadā

pramādaśca kṛto'smābhistadvacaśśithilīkṛtam//
sa devamārgastu punaridānīmupadiśyatām

nandīśvara uvāca//
ityetadvacanaṃ śrutvā vyāso harṣasamanvitaḥ //
uvāca pāṇḍavānprītyā smṛtvā śivapadāṃbujam

vyāsa uvāca //
śrūyatāṃ vacanaṃ medya pāṃḍavā dharmabuddhayaḥ //
satyamuktaṃ tu kṛṣṇena mayā saṃsevyate śivaḥ

bhavadbhiḥ sevyatāṃ prītyā sukhaṃ syādatulaṃ sadā //
sarvaduḥkhaṃ bhavatyeva śivā'sevāta eva hi

// naṃdīśvara uvāca //
atha paṃcasu teṣveva vicāryya śivapūjane //
arjunaṃ yogyamuccārya vyāso munivarastathā

tapaḥsthānaṃ vicāryyaivaṃ tatassa munisattamaḥ //
pāṇḍavāndharmasanniṣṭhānpunarevābravīdidam

// vyāsa uvāca //
śrūyatāmpāṇḍavāssarve kathayāmi hitaṃ sadā //
śivaṃ sarvaṃ paraṃ dṛṣṭvā paraṃ brahma satāṅgatim

brahmāditriparārddhāntaṃ yatkiṃciddṛśyate jagat //
tatsarvaṃ śivarūpaṃ ca pūjyandhyeyaṃ ca tatpunaḥ

sarveṣāṃ caiva seṣyosau śaṅkarassarvaduḥkhahā //
śivaḥ svalpena kālena saṃprasīdati bhaktitaḥ

suprasanno maheśo hi bhaktebhyaḥ sakalapradaḥ //
bhuktiṃ muktimihāmutra yacchatīti suniścitam

tasmātsevyassadā śabhbhurbhuktimuktiphalepsubhiḥ //
puruṣaśśaṅkaraḥ sākṣādduṣṭahantā satāṃgatiḥ

parantu prathamaṃ śakravidyāṃ dṛḍhamanā japet //
kṣatriyasya parākhyasya cedameva samāhitam

atorjunaśca prathamaṃ śakravidyāṃ japeddṛḍhaḥ //
kariṣyati parīkṣāmprāk saṃtuṣṭastadbhaviṣyati

suprasannaśca vighnāni saṃhariṣyati sarvadā //
punaścaivaṃ śivasyaiva varaṃ mantraṃ pradāsyati

nandīśvara uvāca //
ityuktvārjunamāhūyopendravidyāmupādiśat //
snātvā ca prāṅmukho bhūtvā jagrāhārjuna ugradhīḥ

pārthivasya vidhānaṃ ca tasmai munivaro dadau //
pratyuvāca ca taṃ vyāso dhanaṃjayamudāradhīḥ

vyāsa uvāca //
ito gacchādhunā pārtha indrakīle suśobhane //
jāhnavyāśca samīpe vai sthitvā samyak tapaḥ kuru

adṛśyā caiva vidyā syātsadā te hitakāriṇī //
ityāśiṣandadau tasmai tataḥ provāca tānmuniḥ

dharmmamāsthāya sarvaṃ vai tiṣṭhantu nṛpasattamāḥ //
siddhiḥ syātsarvathā śreṣṭhā nātra kāryā vicāraṇā

nandīśvara uvāca //
iti dattvāśiṣantebhyaḥ pāṇḍavebhyo munīśvaraḥ //
smṛtvā śivapadāmbhojaṃ vyāsaścāntardadhe kṣaṇāt

iti śrīśivamahāpurāṇe tṛtīyāyāṃ śatarudrasaṃhitāyāṃ kirātāvatāravarṇanaprasaṃge'rjunāya vyāsopadeśavarṇanaṃ nāma saptatriṃśo'dhyāyaḥ