Shiva Purana · Chapter 3.39

nandīśvara uvāca//
snānaṃ sa vidhivatkṛtvā nyāsādi vidhivattathā //
dhyānaṃ śivasya sadbhaktyā vyāsoktaṃ yattathā'karot

ekapādatalenaiva tiṣṭhanmunivaro yathā //
sūryye dṛṣṭiṃ nibadhyaikāṃ maṃtramāvartayansthitaḥ

tapastepeti saṃprītyā saṃsmaranmanasā śivam //
paṃcākṣaraṃ manuṃ śaṃbhorjapansarvo ttamottamam

tapasasteja evāsīdyathā devā visismiyuḥ //
punaścaiva śivaṃ yātāḥ pratyūcuste samāhitāḥ

devā ūcuḥ //
nareṇaikena sarveśa tvadarthe tapa āhitam//
yadicchati narassoyaṃ kinna yacchati tatprabho

nandīśvara uvāca //
ityuktvā tu stutiṃ cakurvividhānte tadā surāḥ //
tatpādayordṛśaḥ kṛtvā tatra tasthuḥ sthirādhayaḥ

śivastu tadvacaḥ śrutvā mahāprabhurudāraghīḥ //
suvihasya prasannātmā surānvacanamabravīt

śiva uvāca //
svasthānaṃ gacchata surāḥ sarve satyanna saṃśayaḥ
sarvathāhaṃ kariṣyāmi kāryaṃ vo nātra saṃśaya

naṃdīśvara uvāca //
tacchrutvā śaṃbhuvacananniścayaṃ paramaṃ gatāḥ //
parāvṛtya gatāḥ sarve svasvathānaṃ te hi nirjarāḥ

etasminnaṃtare daityo mūkanāmāgatastadā //
saukaraṃ rūpamāsthāya preṣitaśca durātmanā

duryodhanena vipreṃdra māyinā cārjunaṃ tadā //
yatrārjunasthitaścāsīttena mārgeṇa vai tadā

śṛṅgāṇi parvatasyaiva cchindanvṛkṣānanekaśaḥ //
śabdaṃ ca vividhaṃ kurva nnativegena saṃyutaḥ

ajunopi ca taṃ dṛṣṭvā mūkanāmāsuraṃ tadā //
smṛtvā śivapadāṃbhojaṃ vicāre tatparo'bhavat

arjuna uvāca //
koyaṃ vā kuta āyāti krūrakarmā ca dṛśyate //
mamāniṣṭaṃ dhruvaṃ kartuṃ samāgacchatyasaṃśayam

mamaivaṃ mana āyāti śatrureva na saṃśayaḥ //
mayā vinihatāḥ pūrvamaneke daityadānavāḥ

tadīyaḥ kaścidāyāti vairaṃ sādhayitumpunaḥ //
athavā ca sakhā kaścidduryodhanahitāvahaḥ

yasmindṛṣṭe prasīdetsvaṃ manaḥ sa hitakṛddhruvam//
yasmindṛṣṭe tadeva syādākulaṃ śatrureva saḥ

ācāraḥ kulamākhyāti vapurākhyāti bhojanam //
vacanaṃ śrutamākhyāti snehamākhyāti locanam

ākāreṇa tathā gatyā ceṣṭayā bhāṣitairapi //
netravaktravikārābhyāṃ jñāyate'ntarhitaṃ manaḥ

ujjvalaṃ sarasañcaiva vakramārakta kantathā //
netraṃ caturvidhaṃ proktaṃ tasya bhāvaṃ pṛthagbudhāḥ

ujjvalaṃ mitrasaṃyoge sarasamputradarśane //
vakraṃ ca kāminīyoge āraktaṃ śatrudarśane

asminmama tu sarvāṇi kaluṣānīndriyāṇi ca //
ayaṃ śatrurbhavedeva māraṇīyo na saṃśayaḥ

gurośca vacanaṃ medya vartate duḥkhadastvayā //
hantavyaḥ sarvathā rājannātra kāryā vicāraṇā

etadarthaṃ tvāyudhāni mama caiva na saṃśayaḥ //
vicāryyeti ca tatraiva bāṇaṃ saṃsthāya saṃsthitaḥ

etasminnantare tatra rakṣārthaṃ hyarjunasya vai //
tadbhakteśca parīkṣārthaṃ śaṃkaro bhaktavatsalaḥ

vidagdhabhillarūpaṃ hi gaṇaiḥ sārdha mahādbhutam //
tasya daityasya nāśārthaṃ drutaṃ kṛtvā samāgataḥ

baddhakacchaśca vastrībhirvaddheśānadhvajastadā //
śarīre śvetarekhāśca dhanurbāṇayutaḥ svayam

bāṇānāntūṇakaṃ pṛṣṭhe dhṛtvā vai sa jagāma ha //
gaṇaścaiva tathā jāto bhillarājo'bhavacchivaḥ

śabdāṃśca vividhānkṛtvā niryayau vāhinīpatiḥ //
sūkarasya sasārātha śabdaśca pradiśo daśa

vanecareṇa śabdena vyākulaścārjunastadā //
parvatādyāśca taiśśabdaiste sarve vyākulāstadā

aho kinnu bhavedeṣa śivaḥ śubhakarastviha//
mayā caiva śrutampūrvaṃ kṛṣṇena kathitampunaḥ

vyāsena kathitaṃ caivaṃ smṛtvā devai stathā punaḥ //
śivaḥ śubhakaraḥ proktaḥ śivaḥ sukhakarastathā

muktidaśca svayaṃ prokto muktidānānna saṃśayaḥ //
tannāmasmaraṇātpuṃsāṃ kalyāṇaṃ jāyate dhuvam

bhajatāṃ sarvabhāvena duḥkhaṃ svapne'pi no bhavet//
yadā kadācijjāyeta tadā karmasamudbhavam

tadetadbahvapi jñeyaṃ nūnamalpaṃ na saṃśayaḥ //
prārabdhasyātha vā doṣo nūnaṃ jñeyo viśeṣataḥ

atha vā bahu cālpaṃ hi bhogyaṃ nistīrya śaṃkaraḥ //
kadācidicchayā tasya dūrīkuryyānna saṃśayaḥ //

viṣaṃ caivāmṛtaṃ kuryādamṛtaṃ viṣameva vā //
yadicchati karotyeva samarthaḥ kinniṣidhyate

itthaṃ vicāryyamāṇe'pi bhaktairanyaiḥ purātanaiḥ //
bhāvibhiśca sadā bhaktairihānīya manaḥ sthiram

lakṣmīrgaccheccāvatiṣṭhenmaraṇaṃ nikaṭe puraḥ //
nindāṃ vātha prakurvantu stutiṃ vā duḥkhasaṃkṣayam

jayate puṇyapāpābhyāṃ śaṃkarassukhadaḥ sadā //
kadācicca parīkṣārthaṃ duḥkhaṃ yacchati vai śivaḥ

aṃte ca sukhadaḥ prokto dayālutvānna saṃśayaḥ //
yathā caiva suvarṇaṃ ca śodhi taṃ śuddhatāṃ vrajet

evaṃ caivaṃ mayā pūrvaṃ śrutaṃ munimukhāttathā//
atastadbhajanenaiva lapsye'haṃ sukhamuttamam

ityevantu vicāraṃ sa karoti yāvadeva hi //
tāvacca sūkaraḥ prāpto bāṇasaṃmocanāvadhiḥ

śivopi pṛṣṭhato lagno hyāyātaḥ śūkarasya hi //
tayormadhye tadā soyaṃ dṛśyate śṛṃgamadbhutam

tasya proktaṃ ca māhātmyaṃ śivaḥ śīghrataraṃ gataḥ//
arjunasya ca rakṣārthaṃ śaṃkaro bhaktava tsalaḥ

etasminsamaye tābhyāṃ kṛtaṃ bāṇavimocanam //
śivabāṇastu pucche vai hyarjunasya mukhe tathā

śivasya pucchato gatvā mukhānnissṛtya śīghrataḥ //
bhūmau vilīnaḥ saṃyātastasya vai pucchato gataḥ

papāta pārśvataścaiva bāṇaścaivārjunasya ca//
sūkarastatkṣaṇaṃ daityo mṛto bhūmau papāta ha

devā harṣaṃ paramprāpuḥ puṣpavṛṣṭiṃ ca cakrire //
jayapūrva stutikarāḥ praṇamya ca punaḥpunaḥ

śivastuṣṭamanā āsīdarjunaḥ sukhamāgataḥ//
daityasya ca tadā dṛṣṭvā krararūpaṃ ca tau tadā

arjunastu viśeṣeṇa sukhinā prāha cetasā//
aho daityavaraścāyaṃ rūpaṃ tu paramādbhutam

kṛtvāgato madvadhārthaiṃ śivenāhaṃ surakṣitaḥ //
īśvareṇa mamādyaiva buddhirdattā na saṃśayaḥ

vicāryyetyarjunastatra jagau śivaśiveti ca //
praṇanāma śivaṃ bhūyastuṣṭāva ca punaḥ punaḥ

iti śrīśivamahāpurāṇe tṛtīyāyāṃ śatarudrasaṃhitāyāṃ kirātāvatāravarṇane mūkadaityavadhonāmaikonacatvāriṃśo'dhyāyaḥ