Shiva Purana · Chapter 3.36

nandīśvara uvāca //
sanatkumāra sarvajña śivasya paramātmanaḥ //
avatāraṃ śṛṇu vibhoraśvatthāmāhvayaṃ param

bṛhaspatermahābuddherdevarṣeraṃśato mune //
bharadvājātsamutpanno droṇo'yonija ātmavān

dhanurbhṛtāṃ varaḥ śūro viprarṣissarvaśāstravit //
bṛhatkīrtirmahātejā yaḥ sarvāstraviduttamaḥ

dhanurvede ca vede ca niṣṇātaṃ yaṃ vidurbudhāḥ//
variṣṭhaṃ citrakarmāṇaṃ droṇaṃ svakulavardhanam

kauravāṇāṃ sa ācaryyaṃ āsītsvabalato dvija //
mahārathiṣu vikhyātaḥ ṣaṭsu kauravamadhyataḥ

sāhāyyārthaṃ kauravāṇāṃ sa tepe vipulantapaḥ //
śivamuddiśya putrārthaṃ droṇācāryyo dvijottamaḥ

tataḥ prasanno bhagavācchaṃkaro bhaktavatsalaḥ//
āvirbabhūva purato droṇasya munisattama

tandṛṣṭvā sa dvijo droṇastuṣṭāvāśu praṇamya tam //
mahāprasannahṛdayo natakassukṛtāñjaliḥ

tasya stutyā ca tapasā santuṣṭaḥ śaṃkara prabhuḥ//
varambrūhīti covāca droṇantaṃ bhaktavatsalaḥ

tacchrutvā śambhuvacanaṃ droṇaḥ prāhātha sannataḥ//
svāṃśajantanayandehi sarvājeyammahābalam

tacchrutvā droṇavacanaṃ śambhuḥ proce tathāstviti //
abhūdantarhitastāta kautukī sukhakṛnmune

droṇo'pagacchatsvandhāma mahāhṛṣṭo gatabhramaḥ //
svapatnyai kathayāmāsa tadvṛtaṃ sakalaṃ mudā

athāvasaramāsādya rudraḥ sarvāntakaḥ prabhuḥ //
svāṃśena tanayo jajñe droṇasya sa mahābalaḥ/

aśvatthāmeti vikhyātastasya babhūva kṣitau mune //
pravīraḥ kaṃjapatrākṣaśśatrupakṣakṣayaṅkaraḥ

yo bhārate raṇe khyātaḥ piturājñāmavāpya ca //
sahāyakṛdbabhūvāta kauravāṇāṃ mahābalaḥ

yamāśritya mahāvīraṃ kauravāssuma hābalāḥ //
bhīṣmādayo babhūvuste'jeyā api divaukasām

yadbhayātpāṇḍavāssarve kauravāñjetumakṣamāḥ //
āsannaṣṭāmahāvīrā api sarve ca kovidāḥ

kṛṣṇopadeśataśśambhostapaḥ kṛtvātidāruṇam //
prāpya cāstraṃ śambhuvarājjigye tānarjunastataḥ

aśvatthāmā mahāvīro mahādevāṃśajo mune //
tadāpi tadbhaktivaśaḥ svapratāpamadarśayat

vināśya pāṇḍavasutāñchikṣitānapi yatnataḥ //
kṛṣṇādibhirmahāvīrairanivāryyabalaḥ paraiḥ

putraśokena vikalamāpatantaṃ tamarjunam //
rathenācyutavaṃtaṃ hi dṛṣṭvā sa ca parādravat

astraṃ brahmaśiro nāma taduparyyasṛjatsa hi //
tataḥ prādurabhūttejaḥ pracaṇḍaṃ sarvato diśam

prāṇāpadamabhiprekṣya sorjunaḥ kleśasaṃyutaḥ //
uvāca kṛṣṇaṃ viklānto naṣṭatejā mahābhayaḥ

arjuna uvāca //
kimidaṃ svitkuto veti kṛṣṇa kṛṣṇa na vedmyaham //
sarvatomukhamāyāti tejaścedaṃ sudussaham

nandīśvara uvāca //
śrutvārjunavacaścedaṃ sa kṛṣṇaśśaivasattamaḥ //
dadhyau śivaṃ sadāraṃ ca pratyāhārjunamādarāt

kṛṣṇa uvāca //
vetthedandroṇaputrasya brāhmamastraṃ maholbaṇam //
na hyasyānyatamaṃ kiñcidastraṃ pratyavakarśanam

śivaṃ smara drutaṃ śambhuṃ svaprabhumbhaktarakṣakam //
yena dattaṃ hi te svāstraṃ sarvakāryyakaramparam

jahyastrateja unnaddhantvantacchaivāstratejasā //
ityuktvā ca svayaṃ kṛṣṇaśśivandadhyau tadarthakaḥ

tacchrutvā kṛṣṇavacanaṃ pārthassmṛtvā śivaṃ hṛdi //
spṛṣṭvāpastaṃ
praṇamyāśu cikṣepāstrantato mune

yadyapyastraṃ brahmaśirastvamoghañcāpratikriyam //
śaivāstratejasā sadyassamaśāmyanmahāmune

maṃsthā mā hyetadāścaryyaṃ sarvacitramaye śive //
yassvaśaktyākhilaṃ viśvaṃ sṛjatyavati hantyajaḥ

aśvatthāmā tato jñātvā vṛttametacchivāṃśajaḥ //
śaivanna vivyathe kiñcicchivecchātuṣṭadhīrmune

atha drauṇiridaṃ viśvaṃ kṛtsnaṃ kartumapāṇḍavam//
uttarāgarbhagaṃ bālaṃ nāśitummana ādadhe

brahmāstramanivāryyaṃ tadanyairastrairmahāprabham //
uttarāgarbhamuddiśya cikṣepa sa mahāprabhuḥ

tataśca sottarā jiṣṇuvadhūrvikalamānasā //
kṛṣṇantuṣṭāva lakṣmīśandahyamānā tadastrataḥ

tataḥ kṛṣṇaḥ śivaṃ dhyātvā hṛdā nutvā praṇamya ca //
apāṇḍavamidaṃ kartuṃ drauṇerastramabudhyata

svarakṣārthendradattena tadastreṇa suvarcasā //
sudarśanena tasyāśca vyadhādrakṣāṃ śivājñayā

svarūpaṃ śaṃkarādeśātkṛtaṃ śaivavareṇa ha //
kṛṣṇena caritaṃ jñātvā vimanaskaḥ śanairabhūt

tatassa kṛṣṇaḥ prītātmā pāṇḍavānsakalānapi //
apātayattadaṃghryostu tuṣṭaye tasya śaivarāṭ

atha drauṇiḥ prasannātmā pāṇḍavānkṛṣṇameva ca //
nānāvarāndadau prītyā so'śvatthāmānugṛhya ca

itthaṃ maheśvarastāta cakre līlāmparāmprabhuḥ //
avatīryya kṣitau drauṇirūpeṇa munisattama

śivāvatāro'śvatthāmā mahābalaparākramaḥ //
trailokyamukhado'dyāpi vartate jāhnavītaṭe

aśvatthāmāvatāraste varṇitaśśaṃkara prabhoḥ //
sarvasiddhikaraścāpi bhaktābhīṣṭaphalapradaḥ

ya idaṃ śṛṇuyādbhaktyā kīrtayedvā samāhitaḥ //
sa siddhimprāpnuyādiṣṭāmante śivapuraṃ vrajet

iti śrīśivamahāpurāṇe tṛtīyāyāṃ śatarudrasaṃhitāyāmaśvatthāmaśivāvatāravarṇanaṃ nāma ṣaṭtriṃśo'dhyāyaḥ