Shiva Purana · Chapter 3.35

nandīśvara uvāca //
sanatkumāra sarvajña śivasya paramātmanaḥ//
avatāraṃ śṛṇu vibhossādhuveṣadvijāhvayam

menāhimālayorbhaktiṃ śive jñātvā mahottamām //
cintāmāpusturāssarve mantrayāmāsurādarāt

ekāntabhaktyā śailaścetkanyāṃ dāsyati śambhave //
dhruvaṃ nirvāṇatāṃ sadyaḥ samprāpsyati śivasya vai

anantaratnādhāro'sau cetprayāsyati mokṣatām //
ratnagarbhābhidhā bhūmirmithyaiva bhavitā dhruvam

asthiratvamparityajya divyarūpaṃ vidhāya saḥ //
kanyāṃ śūlabhṛte dattvā śivālokaṃ gamiṣyati

mahādevasya sārūpyaṃ prāpya śambhoranugrahāt //
tatra bhuktvā mahābhogāṃstato mokṣamavāpsyati

ityālocya surāssarve jagmurgurugṛhaṃ mune //
cakrurnivedanaṃ gatvā gurave svārthasādhakāḥ

devā ūcuḥ //
guro himālayagṛhaṃ gacchāsmatkāryyasiddhaye //
kṛtvā niṃdāṃ maheśasya giribhaktiṃ nivāraya

svaśraddhayā sutāṃ dattvā śivāya sa girirguro //
labheta muktimatraiva dharaṇyāṃ sa hi tiṣṭhatu

iti devavacaḥ śrutvā provāca ca vicāryya tān

gururuvāca //
kaścinmadhye ca yuṣmākaṃ gacchecchailāntikaṃ surāḥ //
sampādayetsvābhimatamahaṃ tatkartumakṣamaḥ

athavā gacchata surā brahmalokaṃ savāsavāḥ //
tasmai vṛttaṃ kathaya svaṃ sa vaḥ kāryaṃ kariṣyati

// nandīśvara uvāca //
tacchrutvā te samālocya jagmurvidhisabhāṃ surāḥ //
sarvaṃ nivedayāmāsustadvṛttaṃ purato vidheḥ

avocattānvidhiḥ śrutvā tadvacaḥ suviciṃtya vai //
nāhaṃ kariṣye tanniṃdāṃ duḥkhadāṃ kaharāṃ sadā

surā gacchata kailāsaṃ saṃtoṣayata śaṅkaram//
prasthāpayata taṃ devaṃ himālayagṛhaṃ prati

sa gacchedatha śaileśamātmanindāṃ karotu vai//
paranindā vināśāya svanindā yaśase matā

nandīśvara uvāca //
tataste prayayuḥ śīghraṃ kailāsaṃ nikhilāssurāḥ//
supraṇamya śivaṃ bhaktyā taddrutaṃ nikhilā jaguḥ

tacchrutvā devavacanaṃ svīcakāra maheśvaraḥ //
devānsuyāpayāmāsa tānāśvāsya vihasya saḥ

tataḥ sa bhagavāñchambhurmaheśo bhaktavatsalaḥ //
gantumaicchacchailamūlaṃ māyeśo na vikāravān

daṇḍī chatrī dibyavāsā bibhrattilakamujjvalam//
kare sphaṭikamālāṃ ca śālagrāmaṃ gale dadhat

japannāma harerbhaktyā sādhuveṣadharo dvijaḥ//
himācalaṃ jagāmāśu bandhuvargessamanvitam

taṃ ca dṛṣṭvā samuttasthau sagaṇo'pi himālayaḥ //
nanāma daṇḍavadbhūmau sāṣṭāṅgaṃ vidhipūrvakam

tataḥ papraccha śaileśastaṃ dvijaṃ ko bhavāniti //
uvāca śīghraṃ viprendrassa yogyadrimmahādarāt

sādhudvija uvāca //
sādhu dvijāhvaḥ śailāhaṃ vaiṣṇavaḥ paramārthadṛk //
paropakārī sarvajñaḥ sarvagāmī gurorbalāt

mayā jñātaṃ svavijñānātsvasthāne śailasattama//
tacchṛṇu prītito vacmi hitvā dambhantavāṃtikam

śaṅkarāya sutāndātuntvamicchasi nijodbhavām //
imāmpadmāsamāṃ ramyāmajñātakulaśīline

iyaṃ matiste śailendra na yuktā maṅgalapradā //
nibodha jñānināṃ śreṣṭha nārāyaṇakulodbhava

paśya śailādhipatvaṃ ca na tasyaiko'sti bāndhavaḥ //
bāndhavānsvānprayatnena pṛccha menāṃ ca svapriyām

sarvānsaṃpṛccha yatnena menādīnpā rvatī vinā //
rogiṇe nauṣadhaṃ śaila kupathyaṃ rocate sadā

na te pātrānurūpaśca pārvatīdānakarmmaṇi //
mahājanaḥ smeramukhaḥ śruti mātrādbhaviṣyati

nirāśrayassadāsaṅgo virūpo nigurṇo'vyayaḥ //
smaśānavāsī vikaṭo vyālagrāhī digambaraḥ

vibhūtibhūṣaṇo vyālavarāveṣṭitamastakaḥ //
sarvāśramaparibhraṣṭastvavijñātagatissadā

brahmovāca //
ityādyuktvā vacastathyaṃ śivanindāparaṃ sa hi //
jagāma svālayaṃ śīghrannānā līlākaraḥ śivaḥ

tacchrutvā vipravacanamabhūtāñca tanū tayoḥ //
viparītānarthapare kiṃ kariṣyāvahe dhruvam

tato rudro mahotiṃ ca kṛtvā bhaktamudāvahām //
vivāhayitvā girijāṃ devakāryyaṃ cakāra saḥ

iti proktastu te tāta sādhuveṣo dvijāhvayaḥ //
śivāvatāro hi mayā devakāryyakaraḥ prabho

idamākhyānamanaghaṃ svargyamāyuṣyamuttamam //
yaḥ paṭhecchṛṇuyādvāpi sa sukhī gatimāpnuyāt

iti śrīśivamahāpurāṇe tṛtīyāyāṃ śatarudrasaṃhitāyāṃ sādhudvijaśivāvatāravarṇanaṃ nāma pañcatriṃśo'dhyāyaḥ