Shiva Purana · Chapter 3.25

nandīśvara uvāca //
atha loke vyavasthāya dharmasya sthāpanecchayā //
mahālīlāṃ cakāreśastāmaho sanmune śṛṇu

ekadā puṣpabhadrāyāṃ snātuṃ gacchanmunīśvaraḥ //
dadarśa padmāṃ yuvatīṃ śivāṃśāṃ sumanoharām

tallipsustatpituḥ sthānamanaraṇyasya bhūpateḥ //
jagāma bhuvanācārī lokatattvavicakṣaṇaḥ

rājā narāṇāṃ taṃ dṛṣṭvā praṇamya ca bhayākulaḥ //
madhuparkādikaṃ dattvā pūjayāmāsa bhaktitaḥ

snehātsarvaṃ gṛhītvā sa yayāce kanyakāṃ muniḥ //
maunī babhūva nṛpatiḥ kiṃcinnirvaktumakṣamaḥ

muniḥ provāca nṛpatiṃ kanyāṃ me dehi bhaktitaḥ //
anyathā bhasmasātsarvaṃ kariṣyehaṃ tvayā saha

atho babhūvurācchannāḥ sarve rājajanāstadā //
tejasā pippalādasya dādhīcasya mahāmune

atha rājā mahābhīto vilapya ca muhurmuhuḥ //
kanyāmalaṃkṛtāmpadmāṃ vṛddhāya munaye dadau

padmāṃ vivāhya sa muniśśivāṃśāmbhūpateḥ sutām //
pippalādo gṛhītvā tāṃ muditaḥ svāśramaṃ yayau

tatra gatvā munivaro vayasā jarjarodhikaḥ //
uvāca nāryā sa tayā tapasvīnātilampaṭaḥ

atho'naraṇyakanyā sā siṣeve bhaktito munim //
karmaṇā manasā vācā lakṣmīrnārāyaṇaṃ yathā

itthaṃ sa pippalādo hi śivāṃśo munisattamaḥ //
reme tayā yuvatyā ca yuvābhūya svalīlayā

daśa putrā mahātmāno babhūvussutapasvinaḥ //
muneḥ pitussamāḥ sarve padmāyāḥ sukhavarddhanāḥ

evaṃ līlāvatāro hi śaṃkarasya mahāprabhoḥ //
pippalādo munivaro nānālīlākaraḥ prabhuḥ

yena datto varaḥ prītyā lokebhyo hi dayālunā //
dṛṣṭvā loke śaneḥ pīḍāṃ sarveṣāmanivāriṇīm

ṣoḍaśābdāvadhi nṛṇāṃ janmato na bhavecca sā //
tathā ca śivabhaktānāṃ satyametaddhi me vacaḥ

athānādṛtya madvākyaṃ kuryātpīḍāṃ śaniḥ kvacit //
teṣāṃ nṛṇāṃ tadā sa syādbhasmasānna hi saṃśayaḥ

iti tadbhayatastāta vikṛtopi śanaiścaraḥ //
teṣāṃ na kurute pīḍāṃ kadācidgrahasattamaḥ

iti līlāmanuṣyasya pippalādasya sanmune //
kathitaṃ sucaritrante sarvakāmaphalapradam

gādhiśca kauśikaścaiva pippalādo mahāmuniḥ //
śanaiścarakṛtāṃ pīḍāṃ nāśayanti smṛtāstrayaḥ

pippalādasya caritaṃ padmācaritasaṃyutam //
yaḥ paṭhecchṛṇuyādvāpi subhaktyā bhuvi mānavaḥ

śanipīḍāvināśārthametaccaritamuttamam //
yaḥ paṭhecchaṇuyādvāpi sarvānkāmānavāpnuyāt

dhanyo munivaro jñānī mahāśaivaḥ satāmpriyaḥ //
asya putro maheśānaḥ pippalādākhya ātmavān

idamākhyānamanaghaṃ svargyaṃ kugrahapoṣahṛt //
sarvakāmapradantāta śivabhaktivivarddhanam

iti śrīśivamahāpurāṇe tṛtīyāyāṃ śatarudrasaṃhitāyāṃ pippalādāvatāracaritavarṇanaṃ nāma paṃcaviṃśo'dhyāyaḥ