શિવ પુરાણ · અધ્યાય 3.25

નન્દીશ્વર ઉવાચ ॥
અથ લોકે વ્યવસ્થાય ધર્મસ્ય સ્થાપનેચ્છયા ॥
મહાલીલાં ચકારેશસ્તામહો સન્મુને શૃણુ

એકદા પુષ્પભદ્રાયાં સ્નાતું ગચ્છન્મુનીશ્વરઃ ॥
દદર્શ પદ્માં યુવતીં શિવાંશાં સુમનોહરામ્

તલ્લિપ્સુસ્તત્પિતુઃ સ્થાનમનરણ્યસ્ય ભૂપતેઃ ॥
જગામ ભુવનાચારી લોકતત્ત્વવિચક્ષણઃ

રાજા નરાણાં તં દૃષ્ટ્વા પ્રણમ્ય ચ ભયાકુલઃ ॥
મધુપર્કાદિકં દત્ત્વા પૂજયામાસ ભક્તિતઃ

સ્નેહાત્સર્વં ગૃહીત્વા સ યયાચે કન્યકાં મુનિઃ ॥
મૌની બભૂવ નૃપતિઃ કિંચિન્નિર્વક્તુમક્ષમઃ

મુનિઃ પ્રોવાચ નૃપતિં કન્યાં મે દેહિ ભક્તિતઃ ॥
અન્યથા ભસ્મસાત્સર્વં કરિષ્યેહં ત્વયા સહ

અથો બભૂવુરાચ્છન્નાઃ સર્વે રાજજનાસ્તદા ॥
તેજસા પિપ્પલાદસ્ય દાધીચસ્ય મહામુને

અથ રાજા મહાભીતો વિલપ્ય ચ મુહુર્મુહુઃ ॥
કન્યામલંકૃતામ્પદ્માં વૃદ્ધાય મુનયે દદૌ

પદ્માં વિવાહ્ય સ મુનિશ્શિવાંશામ્ભૂપતેઃ સુતામ્ ॥
પિપ્પલાદો ગૃહીત્વા તાં મુદિતઃ સ્વાશ્રમં યયૌ

તત્ર ગત્વા મુનિવરો વયસા જર્જરોધિકઃ ॥
ઉવાચ નાર્યા સ તયા તપસ્વીનાતિલમ્પટઃ

અથોઽનરણ્યકન્યા સા સિષેવે ભક્તિતો મુનિમ્ ॥
કર્મણા મનસા વાચા લક્ષ્મીર્નારાયણં યથા

ઇત્થં સ પિપ્પલાદો હિ શિવાંશો મુનિસત્તમઃ ॥
રેમે તયા યુવત્યા ચ યુવાભૂય સ્વલીલયા

દશ પુત્રા મહાત્માનો બભૂવુસ્સુતપસ્વિનઃ ॥
મુનેઃ પિતુસ્સમાઃ સર્વે પદ્માયાઃ સુખવર્દ્ધનાઃ

એવં લીલાવતારો હિ શંકરસ્ય મહાપ્રભોઃ ॥
પિપ્પલાદો મુનિવરો નાનાલીલાકરઃ પ્રભુઃ

યેન દત્તો વરઃ પ્રીત્યા લોકેભ્યો હિ દયાલુના ॥
દૃષ્ટ્વા લોકે શનેઃ પીડાં સર્વેષામનિવારિણીમ્

ષોડશાબ્દાવધિ નૃણાં જન્મતો ન ભવેચ્ચ સા ॥
તથા ચ શિવભક્તાનાં સત્યમેતદ્ધિ મે વચઃ

અથાનાદૃત્ય મદ્વાક્યં કુર્યાત્પીડાં શનિઃ ક્વચિત્ ॥
તેષાં નૃણાં તદા સ સ્યાદ્ભસ્મસાન્ન હિ સંશયઃ

ઇતિ તદ્ભયતસ્તાત વિકૃતોપિ શનૈશ્ચરઃ ॥
તેષાં ન કુરુતે પીડાં કદાચિદ્ગ્રહસત્તમઃ

ઇતિ લીલામનુષ્યસ્ય પિપ્પલાદસ્ય સન્મુને ॥
કથિતં સુચરિત્રન્તે સર્વકામફલપ્રદમ્

ગાધિશ્ચ કૌશિકશ્ચૈવ પિપ્પલાદો મહામુનિઃ ॥
શનૈશ્ચરકૃતાં પીડાં નાશયન્તિ સ્મૃતાસ્ત્રયઃ

પિપ્પલાદસ્ય ચરિતં પદ્માચરિતસંયુતમ્ ॥
યઃ પઠેચ્છૃણુયાદ્વાપિ સુભક્ત્યા ભુવિ માનવઃ

શનિપીડાવિનાશાર્થમેતચ્ચરિતમુત્તમમ્ ॥
યઃ પઠેચ્છણુયાદ્વાપિ સર્વાન્કામાનવાપ્નુયાત્

ધન્યો મુનિવરો જ્ઞાની મહાશૈવઃ સતામ્પ્રિયઃ ॥
અસ્ય પુત્રો મહેશાનઃ પિપ્પલાદાખ્ય આત્મવાન્

ઇદમાખ્યાનમનઘં સ્વર્ગ્યં કુગ્રહપોષહૃત્ ॥
સર્વકામપ્રદન્તાત શિવભક્તિવિવર્દ્ધનમ્

ઇતિ શ્રીશિવમહાપુરાણે તૃતીયાયાં શતરુદ્રસંહિતાયાં પિપ્પલાદાવતારચરિતવર્ણનં નામ પંચવિંશોઽધ્યાયઃ