Shiva Purana · Chapter 3.18

nandīśvara uvāca//
ekādaśavatārānvai śṛṇvatho śāṃkarānvarān //
yāñchrutvā na hi bādhyeta bādhāsatyādisambhavā

purā sarve surāśśakramukhā daityaparājitāḥ //
tyaktvāmarāvatīmbhītyā'palāyanta nijāmpurīm

daityaprapīḍitā devā jagmuste kaśyapā ntikam //
baddhvā karānnataskandhāḥ praṇemustaṃ suvihvalam

sunutvā taṃ surāssarvve kṛtvā vijñaptimādarāt //
sarvaṃ nivedayāmā ssvaduḥkhantatparājayam

tatassa kaśyapastāta tatpitā śivasaktadhīḥ //
tadākarṇyāmarākaṃ vai dukhitobhūnna cādhikam

tānāśvāsya munisso'tha dhairyamādhāya śāntadhīḥ //
kāśīṃ jagāma suprītyā viśveśvarapurīmmune

gaṃgāmbhasi tataḥ snātvā kṛtvā taṃ vidhimādarāt //
viśveśvaraṃ samānarca sāmbaṃ sarveśvaramprabhum

śivaliṃgaṃ susaṃsthāpya cakāra vipulantapaḥ //
śambhumuddiśya suprītyā devānāṃ hitakāmyayā

mahānkālo vyatīyāya tapatastasya vai muneḥ //
śivapādāmbujāsaktamanaso dhairyyaśālinaḥ

atha prādurabhūcchambhurvarandātuntadarṣaye //
svapadāsaktamanase dīnabandhussatāṃgatiḥ

varambrūhīti covāca suprasanno maheśvaraḥ //
kaśyapaṃ muniśārdūlaṃ svabhaktaṃ bhaktavatsalaḥ // १ १//
dṛṣṭvātha taṃ maheśānaṃ sa praṇamya kṛtāñjaliḥ //
tuṣṭāva kaśyapo hṛṣṭo devatātaḥ prasa nnadhīḥ

kaśyapa uvāca //
devadeva maheśāna śaraṇāgatavatsala //
sarveśvaraḥ parātmā tvaṃ dhyānagamyodvayo'vyayaḥ

balanigraha kartā tvaṃ maheśvara satāṃ gatiḥ //
dīnabandhurdayāsindhurbhaktarakṣaṇadakṣadhīḥ

ete surāstvadīyā hi tvadbhaktāśca viśeṣataḥ //
daityaiḥ parājitāścātha pāhi tānduḥkhitān prabho

asamartho rameśopi duḥkhadaste muhurmuhuḥ //
ataḥ surā maccharaṇā vedayanto'sukhaṃ ca tat

tadarthaṃ devadeveśa devaduḥkhavināśakaḥ //
tatpūrituṃ taponiṣṭhāṃ prasannārthaṃ tavāsadam

śaraṇaṃ te prapanno'smi sarvathāhaṃ maheśvara //
kāmaṃ me pūraya svāmindevaduḥkhaṃ vināśaya

putraduḥkhaiśca deveśa duḥkhito'haṃ viśeṣataḥ //
sukhinaṃ kuru māmīśa sahāya stvandivaukasām

bhūtvā mama suto nātha devā yakṣāḥ parājitāḥ //
daityairmahābalaiśśambho surānandaprado bhava

sadaivāstu maheśāna sarvalekhasahāyakaḥ //
yathā daityakṛtā bādhā na bādheta surānprabho

naṃdīśvara uvāca //
ityuktassa tu sarveśastatheti procya śaṃkaraḥ //
paśyatastasya bhagavāṃstatraivāṃtardadhe haraḥ

kaśyapo'pi mahāhṛṣṭaḥ svasthānamagamaddrutam //
deveśaḥ kathayāmāsa sarvavṛttāntamādarāt

tatassa śaṃkaraśśarvassatyaṃ kartuṃ svakaṃ vacaḥ //
surabhyāṃ kaśyapājjajñe ekādaśasvarūpavān

mahotsavastadāsīdve sarvaṃ śivamayaṃ tvabhūt //
āsanhṛṣṭāḥ surāścātha muninā kaśyapena ca

kapālī १ piṃgalo २ bhīmo ३ virūpākṣo ४ vilohitaḥ ५ //
śāstā' ६ japāda ७ hirbudhnya ८ śśaṃbhu ९ ścaṇḍo १० bhavastathā ११

ekādaśaite rudrāstu surabhatinayāḥ smṛtāḥ //
devakāryyārthamutpannāśśivarūpāssukhāspadam

te rudrāḥ kāśyapā vīrā mahābalaparākramāḥ //
daityāñjaghnuśca saṃgrāme devasāhāyyakāriṇaḥ

tadrudrakṛpayā devā daityāñjitvā ca nirbhayāḥ //
cakru- svarājyaṃ sarve te śakrādyāssvasthamānasāḥ

adyāpi te mahārudrāssarve śivasvarūpakāḥ //
devānāṃ rakṣaṇārthāya virājante sadā divi

aiśānyāmpuri te vāsaṃ cakrire bhaktavatsalāḥ //
viramante sadā tatra nānālīlāviśāradāḥ

teṣāmanucarā rudrāḥ koṭiśaḥ parikīrtitāḥ //
sarvatra saṃsthitāstatra trilokeṣvabhibhāgaśaḥ

iti te varṇitāstātāvatārāśśaṃkarasya vai //
ekādaśamitā rudrāssarvalokasukhāvahāḥ

idamākhyānamamalaṃ sarvapāpapraṇāśakam //
dhanyaṃ yaśasyamāyuṣyaṃ sarvakāmapradāyakam

ya idaṃ śṛṇuyāttāta śrāvayedvai samāhitaḥ //
iha sarvasukhambhuktvā tato muktiṃ labheta saḥ

iti śrīśivamahāpurāṇe tṛtīyāyāṃ śatarudrasaṃhitāyāṃ ekādaśāvatāravarṇanaṃ nāmāṣṭādaśo'dhyāyaḥ