શિવ પુરાણ · અધ્યાય 3.18

નન્દીશ્વર ઉવાચ॥
એકાદશવતારાન્વૈ શૃણ્વથો શાંકરાન્વરાન્ ॥
યાઞ્છ્રુત્વા ન હિ બાધ્યેત બાધાસત્યાદિસમ્ભવા

પુરા સર્વે સુરાશ્શક્રમુખા દૈત્યપરાજિતાઃ ॥
ત્યક્ત્વામરાવતીમ્ભીત્યાઽપલાયન્ત નિજામ્પુરીમ્

દૈત્યપ્રપીડિતા દેવા જગ્મુસ્તે કશ્યપા ન્તિકમ્ ॥
બદ્ધ્વા કરાન્નતસ્કન્ધાઃ પ્રણેમુસ્તં સુવિહ્વલમ્

સુનુત્વા તં સુરાસ્સર્વ્વે કૃત્વા વિજ્ઞપ્તિમાદરાત્ ॥
સર્વં નિવેદયામા સ્સ્વદુઃખન્તત્પરાજયમ્

તતસ્સ કશ્યપસ્તાત તત્પિતા શિવસક્તધીઃ ॥
તદાકર્ણ્યામરાકં વૈ દુખિતોભૂન્ન ચાધિકમ્

તાનાશ્વાસ્ય મુનિસ્સોઽથ ધૈર્યમાધાય શાન્તધીઃ ॥
કાશીં જગામ સુપ્રીત્યા વિશ્વેશ્વરપુરીમ્મુને

ગંગામ્ભસિ તતઃ સ્નાત્વા કૃત્વા તં વિધિમાદરાત્ ॥
વિશ્વેશ્વરં સમાનર્ચ સામ્બં સર્વેશ્વરમ્પ્રભુમ્

શિવલિંગં સુસંસ્થાપ્ય ચકાર વિપુલન્તપઃ ॥
શમ્ભુમુદ્દિશ્ય સુપ્રીત્યા દેવાનાં હિતકામ્યયા

મહાન્કાલો વ્યતીયાય તપતસ્તસ્ય વૈ મુનેઃ ॥
શિવપાદામ્બુજાસક્તમનસો ધૈર્ય્યશાલિનઃ

અથ પ્રાદુરભૂચ્છમ્ભુર્વરન્દાતુન્તદર્ષયે ॥
સ્વપદાસક્તમનસે દીનબન્ધુસ્સતાંગતિઃ

વરમ્બ્રૂહીતિ ચોવાચ સુપ્રસન્નો મહેશ્વરઃ ॥
કશ્યપં મુનિશાર્દૂલં સ્વભક્તં ભક્તવત્સલઃ ॥ ૧ ૧॥
દૃષ્ટ્વાથ તં મહેશાનં સ પ્રણમ્ય કૃતાઞ્જલિઃ ॥
તુષ્ટાવ કશ્યપો હૃષ્ટો દેવતાતઃ પ્રસ ન્નધીઃ

કશ્યપ ઉવાચ ॥
દેવદેવ મહેશાન શરણાગતવત્સલ ॥
સર્વેશ્વરઃ પરાત્મા ત્વં ધ્યાનગમ્યોદ્વયોઽવ્યયઃ

બલનિગ્રહ કર્તા ત્વં મહેશ્વર સતાં ગતિઃ ॥
દીનબન્ધુર્દયાસિન્ધુર્ભક્તરક્ષણદક્ષધીઃ

એતે સુરાસ્ત્વદીયા હિ ત્વદ્ભક્તાશ્ચ વિશેષતઃ ॥
દૈત્યૈઃ પરાજિતાશ્ચાથ પાહિ તાન્દુઃખિતાન્ પ્રભો

અસમર્થો રમેશોપિ દુઃખદસ્તે મુહુર્મુહુઃ ॥
અતઃ સુરા મચ્છરણા વેદયન્તોઽસુખં ચ તત્

તદર્થં દેવદેવેશ દેવદુઃખવિનાશકઃ ॥
તત્પૂરિતું તપોનિષ્ઠાં પ્રસન્નાર્થં તવાસદમ્

શરણં તે પ્રપન્નોઽસ્મિ સર્વથાહં મહેશ્વર ॥
કામં મે પૂરય સ્વામિન્દેવદુઃખં વિનાશય

પુત્રદુઃખૈશ્ચ દેવેશ દુઃખિતોઽહં વિશેષતઃ ॥
સુખિનં કુરુ મામીશ સહાય સ્ત્વન્દિવૌકસામ્

ભૂત્વા મમ સુતો નાથ દેવા યક્ષાઃ પરાજિતાઃ ॥
દૈત્યૈર્મહાબલૈશ્શમ્ભો સુરાનન્દપ્રદો ભવ

સદૈવાસ્તુ મહેશાન સર્વલેખસહાયકઃ ॥
યથા દૈત્યકૃતા બાધા ન બાધેત સુરાન્પ્રભો

નંદીશ્વર ઉવાચ ॥
ઇત્યુક્તસ્સ તુ સર્વેશસ્તથેતિ પ્રોચ્ય શંકરઃ ॥
પશ્યતસ્તસ્ય ભગવાંસ્તત્રૈવાંતર્દધે હરઃ

કશ્યપોઽપિ મહાહૃષ્ટઃ સ્વસ્થાનમગમદ્દ્રુતમ્ ॥
દેવેશઃ કથયામાસ સર્વવૃત્તાન્તમાદરાત્

તતસ્સ શંકરશ્શર્વસ્સત્યં કર્તું સ્વકં વચઃ ॥
સુરભ્યાં કશ્યપાજ્જજ્ઞે એકાદશસ્વરૂપવાન્

મહોત્સવસ્તદાસીદ્વે સર્વં શિવમયં ત્વભૂત્ ॥
આસન્હૃષ્ટાઃ સુરાશ્ચાથ મુનિના કશ્યપેન ચ

કપાલી ૧ પિંગલો ૨ ભીમો ૩ વિરૂપાક્ષો ૪ વિલોહિતઃ ૫ ॥
શાસ્તાઽ ૬ જપાદ ૭ હિર્બુધ્ન્ય ૮ શ્શંભુ ૯ શ્ચણ્ડો ૧૦ ભવસ્તથા ૧૧

એકાદશૈતે રુદ્રાસ્તુ સુરભતિનયાઃ સ્મૃતાઃ ॥
દેવકાર્ય્યાર્થમુત્પન્નાશ્શિવરૂપાસ્સુખાસ્પદમ્

તે રુદ્રાઃ કાશ્યપા વીરા મહાબલપરાક્રમાઃ ॥
દૈત્યાઞ્જઘ્નુશ્ચ સંગ્રામે દેવસાહાય્યકારિણઃ

તદ્રુદ્રકૃપયા દેવા દૈત્યાઞ્જિત્વા ચ નિર્ભયાઃ ॥
ચક્રુ- સ્વરાજ્યં સર્વે તે શક્રાદ્યાસ્સ્વસ્થમાનસાઃ

અદ્યાપિ તે મહારુદ્રાસ્સર્વે શિવસ્વરૂપકાઃ ॥
દેવાનાં રક્ષણાર્થાય વિરાજન્તે સદા દિવિ

ઐશાન્યામ્પુરિ તે વાસં ચક્રિરે ભક્તવત્સલાઃ ॥
વિરમન્તે સદા તત્ર નાનાલીલાવિશારદાઃ

તેષામનુચરા રુદ્રાઃ કોટિશઃ પરિકીર્તિતાઃ ॥
સર્વત્ર સંસ્થિતાસ્તત્ર ત્રિલોકેષ્વભિભાગશઃ

ઇતિ તે વર્ણિતાસ્તાતાવતારાશ્શંકરસ્ય વૈ ॥
એકાદશમિતા રુદ્રાસ્સર્વલોકસુખાવહાઃ

ઇદમાખ્યાનમમલં સર્વપાપપ્રણાશકમ્ ॥
ધન્યં યશસ્યમાયુષ્યં સર્વકામપ્રદાયકમ્

ય ઇદં શૃણુયાત્તાત શ્રાવયેદ્વૈ સમાહિતઃ ॥
ઇહ સર્વસુખમ્ભુક્ત્વા તતો મુક્તિં લભેત સઃ

ઇતિ શ્રીશિવમહાપુરાણે તૃતીયાયાં શતરુદ્રસંહિતાયાં એકાદશાવતારવર્ણનં નામાષ્ટાદશોઽધ્યાયઃ