Shiva Purana · Chapter 3.17

śṛṇvatho giriśasyādyāvatārān daśasaṃkhyakān //
mahākalamukhān bhaktyopāsanākāṇḍasevitān

tatrādyo hi mahākālo bhuktimuktipradassatām //
śaktistatra mahākālī bhaktepsitaphalapradā

tāranāmā dvitīyaśca tārā śaktistathaiva sā //
bhuktimuktipradau cobhau svasevakasukhapradau

bhuvaneśo hi bālāhvastṛtīyaḥ parikīrtitaḥ //
bhuvaneśī śivā tatra bālāhvā sukhadā satām

śrīvidyeśaḥ ṣoḍaśāhvaḥ śrīrvidyā ṣoḍaśī śivā //
caturtho bhakta sukhado bhuktimuktiphalapradaḥ

pañcamo bhairavaḥ khyātaḥ sarvadā bhaktakāmadaḥ //
bhairavī girijā tatra sadupāsakakāmadā

chinnamastakanāmāsau śivaḥ ṣaṣṭhaḥ prakīrtitaḥ //
bhaktakāmapradā caiva girijā chinnamastakā

dhūmavān saptamaḥ śambhussarvakāmaphalapradaḥ //
dhūmavatī śivā tatra sadupāsakakāmadā

śivāvatāraḥ sukhado hyaṣṭamo bagalāmukhaḥ //
śaktistatra mahānandā vikhyātā bagalāmukhī

śivāvatāro mātaṅgo navamaḥ parikīrtitaḥ //
mātaṃgī tatra śarvāṇī sarvakāmaphalapradā

daśamaḥ kamalaḥ śambhurbhuktimuktiphalapradaḥ //
kamalā girijā tatra svabhaktaparipālinī

ete daśamitāḥ śaivā avatārāssukhapradāḥ //
bhuktimuktipradāścaiva bhaktānāṃ sarvadāssatām

ete daśāvatārā hi śaṃkarasya mahātmanaḥ //
nānāsukhapradā nityaṃ sevatāṃ nirvikārataḥ // १ ३//
etaddaśāvatārāṇāṃ māhātmyaṃ varṇitaṃ mune //
sarvakāmapradaṃ jñeyaṃ taṃtraśāstrādigarbhitam

etāsāmādiśaktīnāmadbhuto mahimā mune //
sarvakāmaprado jñeyastatraṃśāstrādigarbhitaḥ

śatrumāraṇakāryyādau tattacchaktiḥ parā matā //
khala daṇḍakarī nityambrahmatejovivarddhinī

ityuktāste mayā brahmannavatārā maheśituḥ//
saśaktikā daśamitā mahākālamukhāśśubhāḥ

śaivaparvasu sarveṣu yo'dhīte bhaktitatparaḥ //
etadākhyānamamalaṃ sotiśambhupriyo bhavet

brahmaṇo brahmavarcasvī kṣatriyo vijayī bhaveta //
dhanādhipo hi vaiśyaḥ syācchūdraḥ sukhamavāpnuyāt

śāṃkarā nijadharmasthāḥ śṛṇvantaścaritantvidam//
sukhinaḥ syurviśeṣeṇa śivabhaktā bhavantu ca

iti śrīśivamahāpurāṇe tṛtīyāyāṃ śatarudrasaṃhitāyāṃ śivadaśāvatāravarṇanaṃ nāma saptadaśo'dhyāyaḥ //१७/