Shiva Purana · Chapter 3.13

( atha gṛhapatyavatārakathā //)
nandīśvara uvāca //
śṛṇu brahmasuta prītyā caritaṃ śaśimaulinaḥ //
so'vatīrṇo yathā prītyā viśvānaragṛhe śivaḥ

nāmnā gṛhapatiḥ so'bhūdagnilokapatirmune //
agnirūpastejasaśca sarvvātmā paramaḥ prabhuḥ

narmadāyāstaṭe ramye pure narmapure purā //
purāribhaktaḥ puṇyātmā bhavadviśvānaro muniḥ

brahmacaryyāśrame niṣṭho brahmayajñaratassadā //
śāṇḍilyagotraḥ śucimānbrahmatejo nidhirvvaśī

vijñātākhilaśāstrārthassadācāraratassadā //
śaivācārapravīṇo'ti laukikācāravidvaraḥ

citte vicāryya gṛhiṇīguṇānviśvānaraḥ śubhān //
uduvāha vidhānena svocitāṃ kālakanyakām

agniśuśrūṣaṇarataḥ pañcayajñaparāyaṇaḥ //
ṣaṭkarmanirato nityaṃ devapitratithipriyaḥ

evambahutithe kāle gate tasyāgrajanmanaḥ //
bhāryyā śuciṣmatī nāma bhartāramprāha suvratā

nātha bhogā mayā sarve bhuktā vai tvatprasādataḥ //
strīṇāṃ samucitā ye syustvāṃ sametya mudāvahāḥ

evamme prārthitannātha cirāya hṛdi saṃsthitam //
gṛhasthānāṃ samucitaṃ tvametaddātumarhasi

viśvānara uvāca ///
kimadeyaṃ hi suśroṇi tava priyahitaiṣiṇī //
tatprārthaya mahābhāge prayacchāmyavilambitam

maheśituḥ prasādena mama kiñcinna durlabham //
ihāmutra ca kalyāṇi sarvakalyāṇakāriṇaḥ

nandīśvara uvāca //
ityākarṇya vacaḥ patyustasya sā patidevatā //
uvāca hṛṣyadvadanā karau baddhvā vinītikā

śuciṣmatyuvāca //
varayogyāsmi cennātha yadi deyo varo mama //
maheśasadṛśamputrandehi nānyaṃ varaṃ vṛṇe

// nandīśvara uvāca //
iti tasyā vacaḥ śrutvā brāhmaṇassa śucivrataḥ //
kṣaṇaṃ samādhimādhāya hṛdyetatsamacintayat

aho kiṃ me tayā tanvyā prārthitaṃ hyatidurlabham //
manorathapathāddūramastu vā sa hi sarvvakṛt

tenaivāsyā mukhe sthitvā vāksvarūpeṇa śambhunā //
vyāhṛtaṃ ko'nyathā karttumu tsaheta bhavedidam

nandīśvara uvāca //
iti sañciṃtya sa munirviśvānara udāradhīḥ //
tataḥ provāca tāmpatnīmekapatnīvrate sthitaḥ

nandīśvara uvāca //
itthamāśvāsya tāmpatnīñjagāma tapase muniḥ //
yatra viśveśvaraḥ sākṣātkāśīnātho'dhi tiṣṭhati

prāpya vārāṇasīṃ tūrṇaṃ dṛṣṭvā tāmmaṇikarṇikām //
tatyāja tāpatritayamapi janmaśatārjitam

dṛṣṭvā sarvāṇi liṃgāni viśveśapramukhāni ca //
snātvā sarveṣu kuṇḍeṣu vāpīkūpasarassu ca

natvā vināyakānsarvāngaurīṃ śarvāṃ praṇamya ca //
sampūjya kālarājañca bhairavampāpabhakṣaṇam

daṇḍanāyakamukhyāṃśca gaṇānstutvā prayatnataḥ //
ādikeśavamukhyāṃśca keśavamparitoṣya ca

lokārkamukhasūryāṃśca praṇamya sa punaḥpunaḥ //
kṛtvā ca piṇḍadānāni sarvatīrtheṣvatandritaḥ

sahasrabhojanādyaiśca munīnviprānpratarpya ca //
mahāpūjopacāraiśca liṃgānyabhyarcya bhaktitaḥ

asakṛccintayāmāsa kiṃ liṃgaṃ kṣiprasiddhidam //
yatra niścalatāmeti tapastanayakāmyayā

kṣaṇaṃ vicāryya sa muniriti viśvānarassudhīḥ //
kṣipramputrapradaṃ liṃgaṃ vīreśampraśaśaṃsa ha //

asaṃkhyātāssahasrāṇi siddhāḥ siddhiṃ gatāstataḥ //
siddhaliṃgamiti khyātantasmādvīreśvaramparam

vīreśvarammahāliṃgamabdamabhyarcya bhaktitaḥ //
āyurmanorathaṃ sarvaṃ putrādikamanekaśaḥ

ahamapyatra vīreśaṃ samārādhya trikālatāḥ //
āśu putramavāpsyāmi yathābhilaṣitaṃ striyā

nandīśvara uvāca //
iti kṛtvā matindhīro vipro viśvānaraḥ kṛtī //
candrakūpajale snātvā jagrāha niyamaṃ vratī

ekāhāro'bhavanmāsaṃ māsaṃ naktāśano'bhavat //
ayācitāśano māsammāsantyaktāśanaḥ punaḥ

payovrato'bhavanmāsammāsaṃ śākaphalāśanaḥ //
māsammuṣṭitilāhāro māsaṃ pānīyabhojanaḥ

pañcagavyāśano māsammāsañcāndrāyaṇavratī //
māsaṃ kuśāgrajalabhugmāsaṃ śvasanabhakṣaṇaḥ

evamabdamitaṃ kālantatāpa sa tapo'dbhutam //
trikālamarcayadbhaktyā vīreśaṃ liṅgamuttamam

atha trayodaśe māsi snātvā tripathagāmbhasi //
pratyūṣa eva vīreśaṃ yāvadāyāti sa dvijaḥ

tāvadvilokayāñcakre madhye liṃgantapodhanaḥ //
vibhūtibhūṣaṇambālamaṣṭavarṣākṛtiṃ śiśum

ākarṇāyatanetrañca suraktadaśanacchadam //
cārupiṃgajaṭāmauli nnagnaprahasitānanam

śaiśavocitanepathyadhāriṇañcitidhāriṇam //
paṭhantaṃ śrutisūktāni hasantaṃ ca svalīlayā

tamālokya mudamprāpya romakañcukito muniḥ //
proccacāra hṛdālāpānnamostviti punaḥ punaḥ

abhilāṣapradaiḥ padyairaṣṭabhirbālarūpiṇam //
tuṣṭāva paramānandaṃ śaṃbhuṃ viśvānaraḥ kṛtī

// viśvānara uvāca //
ekambrahmaivādvitīyaṃ samastaṃ satyaṃsatyaṃ neha nānāsti kiñcit//
eko rudro na dvitīyo'vatasthe tasmādekantvāmprapadye maheśam

kartā harttā tvaṃ hi sarvasya śambho nānārūpeṣvekarūpo'pyarūpaḥ//
yadvatpratyagdharma eko'pyanekastasmānnānyantvāṃ vineśamprapadye

rajjo sarpaśśuktikāyāṃ ca raupyaṃ nairaḥ pūrastanmṛgākhye marīcau //
yadyatsadvadviṣvageva prapañco yasmiñjñāte tamprapadye maheśam

toye śaityaṃ dāhakatvaṃ ca vahnau tāpo bhānau śītabhānau prasādaḥ//
puṣpe gandho dugdhamadhye'pi sarpiryattacchaṃbho tvaṃ tatastvāmprapadye

śabdaṃ gṛhṇāsyaśravāstvaṃ hi jighrasyaprāṇastvaṃ tryaṃghrirāyāsi dūrāt //
tryakṣaḥ paśyestvaṃ rasajño'pyajihvaḥ kastvāṃ samyagvettyatastvāmprapadye

no veda tvāmīśa sākṣāddhi vedo no vā viṣṇurno vidhātākhilasya//
no yogīndrānendramukhyāśca devā bhakto vedastvāmatastvāmprapadye

no te gotraṃ no sajanmāpi nāśo no vā rūpaṃ naiva śīlanna deśaḥ //
itthambhūto'pīśvarastvaṃ trilokyāssarvānkāmānpūrayestvaṃ bhaje tvām

tvattassarvaṃ tvaṃ hi sarvaṃ smarāre tvaṃ gaurīśastvaṃ ca nagno'tiśāntaḥ //
tvaṃ vai vṛddhastvaṃ yuvā tvaṃ ca bālastattvaṃ yatkiṃ nānyatastvāṃ nato'ham

nandīśvara uvāca //
stutveti vipro nipapāta bhūmau saṃbaddhapāṇirbhavatīha yāvat//
tāvatsa bālo'ribalavṛddhavṛddhaḥ provāca bhūdevamatīva hṛṣṭaḥ

bāla uvāca //
viśvānara muniśreṣṭha bhūdevāhaṃ tvayādya vai//
toṣitassuprasannātmā vṛṇīṣva varamuttamam

tata utthāya hṛṣṭātmā munirviśvānaraḥ kṛtī//
pratyabravīnmuniśreṣṭhaḥ śaṃkarambālarūpiṇam

viśvānara uvāca //
maheśvara kimajñātaṃ sarvajñasya tava prabho //
sarvāntarātmā bhagavāccharvassarvvaprado bhavān

yācñāmprati niyuktammāṃ kiṃ brūṣe dainyakāriṇīm //
iti jñātvā maheśāna yathecchasi tathā kuru

nandīśvara uvāca //
iti śrutvā vacastasya devo viśvānarasya hi //
śuciśśucivratasyātha śucismitvābravīcchiśuḥ

tvayā śuce śuciṣmatyāṃ yo'bhilāṣaḥ kṛto hṛdi //
acireṇaiva kālena sa bhaviṣyatyasaṃśayam

tava putratvameṣyāmi śuciṣmatyāṃ mahāmate//
khyāto gṛhapatirnāmnā śucissarvvāmarapriyaḥ

abhilāṣāṣṭakaṃ puṇyaṃ stotrametattvayeritam //
abdatrikālapaṭhanātkāmadaṃ śivasannidhau

etatstotraprapaṭhanaṃ putrapautradhanapradam //
sarvvaśāntikaraścāpi sarvvāpattivināśanam

svargāpavargasampattikārakannātra saṃśayaḥ //
sarvvastotrasamaṃ hyetatsarvvakāmapradaṃ sadā

prātarutthāya susnāto liṃgamabhyarcya śāmbhavam //
varṣaṃ japannidaṃ stotramaputraḥ putravānbhavet

abhilāṣāṣṭakamidanna deyaṃ yasya kasyacit //
gopanīyaṃ prayatnena mahāvandhyāprasūtikṛt

striyā vā puruṣeṇāpi niyamālliṃgasannidhau //
abdajaptamidaṃ stotramputradannātra saṃśayaḥ

nandīśvara uvāca //
ityuktvāntardadhe śambhurbālarūpaḥ satāṃ gatiḥ//
so'pi viśvānaro vipro hṛṣṭātmā svagṛhaṃ yayau

iti śrīśivamahāpurāṇe tṛtīyāyāṃ rudrasaṃhitāyāṃ gṛhapatyavatāvarṇanaṃnāma trayodaśo'dhyāyaḥ