Shiva Purana · Chapter 3.12

sanatkumāra uvāca //
nandīśvara mahāprājña vijñātantadanantaram //
mamopari kṛpāṃ kṛtvā prītyā tvantadvadādhunā

nandīśvara uvāca//
ityukto vīrabhadreṇa nṛsiṃhaḥ krodhavihvalaḥ //
ninadannanu vegena taṃ grahītumpracakrame

atrāntare mahāghoraṃ pratyakṣabhayakāraṇam //
gaganavyāpi durdharṣaṃ śaivatejassamudbhavam

vīrabhadrasya tadrūmadṛśyantu tataḥ kṣaṇāt //
tadvai hiraṇmayaṃ saumyaṃ na saurannāgnisambhavam

na taḍiccandrasadṛśamanaupamyammaheśvaram //
tadā tejāṃsi sarvāṇi tasmim̐llīnāni śaṃkare

na tadvyoma mahattejo vyaktāntaścābhavattataḥ //
rudrasādhāraṇaṃ caiva cihnitaṃ vikṛtākṛti

tatassaṃhārarūpeṇa suvyaktaṃ parameśvaraḥ //
paśyatāṃ sarvadevānāṃ jayaśabdādimaṃgalaiḥ

sahasrabāhurjaṭilaścandrārddhakṛtaśekharaḥ //
samṛddhograśarīreṇa pakṣābhyāñcañcunā dvijaḥ

atitīkṣṇo mahādaṃṣṭro vajratulyanakhāyudhaḥ //
kaṇṭhe kālo mahābāhuścatuṣpādvahnisannibhaḥ

yugāntodyatajīmūtabhīmagambhīranisvanaḥ//
mahākupitakṛtyāgnivyāvṛttanayanatrayaḥ

spaṣṭadaṃṣṭrādharoṣṭhaśca huṃkārasaṃyuto haraḥ //
īdṛgvidhasvarūpaśca hyugra āvirbabhūva ha

aristaddarśanādeva vinaṣṭabalavikramaḥ //
bibhraddhāma sahasrāṃśoradhaḥ khadyotavibhramam

atha vibhramya pakṣābhyāṃ nābhipādānvidārayan //
pādānbabaṃdha pucchena bāhubhyāmbāhu maṇḍalam

bhindannurasi bāhubhyānnijagrāha haro harim //
tato jagāma gaganandevaissaha maharṣibhiḥ

sahasaivābhayādviṣṇuṃ sa hi śyena ivoragam //
utkṣipyotkṣipya saṃgṛhya nipātya ca nipātya ca

uḍḍīyoḍḍīya bhagavānpakṣaghātavimohitam //
harīṃ harastaṃ vṛṣabhaṃ viveśānanta īśvaraḥ

anuyāntaṃ surāssarve namovākyena tuṣṭuvuḥ //
praṇemussādaraṃ prītyā brahmādyāśca munīśvarāḥ

nīyamānaḥ paravaśo dīnavaktraḥ kṛtāñjaliḥ //
tuṣṭāva parameśānaṃ haristaṃ lalitākṣaraiḥ

nāmnāmaṣṭaśatenaiva stutvā tāmmṛḍameva ca //
punaśca prārthayāmāsa nṛsiṃhaḥ śarabheśvaram

yadāyadā mamājñeyaṃ matissyādgarvadūṣitā //
tadātadā'panetavyā tvayaiva parameśvara

//
nandīśvara uvāca//
evaṃ vijñāpayanprītyā śaṅkaraṃ narakesarī//
natvā'śakto'bhavadviṣṇu jīvitānta parājitaḥ

tadvaktraṃ śeṣagātrāntaṃ kṛtvā sarvasvavigraham//
śaktiyuktaṃ tadīyāṃgaṃ vīrabhadraḥ kṣaṇāttataḥ

nandīśvara uvāca//
atha brahmādayo devāśśārabhaṃ rūpamāsthitam//
tuṣṭuvuḥ śaṃkaraṃ devaṃ sarvalokaikaśaṃkaram

// devā ūcuḥ //
brahmaviṣṇvindracandrādisurāḥ sarve maharṣayaḥ //
ditijādyāḥ samprasūtāstvattassarve maheśvara

brahmaviṣṇumahendrāśca sūryādyānasurānsurām //
tvaṃ vai sṛjasi pāsyatsi tvameva sakaleśvaraḥ

yato harasi saṃsāraṃ hara ityucyate budhaiḥ//
nigṛhīto hariryasmāddhara ityucyate budhaiḥ

yato bibharṣi sakalaṃ vibhajya tanumaṣṭadhā//
ato'smānpāhi bhagavan surādānairabhīpsitaiḥ

tvaṃ mahāpuruṣaḥ śambhuḥ sarveśassuranāyakaḥ //
niḥsvātmā nirvikārātmā parabrahma satāṃ gatiḥ

dīnabandhurdayā sindhu'radbhutotiḥ parātmadṛk//
prājño virāṭvibhussatyaḥ saccidānandalakṣaṇaḥ

// nandīśvara uvāca //
ityākarṇya vacaḥ śambhurdevānāṃ parameśvaraḥ //
uvāca tān surāndevamaharṣīṃśca purātanān

yathā jalaṃ jale kṣiptaṃ kṣīre kṣīraṃ ghṛte ghṛtam //
eka eva tadā viṣṇuḥ śive līno na cānyathā

eko viṣṇurnṛsiṃhātmā sadarpaśca mahābalaḥ //
jagatsaṃhārakaraṇe pravṛtto narakesarī

prārthanīyo namastasmai madbhaktaissiddhikāribhiḥ //
madbhaktapravaraścaiva madbhaktavara dāyakaḥ

nandīśvara uvāca //
etāvaduktvā bhagavān pakṣirājo mahābalaḥ //
paśyatāṃ sarvadevānāntatraivāntaradhīyata

vīrabhadro'pi bhagavāngaṇādhyakṣo mahābalaḥ //
nṛsiṃhakṛttiṃ niṣkṛṣya samādāya yayau girim

nṛsiṃhakṛttivasanastadāprabhṛti śaṃkaraḥ //
tadvaktraṃ muṇḍamālāyāṃ nāyakatvena kalpitam

tato devā nirātaṅkā kīrttayantaḥ kathāmimām //
vismayotphullanayanā jagmuḥ sarve yathāgatam

ya idamparamākhyānaṃ puṇyaṃ vedarasānvitam //
paṭhati śṛṇuyāccaiva sarvvānkāmānavāpnuyāt

dhanyaṃ yaśasyamāyuṣyamārogyampuṣṭivarddhanam //
sarvavighrapraśamanaṃ sarvavyādhivināśanam

duḥkhapraśamanaṃ vāñchāsiddhidaṃ maṃgalālayam //
apamṛtyuharaṃ buddhipradaṃ śatruvināśanam

idantu śarabhākāraṃ paraṃ rūpampinākinaḥ //
prakāśanīyaṃ bhakteṣu śaṃkarasya careṣu vai

taireva paṭhitavyaṃ ca śrotavyaṃ ca śivātmabhiḥ //
navadhā bhaktidaṃ divyamantaḥkaraṇabuddhidam

śivotsaveṣu sarveṣu caturdaśyaṣṭamīṣu ca //
paṭhetpratiṣṭhākāle tu śivasannidhikāraṇam

cauravyāghranṛsiṃhātmakṛta rājabhayeṣu ca //
anyeṣūtpātabhūkampadasyvādipāṃsuvṛṣṭiṣu

ulkāpāte mahāvāte vināvṛṣṭyativṛṣṭiṣu //
paṭhedyaḥ prayato vidvāñ śivabhakto dṛḍhavrataḥ

yaḥ paṭhecchṛṇuyādvāpi niṣkāmo vratamaiśvaram //
rudralokaṃ samāsādya rudrasyānucaro bhavet

rudralokamanuprāpya rudreṇa saha modate //
tatassāyujyamāpnoti śivasya kṛpayā mune

iti śrīśivamahāpurāṇe tṛtīyāyāṃ śatarudrasaṃhitāyāṃ śarabhāvatāravarṇanaṃ nāma dvādaśo'dhyāyaḥ