Shiva Purana · Chapter 3.11

naṃdīśvara uvāca //
evamabhyarthito devairmatiṃ cakre kṛpā layaḥ //
mahātejo nṛsiṃhākhyaṃ saṃharttuṃ parameśvaraḥ

tadūrddhvaṃ smṛtavānrudro vīrabhadrammahābalam //
ātmano bhairavaṃ rūpaṃ prāha pralayakārakam

ājagāma tatassadyo gaṇānāmagraṇīrhasan //
sāṭṭahāsairgaṇavarairutpatadbhiritastataḥ

nṛsiṃharūpairatyugraiḥ koṭibhiḥ parivāritaḥ //
mādyadbhirabhito vīrairnṛtyadbhiśca mudānvitaiḥ

krīḍadbhiśca mahāvīrairbrahmādyaiḥ kandukairiva //
adṛṣṭapūrvairanyaiśca veṣṭito vīravanditaḥ

kalpāntajvalanajvālo vilasallocanatrayaḥ //
aśastro hi jaṭājūṭī jvaladbālendumaṇḍitaḥ

bālenduvalayā kāratīkṣṇadaṃṣṭrāṃkuradvayaḥ //
ākhaṇḍaladhanuḥkhaṇḍasaṃnibhabhrūlatānvitaḥ

mahāpracaṇḍahuṅkārabadhirīkṛtadiṅmukhaḥ //
nīlameghāñjana śyāmo bhīṣaṇaḥ śmaśrulodbhutaḥ

vādyakhaṇḍamakhaṇḍābhyāṃ bhrāmayaṃstriśikhaṃ muhuḥ //
vīrabhadro'pi bhagavānvaraśaktivijṛmbhitaḥ

svayaṃ vijñāpayāmāsa kimatra smṛtikāraṇam //
ājñāpaya jagatsvāmin prasādaḥ kriyatāmmayi

nandīśvara uvāca //
ityākarṇya maheśāno vīrabhadroktamādarāt //
vilokya vacanamprītyā provāca khala daṇḍadhṛk

// śaṃkara uvāca //
akāle bhayamutpannaṃ devānāmapi bhairavam //
jvalitasya nṛsiṃhāgniśśamayainaṃ durāsadam

sāntvayanbodhayādau taṃ tena kinnopaśāmyati //
tato matparamaṃ bhāvaṃ bhairavaṃ sampradarśaya

sūkṣmaṃ saṃhṛtya sūkṣmeṇa sthūlaṃ sthūlena tejasā //
vaktramānāya kṛttiṃ ca vīrabhadra mamājñayā

nandīśvara uvāca //
ityādiṣṭo gaṇādhyakṣo praśāntaṃ vapurāsthitaḥ//
jagāma raṃhasā tatra yatrāste narakesarī

tatastambodhayāmāsa vīrabhadro haro harim //
uvāca vākyamīśānaḥ pitāputramivaurasam

vīrabhadra uvāca //
jagatsukhāya bhagavannavatīrṇosi mādhava //
sthityarthaṃ tvaṃ prayukto'si pareśaḥ parameṣṭhinā

jantucakraṃ bhagavatā pracchinnaṃ matsyarūpiṇā //
pucchenaiva samābadhya bhramannekārṇave purā

bibharṣi karmarūpeṇa vārāheṇoddhṛtā mahī //
anena harirūpeṇa hiraṇyakaśipurhataḥ

vāmanena balirbaddhastvayā vikramatā punaḥ //
tvameva sarvvabhūtānāṃ prabhavaḥ prabhuravyayaḥ

yadāyadā hi lokasya duḥkhaṃ kiñcitprajāyate //
tadātadāvatīrṇastvaṃ kariṣyasi nirāmayam

nādhikastvatsamo'pyasti hare śivaparāyaṇaḥ //
tvayā vedāśca dharmāśca śubhamārge pratiṣṭhitāḥ

yadarthamavatāro'yaṃ nihatassa hi dānavaḥ //
hiraṇyakaśipuścaiva prahlādo'pi surakṣitaḥ

atīva ghoraṃ bhagavannarasiṃhavapustava //
upasaṃhara viśvātmaṃstvameva mama sannidhau

nandīśvara uvāca //
ityukto vīrabhadreṇa nṛsiṃhaḥ śāntayā girā //
tato'dhikaṃ mahāghoraṃ kopañcakre mahāmadaḥ

uvāca ca mahāghoraṃ kaṭhinaṃ vacanantadā //
vīrabhadrammahāvīraṃ daṃṣṭrābhirbhīṣayanmune

nṛsiṃha uvāca //
āgatosi yatastatra gaccha tvammā hitaṃ vada //
idānīṃ saṃhariṣyāmi jagadetaccarācaram

saṃharturna hi saṃhāraḥ svato vā parato'pi vā //
śāsitammama sarvvatra śāstā ko'pi na vidyate

matprasādena sakalamabhayaṃ hi pravarttate //
ahaṃ hi sarvaśaktīnāṃ pravartakanivartakaḥ

yadyadvibhūtimatsattvaṃ śrīmadūrjitameva vā //
tattadviddhi gaṇādhyakṣa mama tejovijṛmbhitam

devatāparamārthajñaṃ māmeva paramamviduḥ //
madaṃśāśśaktisampannā brahmaśakrādayassurāḥ

mannābhikamalājjātaḥ purā brahmā jagatkaraḥ //
sarvādhikassvatantraśca kartā hartākhileśvaraḥ

idantu matparaṃ tejaḥ kiṃ punaḥ śrotumicchasi //
ato māṃ śaraṇamprāpya gaccha tvaṃ vigatajvaraḥ

avehi paramaṃ bhāvamidambhūtaṃ gaṇeśvara //
māmakaṃ sakalaṃ viśvaṃ sadevāsuramānuṣam

kālo'smyahaṃ lokavināśaheturlokānsamāhartumahampravṛttaḥ //
mṛtyormṛtyuṃ viddhi māṃ vīrabhadra jīvantyete matprasādena devāḥ /३५//
nandīśvara uvāca // //
sāhaṅkāraṃ vacaḥ śrutvā hareramitavikramaḥ //
vihasyovāca sāvajñantato visphuritādharaḥ // ३६ /
vīrabhadra uvāca //
kinna jānāsi viśveśaṃ saṃhartārampinākinam //
asadvādo vivādaśca vināśastvayi kevalaḥ

tavānyonyāvatārāṇi kāni śeṣāṇi sāmpratam //
kṛtāni yena kenaiva kathāśeṣo bhaviṣyati

doṣaṃ taṃ vada yena tvamavasthāmīdṛśī gataḥ //
tena saṃhāradakṣeṇa dakṣiṇāśeṣameṣyasi

prakṛtistvaṃ pumānrudrastvayi vīryyaṃ samāhitam //
tvannābhipaṅkajājjātaḥ pañca vaktraḥ pitāmahaḥ

jagattrayīsarjanārthaṃ śaṃkaraṃ nīlalohitam //
lalāṭe'cintayatsoyantapasyugre ca saṃsthitaḥ

tallalāṭādabhūcchambhuḥ sṛṣṭyarthe tena bhūṣaṇam //
ato'haṃ devadevasya tasya bhairavarūpiṇaḥ

tvatsaṃhāre niyukto'smi vinayena balena ca //
devadevena rudreṇa sakalaprabhuṇā hare

ekaṃ rakṣo vidāryaiva tacchaktikalayā yutaḥ //
ahaṃkārāvalepena garjasi tvamatandritaḥ

upakāro hi sādhūnāṃ sukhāya kila saṃmataḥ //
upakāro hyasādhūnāmapakārāya kevalam

yannṛsiṃha maheśānaṃ punarbhūtaṃ tu manyase //
tarhyajñānī mahāgarvī vikārī sarvathā bhavān

na tvaṃ sraṣṭā na saṃhartā bhartāpi na nṛsiṃhaka //
paratantro vimūḍhātmā na svatantro hi kutracit

kulālacakravacchaktyā preritosi pinākinā //
nānāvatārakartā tvaṃ tadadhīnassadā hare

adyāpi tava nikṣiptaṃ kapālaṃ kūrmarūpiṇaḥ //
hara hāralatāmadhye dagdhaḥ kaścinna badhyate

vismṛtiḥ kiṃ tadaṃśena daṃṣṭrotpātanapīḍitam //
vārāhavighnahaste'dya yākrośantārakāriṇā

dagdhosi paśya śūlāgre viṣvaksenacchalādbhavān //
dakṣayajñe śiraśchinnaṃ mayā tejaḥsvarūpiṇā

adyāpi tava putrasya brahmaṇaḥ pañcamaṃ śiraḥ //
chinnaṃ na sajjitaṃ bhūyo hare tadvismṛtantvayā

nirjitastvaṃ dadhīcena saṃgrāme samarudgaṇaḥ //
kaṇḍūyamāne śirasi kathaṃ tadvismṛtantvayā

cakraṃ vikramato yasya cakrapāṇe tava priyam //
kutaḥ prāptaṃ kṛtaṃ kena tvayā tadapi vismṛtam

ye mayā sakalā lokā gṛhītāstvaṃ payonidhau //
nidrāparavaśaśśeṣe sa kathaṃ sāttviko bhavān

tvadādistambaparyantaṃ rudraśaktivijṛmbhitam //
śaktimānabhitastvaṃ ca hyanalāttvaṃ vimohitaḥ

tattejaso hi māhātmyaṃ pumāndra ṣṭunna hi kṣamaḥ //
asthūlā ye prapaśyanti tadviṣṇoḥ paramampadam

dyāvāpṛthivyā indrāgneryamasya varuṇasya ca //
dhvāntodare śaśāṃke ca janitvā parameśvaraḥ

kālosi tvaṃ mahākālaḥ kālakālo maheśvara //
atastvamugrakalayā mṛtyormṛtyurbhaviṣyasi

sthirodya tvakṣaro vīro vīro viśvāvakaḥ prabhuḥ //
upahantā jvaraṃ bhīmo mṛgaḥ pakṣī hiraṇmayaḥ

śāstā śeṣasya jagatastattvaṃ naiva caturmukhaḥ //
nānye ca kevalaṃ śambhussarvaśāstā na saṃśayaḥ /६१//
itthaṃ sarvaṃ samālokya saṃhārātmānamātmanā //
na vinaṣṭantvamātmānaṃ kuru he nṛhare'budha

no cedidānīṃ krodhasya mahābhairavarūpiṇaḥ //
vajrāśaniriva sthāṇau tvayi mṛtyuḥ patiṣyati

nandīśvara uvāca//
ityuktvā vīrabhadropi virarāmākutobhayaḥ //
dṛṣṭvā nṛsiṃhābhiprāyaṃ krodhamūrttiśśivasya saḥ

iti śrīśivamahāpurāṇe tṛtīyāyāṃ śatarudrasaṃhitāyāṃ śarabhāvatāravarṇanaṃ nāmaikādaśo'dhyāyaḥ