Shiva Purana · Chapter 2.5.9

sanatkumāra uvāca //
īdṛgvidhaṃ mahādivyaṃ nānāścaryamayaṃ ratham //
saṃnahya nigamānaśvāṃstaṃ brahmā prārpayacchivam

śaṃbhave'sau nivedyādhiropayāmāsa śūlinam //
bahuśaḥ prārthya deveśaṃ viṣṇvādisurasamatam

tatastasminrathe divye rathaprākārasaṃyute //
sarvadevamayaḥ śaṃbhurāruroha mahāprabhuḥ

ṛṣibhiḥ stūyamānaśca devagaṃdharvapannagaiḥ //
viṣṇunā brahmaṇā cāpi lokapālairbabhūva ha

upāvṛtaścāpsarasāṃ gaṇairgītaviśāradaḥ //
śuśubhe varadaśśambhussa taṃ prekṣya ca sārathim

tasminnāro'hatirathaṃ kalpitaṃ lokasaṃbhṛtam //
śirobhiḥ patitā bhūmau turagā vedasaṃbhavāḥ

cacāla vasudhā celussakalāśca mahīdharāḥ //
cakaṃpe sahasā śeṣo'soḍhā tadbhāramāturaḥ /७//
athādhaḥ sa rathasyāsya bhagavāndharaṇīdharaḥ //
vṛṣendrarūpī cotthāya sthāpayāmāsa vai kṣaṇam

kṣaṇāṃtare vṛṣendro'pi jānubhyāmagamaddharām //
rathārūḍhamaheśasya sutejassoḍhumakṣamaḥ

abhīṣuhasto bhagavānudyamya ca hayāṃstadā //
sthāpayāmāsa devasya pacanādvairathaṃ varam

tato'sau nodayāmāsa manomārutaraṃhasaḥ //
brahmā hayānvedamayānnaddhānrathavare sthitaḥ

purāṇyuddiśya vai trīṇi teṣāṃ khasthāni tāni hi//
adhiṣṭhite maheśe tu dānavānāṃ tarasvinām

athāha bhagavānrudro devānālokya śaṃkaraḥ//
paśūnāmādhipatyaṃ me dhaddhvaṃ hanmi tato'surān

pṛthakpaśutvaṃ devānāṃ tathānyeṣāṃ surottamāḥ//
kalpayitvaiva vadhyāste nānyathā daityasattamāḥ

sanatkumāra uvāca //
iti śrutvā vacastasya devadevasya dhīmataḥ //
viṣādamagamansarve paśutvaṃ pratiśaṃkitāḥ

teṣāṃ bhāvamatha jñātvā devadevo'mbikāpatiḥ //
vihasya kṛpayā devāñchaṃbhustānidamabravīt

śaṃbhuruvāca //
mā vo'stu paśubhāve'pi pāto vibudhasattamāḥ //
śrūyatāṃ paśubhāvasya vimokṣaḥ kriyatāṃ ca saḥ

yau vai pāśupataṃ divyaṃ cariṣyati sa mokṣyati //
paśutvāditi satyaṃ vaḥ pratijñātaṃ samāhitāḥ

ye cāpyanye kariṣyaṃti vrataṃ pāśupataṃ mama //
mokṣyaṃti te na saṃdehaḥ paśutvātsurasattamāḥ

naiṣṭhikaṃ dvādaśābdaṃ vā tadarthaṃ varṣakatrayam //
śuśrūṣāṃ kārayedyastu sa paśutvādvimucyate

tasmātparamidaṃ divyaṃ cariṣyatha surottamāḥ //
paśutvānmokṣyatha tadā yūyamatra na saṃśayaḥ

sanatkumāra uvāca //
ityākarṇya vacastasya maheśasya parātmanaḥ //
tatheti cābruvandevā haribrahmādayastathā

tasmādvai paśavassarve devāsuravarāḥ prabhoḥ //
rudraḥ paśupatiścaiva paśupāśavimocakaḥ

tadā pakṣupatītyetattasya nāma maheśituḥ //
prasiddhamabhavadvadhvā sarvalokeṣu śarmadam

mudā jayeti bhāṣaṃtassarve devarṣayastadā //
amudaṃścāti deveśo brahmā viṣṇuḥ pare'pi ca

tasmiṃśca samaye yacca rūpaṃ tasya mahātmanaḥ //
jātaṃ tadvarṇituṃ śakyaṃ na hi varṣaśatairapi

evaṃ vidho maheśāno maheśānyakhileśvaraḥ //
jagāma tripuraṃ haṃtuṃ sarveṣāṃ sukhadāyakaḥ

taṃ devadevaṃ tripuraṃ nihaṃtuṃ tadānu sarve tu raviprakāśāḥ //
gajairhayaissiṃhavarai rathaiśca vṛṣairyayuste'mararājamukhyāḥ

halaiśca śālairmuśalairbhuśuṇḍairgirīndrakalpairgirisaṃnibhāśca//
nānāyudhaissaṃyutabāhavaste tato nu hṛṣṭāḥ prayayussureśāḥ

nānāyudhāḍhyāḥ paramaprakāśā mahotsavaśśaṃbhujayaṃ vadaṃtaḥ //
yayuḥ purastasya maheśvarasya tadendrapadmodbhavaviṣṇumukhyāḥ

jahṛṣurmunayassarve daṃḍahastā jaṭādharāḥ //
vavṛṣuḥ puṣpavarṣāṇi khecarā siddhacāraṇāḥ

putratrayaṃ ca viprendrā vrajansarve gaṇeśvarāḥ //
teṣāṃ saṃkhyā ca kaḥ kartuṃ samartho vacmi kāṃścana

gaṇeśvarairdevagaṇaiśca bhṛṅgī samāvṛtassarvagaṇendravaryaḥ //
jagāma yogāṃstripuraṃ nihaṃtuṃ vimānamāruhya yathā mahendraḥ

/
keśo vigatavāsaśca mahākeśo mahājvaraḥ //
somavallīsavarṇaśca somadassanakastathā

somadhṛk sūryavarcāśca sūryapreṣaṇakastathā //
sūryākṣassūrināmā ca surassundara eva ca

praskaṃdaḥ kundaraścaṃḍaḥ kaṃpanaścātikaṃpanaḥ //
indraścendrajavaścaiva yaṃtā himakarastathā

śatākṣaścaiva paṃcākṣaḥ sahasrākṣo mahodaraḥ //
satījahuśśatāsyaśca raṃkaḥ karpūrapūtanaḥ

dviśikhastriśikhaścaiva tathāhaṃkārakārakaḥ//
ajavaktro'ṣṭavaktraśca hayavaktro'rddhavaktrakaḥ

ityādyā gaṇapā vīrā bahavo'parimeyakāḥ //
prayayuḥ parivāryeśaṃ lakṣyalakṣaṇavarjitāḥ

samāvṛtya mahādevaṃ tadāpuste pinākinam //
dagdhuṃ samarthā manasā kṣaṇena sacarācaram

dagdhuṃ jagatsarvamidaṃ samarthāḥ kiṃtvatra dagdhuṃ tripuraṃ pinākī //
rathena kiṃ cātra śareṇa tasya gaṇaiśca kiṃ devagaṇaiśca śambhoḥ

sa eva dagdhuṃ tripurāṇi tāni devadviṣāṃ vyāsa pinākapāṇiḥ //
svayaṃ gatastatra gaṇaiśca sārddhaṃ nijaissurāṇāmapi so'dbhutotiḥ

kiṃ tatra kāraṇaṃ cānyadvacmi te ṛṣisattama //
lokeṣu khyāpanārthaṃ vai yaśaḥ paramalāpaham

anyacca kāraṇaṃ hyetadduṣṭānāṃ pratyayāya vai//
sarveṣvapi ca deveṣu yasmānnānyo viśiṣyate

iti śrīśivamahāpurāṇe dvitīyāyāṃ rudrasaṃhitāyāṃ pañcame yuddhakhaṃḍe śivayātrāvarṇanaṃ nāma navamo'dhyāyaḥ