Shiva Purana · Chapter 2.5.8

// vyāsa uvāca //
sanatkumāra sarvajña śaivapravara sanmate //
adbhuteyaṃ kathā tāta śrāvitā parimeśituḥ

idānīṃ rathanirmāṇaṃ brūhi devamayaṃ param //
śivārthaṃ yatkṛtaṃ divyaṃ dhīmatā viśvakarmaṇā

// sūta uvāca//
ityākarṇya vacastasya vyāsasya sa munīśvaraḥ //
sanatkumāraḥ provāca smṛtvā śivapadāṃbujam

// sanatkumāra uvāca // //
śṛṇu vyāsa mahāprājña rathādernirmitiṃ mune //
yathāmati pravakṣye'haṃ smṛtvā śivapadāmbujam

atha devasya rudrasya nirmito viśvakarmaṇā //
sarvalokamayo divyo ratho yatnena sādaram

sarvabhūtamayaścaiva sauvarṇassarvasaṃmataḥ //
rathāṃgaṃ dakṣiṇaṃ sūryastadvāmaṃ soma eva ca

dakṣiṇaṃ dvādaśāraṃ hi ṣoḍaśāraṃ tathottaram //
areṣu teṣu viprendra ādityā dvādaśaiva tu

śaśinaḥ ṣoḍaśārāstu kalā vāmasya suvrata //
ṛkṣāṇi tu tathā tasya vāmasyaiva vibhūṣaṇam ८ //
ṛtavo nemayaḥ ṣaṭ ca tayorvai viprapuṃgava //
puṣkaraṃ cāṃtarikṣaṃ vai rathanīḍaśca maṃdaraḥ

astādriruda(dadra?)yādristu tāvubhau kūbarau smṛtau //
adhiṣṭhānaṃ mahāmerurāśrayāḥ keśarācalāḥ

vegassaṃvatsarāstasya ayane cakrasaṃgamau //
muhūrtā vaṃdhurāstasya śamyāścaiva kalāḥ smṛtāḥ

tasya kāṣṭhāḥ smṛtā ghoṇāścākṣadaṃḍāḥ kṣaṇāśca vai //
nimeṣāścānukarṣaśca īṣāścānulavāḥ smṛtāḥ

dyaurvarūthaṃ rathasyāsya svargamokṣāvubhau dhvajau //
yugāntakoṭitau tasya bhramakāmadughau smṛtau

īṣādaṃḍastathā vyaktaṃ vṛddhistasyaiva naḍvalaḥ //
koṇāstasyāpyahaṃkāro bhūtāni ca balaṃ smṛtam

indriyāṇi ca tasyaiva bhūṣaṇāni samaṃtataḥ //
śraddhā ca gatirasyaiva rathasya munisattama

tadānīṃ bhūṣaṇānyeva ṣaḍaṃgānyupabhūṣaṇam //
purāṇanyāyamīmāṃsā dharmaśāstrāṇi suvratāḥ

balāśayā varāścaiva sarvalakṣaṇasaṃyutāḥ //
maṃtrā ghaṃ(gha?)ṭāḥ smṛtāsteṣāṃ varṇapādāstadāśramāḥ

atho bandho hyanantastu sahasraphaṇabhūṣitaḥ //
diśaḥ pādā rathasyāsya tathā copadiśaścaha

puṣkarādyāḥ patākāśca sauvarṇā ratnabhūṣitāḥ //
samudrāstasya catvāro rathakaṃbalinassmṛtāḥ

gaṃgādyāssarita śreṣṭhāḥ sarvābharaṇabhūṣitāḥ //
cāmarāsaktahastāgrāssarvāstrīrūpaśobhitāḥ

tatra tatra kṛtasthānāḥ śobhayāṃcakrire ratham //
āvahādyāstathā sapta sopānaṃ haimamuttamam

lokālokācalastasyopasopānassamaṃtataḥ //
viṣayaśca tathā bāhyo mānasādistu śobhanaḥ

pāśāssamaṃtatastasya sarve varṣācalāssmṛtāḥ //
talāstasya rathasyā'tha sarve talanivāsinaḥ

sārathirbhagavānbrahmā devā raśmidharāḥ smṛtāḥ //
pratodo brahmaṇastasya praṇavo brahmadaivatam

akāraśca mahacchatraṃ maṃdaraḥ pārśvadaṃḍabhāk //
śailendraḥ kārmukaṃ tasya jyā bhujaṃgādhipassvayam

ghaṃṭā sarasvatī devī dhanuṣaḥ śrutirūpiṇī //
iṣurviṣṇurmahātejāstvagniśśalyaṃ prakīrtitam

hayāstasya tathā proktāścatvāro nigamā mune //
jyotīṃṣi bhūṣaṇaṃ teṣāmavaśiṣṭānyataḥ param

anīkaṃ viṣasaṃbhūtaṃ vāyavo vājakā smṛtāḥ //
ṛṣayo vyāsamukhyāśca vāhavāhāstathābhavan

svalpākṣaraissaṃbravīmi kiṃ bahūktyā munīśvara //
brahmāṃḍe caiva yatkiṃcidvastutadvai rathe smṛtam

evaṃ samyakkṛtastena dhīmatā viśvakarmaṇā //
sarathādiprakāro hi brahmaviṣṇvājñayā śubhaḥ

iti śrīśivamahāpurāṇe dvitīyāyāṃ rudrasaṃhitāyāṃ pañcame yuddhakhaṇḍe rathādiyuddhaprakāravarṇanaṃ nāmāṣṭamo'dhyāyaḥ