Shiva Purana · Chapter 2.5.10

sanatkumāra uvāca //
atha śambhurmahādevo rathasthassarvasaṃyutaḥ //
tripuraṃ sakalaṃ dagdhumudyato'bhūtsuradviṣām//
śīrṣaṃ sthānakamāsthāya saṃdhāya ca śarottamam //
sajjaṃ tatkārmukaṃ kṛtvā pratyālīḍhaṃ mahādbhutam

niveśya dṛḍhamuṣṭau ca dṛṣṭiṃ dṛṣṭau niveśya ca//
atiṣṭhanniścalastatra śataṃ varṣasahasrakam

tatoṅguṣṭhe gaṇādhyakṣassa tu daityaniśaṃsthitaḥ//
na lakṣyaṃ viviśustāni purāṇyasya triśūlinaḥ

tatoṃtarikṣādaśṛṇoddhanurbāṇadharo haraḥ //
muṃjakeśo virūpākṣo vācaṃ paramaśobhanām

bho bho na yāvadbhagavannarcito'sau vināyakaḥ//
purāṇi jagadīśeśa sāṃprataṃ na haniṣyati

etacchrutvā tu vacanaṃ gajavaktramapūjayat //
bhadrakālīṃ samāhūya tatoṃdhakaniṣūdanaḥ

tasmin saṃpūjite harṣātparituṣṭe purassare //
vināyake tato vyomni dadarśa bhagavānharaḥ

purāṇi trīṇi daityānāṃ tārakāṇāṃ mahātmanām //
yathātathaṃ hi yuktāni keciditthaṃ vadaṃti ha

parabrahmaṇi deveśa sarvopāsye maheśvare //
anyaprasādataḥ kāryaṃ siddhirghaṭati neti hi

sa svataṃtraḥ paraṃ brahma saguṇo nirguṇo'pi ha //
alakṣyaḥ sakalaissvāmī paramātmā niraṃjanaḥ

paṃcadevātmakaḥ paṃcadevopāsyaḥ paraḥ prabhuḥ //
tasyopāsyo na kopyasti sa evopāsya ālayam

atha vā līlayā tasya sarvaṃ saṃghaṭate mune //
caritaṃ devadevasya varadāturmaheśituḥ

tasmisthite mahādeve pūjayitvā gaṇādhipam //
purāṇi tatra kālena jagmurekatvamāśu vai

ekībhāvaṃ mune tatra tripure samupāgate //
babhūva tumulo harṣo devādīnāṃ mahātmanām

tato devagaṇāssarve siddhāśca paramarṣayaḥ //
jayeti vāco mumucuḥ stuvaṃtaścāṣṭamūrtinam

athāheti tadā brahmā viṣṇuśca jagatāṃ patiḥ //
samayo'pi samāyāto daityānāṃ vadhakarmaṇaḥ

teṣāṃ tārakaputrāṇāṃ tripurāṇāṃ maheśvara //
devakāryaṃ kuru vibho ekatvamapi cāgatam

yāvanna yānti deveśa viprayogaṃ purāṇi vai //
tāvadbāṇaṃ vimuṃcaśca tripuraṃ bhasmasātkuru/

atha sajyaṃ dhanuḥ kṛtvā śarvassaṃdhāya taṃ śaram //
pūjya pāśupatāstraṃ sa tripuraṃ samaciṃtayat

atha devo mahādevo varalīlāviśāradaḥ //
kenāpi kāraṇenātra sāvajñaṃ tadavaikṣata

puratrayaṃ virūpākṣaḥ kartuṃ tadbhasmasātkṣaṇāt //
samarthaḥ parameśāno mīnātu ca satāṃ gatiḥ

dagdhuṃ samartho deveśo vīkṣaṇena jagattrayam //
asmadyaśo vivṛddhyarthaṃ śaraṃ moktumihārhasi

iti stuto'maraissarvaiviṣṇvādividhibhistadā //
dagdhuṃ puratrayaṃ tadvai bāṇenaicchanmaheśvaraḥ

abhilākhyamuhūrte tu vikṛṣya dhanuradbhutam //
kṛtvā jyātalanirghoṣaṃ nādamatyaṃtadussaham

ātmano nāma viśrāvya samābhāṣya mahāsurān //
mārtaṃḍakoṭivapuṣaṃ kāṃḍamugro mumoca ha

dadāha tripurasthāstāndaityāṃstrīnvimalāpahaḥ //
sa āśugo viṣṇumayo vahniśalyo mahājvalan

tataḥ purāṇi dagdhāni caturjaladhimekhalām //
gatāni yugapadbhūmiṃ trīṇi dagdhāni bhasmaśaḥ

daityāstu śataśo dagdhāstasya bāṇasthavahninā //
hāhākāraṃ prakurvaṃtaśśivapūjāvyatikramāt

tārakākṣastu nirdagdho bhrātṛbhyāṃ sahito'bhavat //
sasmāra svaprabhuṃ devaṃ śaṃkaraṃ bhaktavatsalam

bhaktyā paramayā yuktaḥ pralapan vividhā giraḥ //
mahādevaṃ samudvīkṣya manasā tamuvāca saḥ

tārakākṣa uvāca //
bhava jñātosi tuṣṭo'si yadyasmān saha baṃdhubhiḥ //
tena satyena bhūyo'pi kadā tvaṃ pradahiṣyasi

durlabhaṃ labdhamasmābhiryadaprāpyaṃ surāsuraiḥ //
tvadbhāvabhāvitā buddhirjātejāte bhavatviti

ityevaṃ vibruvaṃtaste dānavāstena vahninā //
śivājñayādbhutaṃ dagdhā bhasmasādabhavanmune

anye'pi bālā vṛddhāśca dānavāstena vahninā //
śivājñayā drutaṃ vyāsa nirdagdhā bhasmasātkṛtāḥ

striyo vā puruṣā vāpi vāhanāni ca tatra ye //
sarve tenāgninā dagdhāḥ kalpānte tu jagadyathā

bhartṝnkaṃṭhagatānhitvā kāściddagdhā varastriyaḥ //
kāścitsuptāḥ pramattāśca ratiśrāṃtāśca yoṣitaḥ

arddhadagdhā vibuddhāśca babhramurmohamūrcchitāḥ //
tena nāsītsusūkṣmo'pi ghoratripuravahninā

avidagdho vinirmuktaḥ sthāvaro jaṃgamopi vā //
varjayitvā mayaṃ daityaṃ viśvakarmāṇamavyayam

aviruddhaṃ tu devānāṃ rakṣitaṃ śaṃbhutejasā //
vipatkālepi sadbhaktaṃ maheśaśaraṇāgatam

sannipāto hi yeṣāṃ no vidyate nāśakārakaḥ //
daityānāmanyasattvānāṃ bhāvābhāve kṛtākṛte

tasmādyatnassusaṃbhāvyaḥ sadbhiḥ kartavya eva hi //
garhaṇātkṣīyate loko na tatkarma samācaret

na saṃyogo yathā teṣāṃ bhūyāttripuravāsinām //
matametaddhi sarveṣāṃ daivādyadi yato bhavet

ye pūjayaṃtastatrāpi daityā rudraṃ sabāṃdhavāḥ //
gāṇapatyaṃ yayussarve śivapūjāvi dherbalāt

iti śrīśivamahāpurāṇe dvitīyāyāṃ rudrasaṃhitāyāṃ pañcame yuddhakhaṃḍe tripuradāhavarṇanaṃ nāma daśamo'dhyāyaḥ