Shiva Purana · Chapter 2.5.58

sanatkumāra uvāca //
śṛṇu vyāsa pravakṣyāmi caritaṃ śaśimaulinaḥ //
yathā duṃdubhinirhrādamavadhīdditijaṃ haraḥ

hiraṇyākṣe hate daitye ditiputre mahābale //
viṣṇudevena kālena prāpa dukhaṃ pahadditiḥ?

daityo duṃdubhinirhrādo duṣṭaḥ prahlādamātulaḥ //
sāṃtvayāmāsa tāṃ vāgbhirduḥkhitāṃ devaduḥkhadaḥ

atha daityassa māyāvī ditimāśvāsya daityarāṭ //
devāḥ kathaṃ sujeyāḥ syurityupāyamarcitayat

devaiśca ghātito vīro hiraṇyākṣo mahāsuraḥ //
viṣṇunā ca saha bhrātrā sacchalairdetyavairibhiḥ

kiṃbalāśca kimāhārā kimādhārā hi nirjarāḥ //
mayā kathaṃ sujeyāssyurityupāyamaciṃtayat

vicārya bahuśo daityastattvaṃ vijñāya niścitam //
avaśyamagrajanmāno hetavo'tra vicārataḥ

brāhmaṇānhaṃtumasakṛdanvadhāvata vai tataḥ //
daityo dundubhinirhrādo devavairī mahākhalaḥ

yataḥ kratubhujo devāḥ kratavo vedasaṃbhavāḥ//
te vedā brāhmaṇādhārāstato devabalaṃ dvijāḥ

niścitaṃ brāhmaṇādhārāssarve vedāssavāsavāḥ//
gīrvāṇā brāhmaṇabalā nātra kāryā vicāraṇā

brāhmaṇā yadi naṣṭāssyurvedā naṣṭāstatastvayam//
atasteṣu praṇaṣṭeṣu vinaṣṭāḥ satataṃ surāḥ

yajñeṣu nāśaṃ gacchatsu hatāhārāstatassurāḥ//
nirbalāssukhajayyāḥ syurnirjiteṣu sureṣvatha/१२//
ahameva bhaviṣyāmi mānyastrijagatīpatiḥ //
ahariṣyāmi devā nāmakṣayāssarvasaṃpadaḥ

nirvekṣyāmi sukhānyeva rājye nihatakaṃṭake //
iti niścitya durbuddhiḥ punaściṃtitavānkhalaḥ

dvijāḥ kva saṃti bhūyāṃso brahmatejotibṛṃhitā//
śrutyadhyanasaṃpannāstapobalasamanvitāḥ

bhūyasāṃ brāhmaṇānāṃ tu sthānaṃ vārāṇasī khalu //
tāmādāvupasaṃhṛtya yāyāṃ tīrthāṃtaraṃ tataḥ

yatra yatra hi tīrtheṣu yatra yatrāśrameṣu ca //
saṃti sarve'grajanmānaste mayādyāssamaṃtataḥ

iti duṃdubhinirhrādo matiṃ kṛtvā kulocitām //
prāpyāpi kāśīṃ durvṛtto māyāvī nyavadhīddvijān

samitkuśānsamādātuṃ yatra yāṃti dvijottamāḥ //
araṇye tatra tānsarvānsa bhakṣayati durmatiḥ

yathā ko'pi na vettyevaṃ tathā'cchanno'bhavatpunaḥ //
vane vanecaro bhūtvā yādorūpo jalāśaye

adṛśyarūpī māyāvī devānāmapyagocaraḥ //
divā dhyānaparastiṣṭhenmunivanmunimadhyagaḥ

praveśamuṭajānāṃ ca nirgamaṃ hi vilokayan //
yāminyāṃ vyāghrarūpeṇābhakṣayadbrāhmaṇānbahūn

niśśaṃkambhakṣayatyevaṃ na tyajatyapi kīkaśam //
itthaṃ nipātitāstena viprā duṣṭena bhūriśaḥ

ekadā śivarātrau tu bhaktastveko nijoṭaje //
saparyāṃ devadevasya kṛtvā dhyānasthito'bhavat

sa ca duṃdubhinirhrādo daityendro baladarpitaḥ //
vyāghrarūpaṃ samāsthāya tamādātuṃ matiṃ dadhe

taṃ bhaktaṃ dhyānamāpannaṃ dṛḍhacittaṃ śivekṣaṇe //
kṛtāstramantravinyāsaṃ taṃ krāṃtumaśakanna saḥ

atha sarvaṃ gataśśambhurjñātvā tasyāśayaṃ haraḥ //
daityasya duṣṭarūpasya vadhāya vidadhe dhiyam

yāvadāditsati vyāghrastāvadāvirabhūddharaḥ //
jagadrakṣāmaṇistryakṣo bhaktarakṣaṇadakṣadhīḥ

rudramāyāṃtamālokya tadbhaktārcitaliṃgataḥ //
daityastenaiva rūpeṇa vavṛdhe bhūdharopamaḥ

sāvajñamatha sarvajñaṃ yāvatpaśyati dānavaḥ //
tāvadāyātamādāya kakṣāyaṃtre nyapīḍayat

paṃcāsyastvatha paṃcāsyaṃ muṣṭyā mūrddhanyatāḍayata//
bhaktavatsalanāmāsau vajrādapi kaṭhorayā

sa tena muṣṭighātena kakṣāniṣpeṣaṇena ca //
atyārtamāraṭadvyāghro rodasīṃ pūrayanmṛtaḥ

tena nādena mahatā saṃpravepitamānasāḥ //
tapodhanāssamājagmurniśi śabdānusārataḥ

atreśvaraṃ samālokya kakṣīkṛtamṛgeśvaram //
tuṣṭuvuḥ praṇatāssarve śarvaṃ jayajayākṣaraiḥ

brāhmaṇā ūcuḥ //
paritrātāḥ paritrātāḥ pratyūhāddāruṇāditaḥ //
anugrahaṃ kuruṣveśa tiṣṭhātraiva jagadguro

anenaiva svarūpeṇa vyāghreśa iti nāmataḥ //
kuru rakṣāṃ mahādeva jyeṣṭhasthānasya sarvadā

anyebhyo hyupasargebhyo rakṣa nastīrthavāsinaḥ //
duṣṭānaṣṭāsya? gaurīśa bhaktebhyo dehi cābhayam //

sanatkumāra uvāca //
ityākarṇya vacasteṣāṃ bhaktānāṃ candraśekharaḥ //
tathetyuktvā punaḥ prāha sa bhaktānbhaktavatsalaḥ // ३८ /
maheśvara uvāca //
yo māmanena rūpeṇa drakṣyati śraddhayātra vai //
tasyopasargasaṃdhānaṃ pātayiṣyāmyasaṃśayam

maccaritramidaṃ śrutvā smṛtvā liṃgamidaṃ hṛdi //
saṃgrāme praviśanmartyo jayamāpnotyasaṃśayam

etasminnaṃtare devāssamājagmussavāsavāḥ /
jayeti śabdaṃ kurvaṃto mahotsavapurassaram

praṇamya śaṃkaraṃ premṇā sarve sāṃjalayassurāḥ //
nataskaṃdhāḥ suvāgbhiste tuṣṭuvurbhaktavatsalam

devā ūcuḥ //
jaya śaṃkara deveśa praṇatārtihara prabho //
etadduṃdubhinirhrādavadhāttrātā vayaṃ surāḥ

sadā rakṣā prakartavyā bhaktānāṃ bhaktavatsala //
vadhyāḥ khalāśca deveśa tvayā sarveśvara prabho

ityākarṇya vacasteṣāṃ surāṇāṃ parameśvaraḥ //
tathetyuktvā prasannātmā tasmiṃlliṃge layaṃ yayau

savismayāstato devāssvaṃsvaṃ dhāma yayurmudā //
te'pi viprā mahāharṣātpunaryātā yathāgatam

idaṃ caritraṃ parama vyāghreśvarasamudbhavam //
śṛṇuyācchrāvayedvāpi paṭhedvā pāṭhayettathā

sarvānkāmānavāpnoti narassvamanasesitān //
paratra labhate mokṣaṃ sarvaduḥkhavivarjitaḥ

idamākhyānamatulaṃ śivalīlā mṛtākṣaram//
svargyaṃ yaśasyamāyuṣyaṃ putrapautrapravarddhanam

paraṃ bhaktipradaṃ dhanyaṃ śivaprītikaraṃ śivam//
paramajñānadaṃ ramyaṃ vikāraharaṇaṃ param

iti śrīśivamahāpurāṇe dvi० rudrasaṃhitāyāṃ pañca० yuddhakhaṇḍe duṃdubhinirhrādadaityavadhavarṇanaṃ nāmāṣṭapañcāśattamo'dhyāyaḥ