Shiva Purana · Chapter 2.5.57

sanatkumāra uvāca //
śṛṇu vyāsa mahāpremṇā caritaṃ śaśimaulinaḥ //
yathā'vadhīttriśūlena dānavendraṃ gajāsuram

dānave nihate devyā samare mahiṣāsure //
devānāṃ ca hitārthāya purā devāḥ sukhaṃ yayuḥ

tasya putro mahāvīro munīśvara gajāsuraḥ //
piturvadhaṃ hi saṃsmṛtya kṛtaṃ devyā surārthanāt

sa tadvairamanusmṛtya taporthaṃ gatavānvane //
samuddiśya vidhiṃ prītyā tatāpa paramaṃ tapaḥ

avadhyohaṃ bhaviṣyāmi strīpuṃsaiḥ kāmanirjitaḥ //
saṃvicāryeti manasā'bhūttaporatamānasaḥ

sa tepe himavaddroṇyāṃ tapaḥ paramadāru ṇam //
ūrddhvabāhurnabhodṛṣṭiḥ pādāṃguṣṭhāśritāvaniḥ

jaṭābhāraissa vai reje pralayārka ivāṃśubhiḥ //
mahiṣāsuraputro'sau gajāsura udāradhīḥ

tasya mūrdhnaḥ samudbhūtassadhūmognistapomayaḥ //
tiryagūrdhvamadholokāstāpayanviṣvagīritaḥ

cukṣubhurnadyudanvaṃtaścāgnermūrddhasamudbhavāt //
nipetussagrahāstārā jajvaluśca diśo daśa

tena taptāsturāssarve divaṃ tyaktvā savāsavāḥ //
brahmalokaṃ yayurvijñāpayāmāsuścacāla bhūḥ

devā ūcuḥ //
vidhe gajāsuratapastaptā vayamathākulāḥ //
na śaknumo divi sthātumataste śaraṇaṃ gatāḥ

vidhehyupaśamaṃ tasya cānyāñjīvayituṃ kṛpā //
lokā naṃkṣyatyanyathā hi satyaṃsatyaṃ bruvāmahe

iti vijñāpito devairvāsavādyaissa ātmabhūḥ //
bhṛgudakṣādibhirbrahmā yayau daityavarāśramam

tapaṃtaṃ tapasā lokā nyathā'bhrāpihitaṃ divi //
vilakṣya vismitaḥ prāha vihasansṛṣṭikārakaḥ

brahmovāca //
uttiṣṭhottiṣṭha daityendra tapassiddhosi māhiṣe //
prāpto'haṃ varadastāta varaṃ vṛṇu yathepsitam

sanatkumāra uvāca //
utthāyotthāya daityendra īkṣamāṇo dṛśā vibhum//
girā gadgadayā prīto'gṛṇāddevaṃ sa māhiṣiḥ ///३५/
gajāsura uvāca //
namaste devadeveśa yadi dāsyasi me varam//
avadhyo'haṃ bhaveyaṃ vai strīpuṃsaiḥ kāmanirjitaiḥ

mahābalo mahāvīryo'jeyo devādibhissadā //
sarveṣāṃ lokapālānāṃ nikhilarddhisubhugvibho

sanatkumāra uvāca //
evaṃ vṛtaśśatadhṛtirdānavena sa tena vai //
prādāttattapasā prīto varaṃ tasya sudurlabham

evaṃ labdhavaro daityo māhiṣiśca gajāsuraḥ //
suprasannamanāsso'tha svadhāma pratyapadyata

sa vijitya diśassarvā lokāṃśca trīnmahāsuraḥ //
devāsuramanuṣyendrāngaṃdharvagaruḍoragān

ityādīnnikhilāñjitvā vaśamānīya viśvajit //
jahāra lokapālānāṃ sthānāni saha tejasā

devodyānaśriyā juṣṭamadhyāste sma triviṣṭapam //
mahendrabhavanaṃ sākṣānnirmitaṃ viśvakarmaṇā

tasminmahendrasya gṛhe mahābalo mahāmanā nirjitaloka ekarāṭ//
reme'bhivaṃdyāṃghriyugaḥ surādibhiḥ pratāpitairūrjitacaṃḍaśāsanaḥ

sa itthaṃ nirjitakakubekarāḍ viṣayānpriyān //
yathopajoṣaṃ bhuṃjāno nātṛpyadajitendriyaḥ

evamaiśvaryamattasya dṛptasyocchāstravartinaḥ //
kāle vyatīte mahati pāpabuddhirabhūttataḥ

mahiṣāsuraputro'sau saṃcikleśa dvijānvarān //
tāpasānnitarāṃ pṛthvyāṃ dānavassukhamardanaḥ

surānnarāṃśca pramathānsarvāñcikleśa durmatiḥ //
dharmānvitānviśeṣeṇa pūrvavairamanusmaran

ekasminsamaye tāta dānavo'sau mahābalaḥ //
agacchadrājadhānīṃ va śaṃkarasya gajāsuraḥ

samāgate'surendre hi mahānkalakalo mune //
trātatrāteti tatrāsīdānaṃdanavāsinām

mahiṣā'suraputro'sau yadā puryāṃ samāgataḥ //
pramathanpramathānsarvānnijavīryamadoddhataḥ

tasminnavasare devāśśakrādyāstatparājitāḥ //
śivasya śaraṇaṃ jagmurnatvā tuṣṭuvurādarāt

nyavedayandānavasya tasya kāśyāṃ samāgamam //
kleśādhikyaṃ tatratyānāṃ tannāthānāṃ viśeṣataḥ

devā ūcuḥ //
devadeva mahādeva tava puryāṃ gatosuraḥ //
kaṣṭaṃ datte tvajjanānāṃ taṃ jahi tvaṃ kṛpānidhe

yatrayatra dharāyāṃ ca caraṇaṃ pramiṇoti hi //
acalāṃ sacalāṃ tatra karoti nija bhārataḥ

ūruvegena taravaḥ pataṃti śikharaissaha //
yasya dordaṃḍaghātena cūrṇā syuśca śiloccayāḥ

yasya maulijasaṃgharṣādghanā vyoma tyajaṃtyapi //
nīlimānaṃ na cādyāpi jahyustatkeśasaṃgajam

yasya viśvāsasaṃbhārairuttaraṃgā mahābdhayaḥ //
nadyopyamandakallolā bhavaṃti timibhissaha

yojanānāṃ sahasrāṇi nava yasya samucchrayaḥ //
tāvāneva hi vistārastanormāyāvino'sya hi

yannetrayoḥ piṃgalimā tathā taralimā punaḥ //
vidyutāḥ nohyate'dyāpi so'yaṃ smā''yāti satvaram

yāṃ yāṃ diśaṃ samabhyeti soyaṃ dussaha dānavaḥ //
avadhyo'haṃ bhavāmīti strīpuṃsaiḥ kāmanirjitaiḥ

ityevaṃ ceṣṭitaṃ tasya dānavasya niveditam //
rakṣasva bhaktāndeveśa kāśīrakṣaṇatatpara

sanatkumāra uvāca //
iti saṃprārthito devairbhaktarakṣaṇatatparaḥ //
tatrā''jagāma soraṃ tadvadhakāmanayā haraḥ

āgataṃ taṃ samālokya śaṃkaraṃ bhaktavatsalam //
triśūlahastaṃ garjaṃtaṃ jagarja sa gajāsuraḥ

tatastayormahānāsītsamaro dāruṇo'dbhutaḥ //
nānāstraśastrasaṃpātairvīrārāvaṃ prakurvatoḥ

gajāsurotitejasvī mahābalaparākramaḥ //
vivyādha giriśaṃ bāṇaistīkṣṇairdānavaghātinam

atha rudro raudratanuḥ svaśarairatidāruṇaiḥ //
taccharāṃścicchide tūrṇamaprāptāṃstilaśo mune

tato gajāsuraḥ kuddho'bhyadhāvattaṃ maheśvaram //
khaḍgahastaḥ pragarjyoccairhatosītyadya vai mayā

tatastriśūlahetistamāyāṃtaṃ daityapuṃgavam //
vijñāyāvadhyamanyena śūlenābhijaghāna tam //

protastena triśūlena sa ca daityo gajāsuraḥ //
chatrīkṛtamivātmānaṃ manyamānā jagau haram

gajāsura uvāca //
devadeva mahādeva tava bhakto'smi sarvathā //
jāne tvāṃ tridiveśānaṃ triśūlinsmarahāriṇam

tava haste mama vadho mahāśreyaskaro mataḥ //
aṃdhakāre maheśāna tripurāṃtaka sarvaga

kiṃcidvijñaptumicchāmi tacchṛṇuṣva kṛpākara //
satyaṃ bravīmi nāsatyaṃ mṛtyuṃjaya vicāraya/५३//
tvameko jagatāṃ vaṃdyo viśvasyopari saṃsthitaḥ //
kālena sarvairmartavyaṃ śreyase mṛtyurīdṛśaḥ

sanatkumāra uvāca //
ityākarṇya vacastasya śaṃkaraḥ karuṇānidhiḥ //
prahasya pratyuvāceśo māhiṣeyaṃ gajāsuram

īśvara uvāca //
mahāparākramanidhe dānavottama sanmate //
gajāsura prasannosmi svānakūlaṃ varaṃ vṛṇu

sanatkumāra uvāca //
ityākarṇya maheśasya vacanaṃ varadasya hi //
pratyuvāca prasannātmā dānavendro gajāsuraḥ

gajāsura uvāca //
yadi prasanno digvāsastadā dityaṃ vasāna me//
imāṃ kṛttiṃ maheśāna tvattriśūlāgnipāvitām

svapramāṇāṃ sukhasparśāṃ raṇāṃgaṇapaṇīkṛtām //
darśanīyāṃ mahādivyāṃ sarvadaiva sukhāvahām

iṣṭagaṃdhissadaivāstu sadaivāstvatikomalā //
sadaiva nirmalā cāstu sadaivāstvatimaṃḍanām

mahātaponalajvālāṃ prāpyāpi suciraṃ vibho //
na dagdhā kṛttireṣā me puṇyagaṃdhanidhestataḥ

yadi puṇyavatī naiṣā mama kṛtti digaṃbara //
tadā tvadaṃgasaṃgosyāḥ kathaṃ jāto raṇāṃgaṇe

anyaṃ ca me varaṃ dehi yadi tuṣṭo'si śaṃkara //
nāmāstu kṛttivāsāste prārabhyādyatanaṃ dinam

sanatkumāra uvāca //
śrutveti sa vacastasya śaṃkaro bhaktavatsalaḥ//
tathetyuvāca suprīto mahiṣāsurajaṃ ca tam

punaḥ provāca prītātmā dānavaṃ taṃ gajāsuram //
bhaktapriyo maheśāno bhaktinirmalamānasam

īśvara uvāca//
idaṃ puṇyaṃ śarīraṃ te kṣetre'sminmuktisādhane//
mama liṃgaṃ bhavatvatra sarveṣāṃ muktidāyakam

kṛttivāseśvaraṃ nāma mahāpātakanāśanam//
sarveṣāmeva liṃgānāṃ śirobhūtaṃ vimuktidam

kathayitveti deveśastatkṛtiṃ parigṛhya ca//
gajāsurasya mahatīṃ prāvṛṇoddhi digaṃbaraḥ

mahāmahotsavo jātastasminnahni munīśvara//
harṣamāpurjanāssarve kāśīsthāḥ pramathāstathā

hari brahmādayo devā harṣanirbharamānasāḥ//
tuṣṭuvustaṃ maheśānaṃ natvā sāṃjalayastataḥ

hate tasmindānaveśe māhiṣe hi gajāsure//
svasthānaṃ bhejire devā jagatsvāsthyamavāpa ca

ityuktaṃ caritaṃ śaṃbhorbhaktavātsalyasūcakam //
svargyaṃ yaśasyamāyuṣyaṃ dhanadhānyapravarddhanam

ya idaṃ śṛṇuyātprītyā śrāvayedvā śucivrataḥ //
sa bhuktvā ca mahāsaukhyaṃ labhetāṃte paraṃ sukham

iti śrīśivamahāpurāṇe dvitīyāyāṃ rudrasaṃhitāyāṃ pañcame yuddhakhaṃḍe gajāsuravadho nāma saptapaṃcāśattamo'dhyāyaḥ