Shiva Purana · Chapter 2.5.59

sanatkumāra uvāca //
śṛṇu vyāsa susaṃprītyā caritaṃ parameśituḥ //
yathāvadhītsvapriyayā daityamuddiśya saṃjñayā

āstāṃ purā mahādaityo vidalotpalasaṃjñakau //
apuṃvadhyau mahāvīrau sudṛptau varato vidheḥ

tṛṇīkṛtatrijagatī puruṣābhyāṃ svadorba lāt //
tābhyāṃ sarve surā brahman daityābhyāṃ nirjitā raṇe

tābhyāṃ parājitā devā vidheste śaraṇaṃ gatāḥ //
natvā taṃ vidhivatsarve kathayāmāsurādarāta

iti brahmā hyavocattān devyā vadhyau ca tau dhruvam //
dhairyyaṃ kuruta saṃsmṛtya saśivaṃ śivamādarāt

bhaktavatsalanāmāsau saśivaśśaṃkaraśśivaḥ //
śaṃ kariṣyatyadīrgheṇa kālena parameśvaraḥ

sanatkumāra uvāca //
ityuktvā tāṃstato brahmā tūṣṇīmāsīcchivaṃ smaran //
tepi devā mudaṃ prāpya svaṃsvaṃ dhāma yayustadā

atha nāradadevarṣiśśivapreraṇayā tadā //
gatvā tadīyabhavanaṃ śivāsauṃdaryamājagau

śrutvā tadvacanaṃ daityāvāstāṃ māyāvimohitau //
devīṃ parijihīrṣū tau viṣameṣu prapīḍitau

vicārayāmāsatustau kadā kutra śivā ca sā //
bhaviṣyati vidheḥ prāptodayānnāviti sarvadā

ekasminsamaye śaṃbhurvijahāra sulīlayā //
kautukenaiva cikrīḍe śivā kandukalīlayā

sakhībhissaha suprītyā kautukācchivasannidhau

udaṃcaṃtyaṃcadaṃgānāṃ lāghavaṃ paritanvatī //
niśvāsāmodamuditabhramarākulitekṣaṇā

bhraśyaddhammillasanmālyasvapurīkṛtabhūmikā //
svidyatkapolapatrālīsravadaṃbukaṇojjvalā

sphuṭaccolāṃśukapathatiryadaṃgaprabhāvṛtā //
ullasatkaṃdukāsphālātiśroṇitakarāmbujā

kaṃdukānugasaddṛṣṭinartitabhrūlatāṃcalā //
mṛḍānī kila khelaṃtī dadṛśe jagadambikā

aṃtarikṣacarābhyāṃ ca ditijābhyāṃ kaṭā kṣitā //
kroḍīkṛtābhyāmiva vai samupasthitamṛtyunā

vidalotpalasaṃjñābhyāṃ dṛptābhyāṃ varato vidheḥ //
tṛṇīkṛtatrijagatī puruṣābhyāṃ svadorbalāt

devīṃ tāṃ saṃjihīrṣaṃtau viṣameṣu prapīḍitau //
diva utteratuḥ kṣipraṃ māyāṃ svīkṛtya śāṃbarīm

dhṛtvā pāriṣadīṃ māyāmāyātāvaṃbikāṃtikam //
tāvatyaṃtaṃ sudurvṛttāvaticaṃcalamānasau

atha duṣṭanihaṃtrā vai sāvajñena hareṇa tau //
vijñātau ca kṣaṇādāstāṃ cāṃcalyāllocanodbhavāt

kaṭākṣitātha devena durgā durgatighātinī //
daityāvimāmiti gaṇau neti sarvasvarūpiṇā

atha sā netrasaṃjñāṃ svasvāminastāṃ bubodha ha //
mahākautukinastāta śaṃkarasya pareśituḥ

tato vijñāya saṃjñāṃ tāṃ sarvajñārddhaśarīriṇī //
tenaiva kaṃdukenātha yugapannirjaghāna tau

mahābalau mahādevyā kaṃdukena samāhatau //
paribhramya paribhramya tau duṣṭau vinipetatuḥ

vṛntādiva phale pakve tālenānilalolite //
daṃbholinā parihate śṛṃge iva mahāgireḥ

tau nipātya mahādaityāvakāryakaraṇodyatau //
tataḥ pariṇatiṃ yāto liṃgarūpeṇa kaṃdukaḥ

kaṃdukeśvarasaṃjñāṃ ca talliṃgamabhavattadā//
jyeṣṭheśvarasamīpe tu sarvaduṣṭanivāraṇam

etasminneva samaye haribrahmādayassurāḥ //
śivāvirbhāvamājñāya ṛṣayaśca samāyayuḥ

atha sarve surāśśambhorvarānprāpya tadājñayā//
svadhāmāni yayuḥ prītāstathā kāśīnivāsinaḥ

sāṃbikaṃ śaṃkaraṃ dṛṣṭvā kṛtāṃjalipuṭāśca te//
praṇamya tuṣṭuvurbhaktyā vāgbhiriṣṭābhirādarāt

sāṃbiko'pi śivo vyāsa krīḍitvā suvihāravit//
jagāma svālayaṃ prītassagaṇo bhaktavatsalaḥ

kaṃdukeśvaraliṃgaṃ ca kāśyāṃ duṣṭanibarhaṇam//
bhuktimuktipradaṃ sarvakāmadaṃ sarvadā satām /

idamākhyānamatulaṃ śṛṇuyādyo mudānvitaḥ //
śrāvayedvā paṭhedyaśca tasya duḥkhabhayaṃ kutaḥ

iha sarvasukhaṃ bhuktvā nānāvidhamanuttamam //
paratra labhate divyāṃ gatiṃ vai devadurlabhām

iti taṃ varṇitaṃ tāta caritaṃ paramādbhutam //
śivayorbhaktavātsalyasūcakaṃ śivadaṃ satām

brahmovāca //
ityuktvāmaṃtrya taṃ vyāsaṃ tannuto madvarātmajaḥ //
yayau vihāyasā kāśīṃ caritaṃ śaśimaulinaḥ

yuddhakhaṃḍamidaṃ proktaṃ mayā te munisattama //
raudrīyasaṃhitāmadhye sarvakāmaphalapradam

iyaṃ hi saṃhitā raudrī sampūrṇā varṇitā mayā //
sadāśivapriyatarā bhuktimuktiphalapradā

imāṃ yaśca paṭhennityaṃ śatrubādhānivārikām //
sarvānkāmānavāpnoti tato muktiṃ labheta nā

sūta uvāca //
iti brahmasutaśśrutvā pitrā śivayaśaḥ param //
śatanāmāpya śaṃbhośca kṛtārtho'bhūcchivānugaḥ

brahmanāradasamvādaḥ sampūrṇaḥ kathito mayā //
śivassarvapradhāno hi kiṃ bhūyaśśrotumicchasi

iti śrīśivamahāpurāṇe dvitīyāyāṃ rudrasaṃhitāyāṃ pañcame yuddhakhaṃḍe vidalotpaladaityavadhavarṇanaṃ nāmaikonaṣaṣṭitamo'dhyāyaḥ

samāptoyaṃ yuddhakhaṇḍaḥ //
samāpteyaṃ dvitīyā rudrasaṃhitā