શિવ પુરાણ · અધ્યાય 2.5.38

સનત્કુમાર ઉવાચ ॥
સા ચ ગત્વા હિ સંગ્રામં સિંહનાદં ચકાર હ ॥
દેવ્યાશ્ચ તેન નાદેન મૂર્ચ્છામાપુશ્ચ દાનવાઃ

અટ્ટાટ્ટહાસમશિવં ચકાર ચ પુનઃ પુનઃ ॥
તદા પપૌ ચ માધ્વીકં નનર્ત રણમૂર્દ્ધનિ

ઉગ્રદંષ્ટ્રા ચોગ્રદંડા કોટવી ચ પપૌ મધુ ॥
અન્યાશ્ચ દેવ્યસ્તત્રાજૌ નનૃતુર્મધુ સંપપુઃ

મહાન્ કોલાહલો જાતો ગણદેવદલે તદા॥
જહૃષુર્બહુગર્જંતસ્સર્વે સુરગણાદયઃ

દૃષ્ટ્વા કાલીં શંખચૂડશ્શીઘ્રમાજૌ સમાયયૌ ॥
દાનવાશ્ચ ભયં પ્રાપ્તા રાજા તેભ્યોઽભયં દદૌ

કાલી ચિક્ષેપ વહ્નિં ચ પ્રલયાગ્નિશિખોપમમ્॥
રાજા જઘાન તં શીઘ્રં વૈષ્ણવાંકિતલીલયા

નારાયણાસ્ત્રં સા દેવી ચિક્ષેપ તદુપર્યરમ્ ॥
વૃદ્ધિં જગામ તચ્છસ્ત્રં દૃષ્ટ્વા વામં ચ દાનવમ્

તં દૃષ્ટ્વા શંખચૂડશ્ચ પ્રલયાગ્નિશિખોપમમ્॥
પપાત દંડવદ્ભૂમૌ પ્રણનામ પુનઃપુનઃ

નિવૃત્તિં પ્રાપ તચ્છ્સ્ત્રં દૃષ્ટ્વા નમ્રં ચ દાનવમ્ ॥
બ્રહ્માસ્ત્રમથ સા દેવી ચિક્ષેપ મંત્રપૂર્વકમ્

તં દૃષ્ટ્વા પ્રજ્જ્વલંતં ચ પ્રણમ્ય ભુવિ સંસ્થિતઃ ॥
બ્રહ્માસ્ત્રેણ દાનવેન્દ્રો વિનિવારં ચકાર હ

અથ ક્રુદ્ધો દાનવેન્દ્રો ધનુરાકૃષ્ય રંહસા ॥
ચિક્ષેપ દિવ્યાન્યસ્ત્રાણિ દેવ્યૈ વૈ મંત્રપૂર્વકમ્

આહારં સમરે ચક્રે પ્રસાર્ય મુખમાયતમ્ ॥
જગર્જ સાટ્ટહાસં ચ દાનવા ભયમાયયુઃ

કાલ્યૈ ચિક્ષેપ શક્તિં સ શતયોજનમાયતામ્ ॥
દેવી દિવ્યાસ્ત્રજાલેન શતખંડં ચકાર સા

સ ચ વૈષ્ણવમસ્ત્રં ચ ચિક્ષેપ ચંડિકોપરિ ॥
માહેશ્વરેણ કાલી ચ વિનિવારં ચકાર સા

એવં ચિરતરં યુદ્ધમન્યોન્યં સંબભૂવ હ॥
પ્રેક્ષકા અભવન્સર્વે દેવાશ્ચ દાનવા અપિ

અથ કુદ્ધા મહાદેવી કાલી કાલસમા રણે॥
જગ્રાહ મન્ત્રપૂતં ચ શરં પાશુપતં રુષા

ક્ષેપાત્પૂર્વં તન્નિષેદ્ધું વાગ્બભૂવાશરીરિણી॥
ન ક્ષિપાસ્ત્રમિદં દેવિ શંખચૂડાય વૈ રુષા

મૃત્યુઃ પાશુપતાન્નાસ્ત્યમોઘાદપિ ચ ચંડિકે॥
શંખચૂડસ્ય વીરસ્યોપાયમન્યં વિચારય

ઇત્યાકર્ણ્ય ભદ્રકાલી ન ચિક્ષેપ તદસ્ત્રકમ્ ॥
શતલક્ષં દાનવાનાં જઘાસ લીલયા ક્ષુધા

અત્તું જગામ વેગેન શંખચૂડં ભયંકરી॥
દિવ્યાસ્ત્રેણ ચ રૌદ્રેણ વારયામાસ દાનવઃ

અથ ક્રુદ્ધો દાનવેન્દ્રઃ ખડ્ગં ચિક્ષેપ સત્વરમ્ ॥
ગ્રીષ્મસૂર્યોપમં તીક્ષ્ણધારમત્યંતભીકરમ્

સા કાલી તં સમાલોક્યાયાંતં પ્રજ્વલિતં રુષા ॥
પ્રસાર્ય મુખમાહારં ચક્રે તસ્ય ચ પશ્યતઃ

દિવ્યાન્યસ્ત્રાણિ ચાન્યાનિ ચિચ્છેદ દાનવેશ્વરઃ ॥
પ્રાપ્તાનિ પૂર્વતશ્ચક્રે શતખંડાનિ તાનિ ચ

પુનરત્તું મહાદેવી વેગતસ્તં જગામ હ ॥
સર્વસિદ્ધેશ્વરઃ શ્રીમાનંતર્ધાનં ચકાર સઃ

વેગેન મુષ્ટિના કાલી તમદૃષ્ટ્વા ચ દાનવમ્ ॥
બભંજ ચ રથં તસ્ય જઘાન કિલ સારથિમ્

અથાગત્ય દ્રુતં માયી ચક્રં ચિક્ષેપ વેગતઃ ॥
ભદ્રકાલ્યૈ શંખચૂડઃ પ્રલયાગ્નિશિખો પમમ્

સા દેવી તં તદા ચક્રં વામહસ્તેન લીલયા ॥
જગ્રાહ સ્વમુખેનૈવાહારં ચક્રે રુષા દ્રુતમ્

।
મુષ્ટ્યા જઘાન તં દેવી મહાકોપેન વેગતઃ ॥
બભ્રામ દાનવેન્દ્રોપિ ક્ષણં મૂર્ચ્છામવાપ સઃ

ક્ષણેન ચેતનાં પ્રાપ્ય સ ચોત્તસ્થૌ પ્રતાપવાન્॥
ન ચક્રે બાહુ યુદ્ધં ચ માતૃબુદ્ધ્યા તયા સહ

ગૃહીત્વા દાનવં દેવી ભ્રામયિત્વા પુનઃપુનઃ ॥
ઊર્દ્ધ્વં ચ પ્રાપયામાસ મહાકોપેન વેગતઃ

ઉત્પપાત ચ વેગેન શંખચૂડઃ પ્રતાપવાન્ ॥
નિપત્ય ચ સમુત્તસ્થા પ્રણમ્ય ભદ્રકાલિકામ્

રત્નેન્દ્રસારનિર્માણવિમાનં સુમનો હરમ્ ॥
આરુરોહ સ હૃષ્ટાત્મા ન ભ્રાન્તોપિ મહારણે

દાનવાનાં હિ ક્ષતજં સા પપૌ કાલિકા ક્ષુધા ॥
એતસ્મિન્નંતરે તત્ર વાગ્વભૂવાશરીરિણી

લક્ષં ચ દાનવેન્દ્રાણામવશિષ્ટં રણેઽધુના ॥
ઉદ્ધતં ગુઞ્જતાં સાર્દ્ધં તતસ્ત્વં ભુંક્ષ્વ ચેશ્વરિ

સંગ્રામે દાનવેન્દ્રં ચ હંતું ન કુરુ માનસમ્ ॥
અવધ્યોયં શંખચૂડસ્તવ દેવીતિ નિશ્ચયમ્

તચ્છુત્વા વચનં દેવી નિઃસૃતં વ્યોમમંડલાત્॥
દાનવાનાં બહૂનાં ચ માંસં ચ રુધિરં તથા

ભુક્ત્વા પીત્વા ભદ્રકાલી શંકરાંતિકમાયયૌ ॥
ઉવાચ રણવૃત્તાંતં પૌર્વાપર્યેણ સક્રમમ્

ઇતિ શ્રીશિવમહાપુરાણે દ્વિ૦ રુદ્રસં૦પં૦યુદ્ધખંડે શંખચૂડવધે કાલીયુદ્ધવર્ણનં નામાષ્ટત્રિંશોઽધ્યાયઃ