શિવ પુરાણ · અધ્યાય 2.5.36

સનત્કુમાર ઉવાચ ॥
સ દૂતસ્તત્ર ગત્વા ચ શિવવાક્યં જગાદ હ ॥
સવિસ્તરં યથાર્થં ચ નિશ્ચયં તસ્ય તત્ત્વતઃ

તચ્છુત્વા શંખચૂડોઽસૌ દાનવેન્દ્રઃ પ્રતાપવાન્ ॥
અંગીચકાર સુપ્રીત્યા રણમેવ સ દાનવઃ

સમારુરોહ યાનં ચ સહામાત્યૈશ્ચ સત્વરઃ॥ ॥
આદિદેશ સ્વસૈન્યં ચ યુદ્ધાર્થં શંકરેણ ચ

શિવસ્સ્વસૈન્યં દેવાંશ્ચ પ્રેરયામાસ સત્વરઃ ॥
સ્વયમપ્યખિલેશોપિ સન્નદ્ધોભૂચ્ચ લીલયા

યુદ્ધારંભો બભૂવાશુ નેદુર્વાદ્યાનિ ભૂરિશઃ ॥
કોલાહલશ્ચ સંજાતો વીરશબ્દસ્તથૈવ ચ

દેવદાનવયોર્યુદ્ધં સ્પરમભૂન્મુને ॥
ધર્મતો યુયુધે તત્ર દેવદાનવયોર્ગણઃ

સ્વયં મહેન્દ્રો યુયુધે સાર્ધં ચ વૃષપર્વણા ॥
ભાસ્કરો યુયુધે વિપ્રચિત્તિના સહ ધર્મતઃ

દંભેન સહ વિષ્ણુશ્ચ ચકાર પરમં રણમ્ ॥
કાલાસુરેણ કાલશ્ચ ગોકર્ણેન હુતાશનઃ

કુબેરઃ કાલકેયેન વિશ્વકર્મા મયેન ચ ॥
ભયંકરેણ મૃત્યુશ્ચ સંહારેણ યમસ્તથા

કાલમ્બિકેન વરુણશ્ચંચલેન સમીરણઃ ॥
બુધશ્ચ ઘટપૃષ્ઠેન રક્તાક્ષેણ શનૈશ્ચરઃ

જયન્તો રત્નસારેણ વસવો વર્ચસાં ગણૈઃ ॥
અશ્વિનૌ દીપ્તિમદ્ભ્યાં ચ ધૂમ્રેણ નલકૂબરઃ

ધુરંધરેણ ધર્મશ્ચ ગણકાક્ષેણ મંગલઃ ॥
શોભાકરેણ વૈશ્વાનઃ પિપિટેન ચ મન્મથઃ

ગોકામુખેન ચૂર્ણેન ખડ્ગનામ્નાઽસુરેણ ચ ॥
ધૂમ્રેણ સંહલેનાપિ વિશ્વેન ચ પ્રતાપિના

પલાશેન દ્વાદશાઽર્કા યુયુધુર્ધર્મતઃ પરે ॥
અસુરૈરમરાસ્સાર્દ્ધં શિવસાહાય્યશાલિનઃ

એકાદશ મહારુદ્રાશ્ચૈકાદશભયંકરૈઃ॥
અસુરૈર્યુયુધુર્વીરૈર્મૈહાબલપરાક્રમૈઃ

મહામણિશ્ચ યુયુધે ચોગ્રચંડાદિભિસ્સહ ॥
રાહુણા સહ ચન્દ્રશ્ચ જીવઃ શુક્રેણ ધર્મતઃ

નન્દીશ્વરાદયસ્સર્વે દાનવપ્રવરૈસ્સહ ॥
યુયુધુશ્ચ મહાયુદ્ધે નોક્તા વિસ્તરતઃ પૃથક્

વટમૂલે તદા શંભુસ્તસ્થૌ કાલ્યાઃ સુતેન ચ ॥
સર્વે ચ યુયુધુસ્સૈન્યસમૂહાસ્સતતં મુને

રત્નસિંહાસને રમ્યે કોટિદાનવસંયુતઃ ॥
ઉવાસ શંખચૂડશ્ચ રત્નભૂષણભૂષિતઃ

મહાયુદ્ધો બભૂવાથ દેવાસુરવિમર્દનઃ ॥
નાનાયુધાનિ દિવ્યાનિ ચલંતિસ્મ મહામૃધે

ગદર્ષ્ટિપટ્ટિશાશ્ચક્રભુશુંડિપ્રાસમુદ્ગરાઃ ॥
નિસ્ત્રિંશભલ્લપરિઘાઃ શક્ત્યુન્મુખપરશ્વધાઃ

શરતોમરખડ્ગાશ્ચ શતઘ્ન્યશ્ચ સહસ્રશઃ ॥
ભિંદિપાલાદયશ્ચાન્યે વીરહસ્તેષુ શોભિતાઃ

શિરાંસિ ચિચ્છિદુશ્ચૈભિર્વીરાસ્તત્ર મહો ત્સવાઃ ॥
વીરાણામુભયોશ્ચૈવ સૈન્યયોર્ગર્જતો રણે

ગજાસ્તુરંગા બહવઃ સ્યન્દનાશ્ચ પદાતયઃ ॥
સારોહવાહા વિવિધાસ્તત્રાસન્ સુવિખંડિતાઃ

નિકૃત્તબાહૂરુકરકટિકર્ણયુગાંઘ્રયઃ ॥
સંછિન્નધ્વજબાણાસિતનુત્ર વરભૂષણાઃ

સમુદ્ધતકિરીટૈશ્ચ શિરોભિસ્સહ કુંડલૈઃ ॥
સંરંભનષ્ટૈરાસ્તીર્ણા બભૌ ભૂઃ કરભોરુભિઃ

મહાભુજૈસ્સાભરણૈસ્સંછિન્નૈસ્સાયુધૈસ્તથા ॥
અંગૈરન્યૈશ્ચ સહસા પટલૈર્વા સસારઘૈઃ

મૃધે ભટાઃ પ્રધાવંતઃ કબંધાન્ સ્વશિરોક્ષિભિઃ ॥
પશ્યંતસ્તત્ર ચોત્પેતુરુદ્યતાયુધસદ્ભુજૈઃ

વલ્ગંતોઽતિતરાં વીરા યુયુધુશ્ચ પરસ્પરમ્ ॥
શસ્ત્રાસ્ત્રૈર્વિવિધૈસ્તત્ર મહાબલપરાક્રમાઃ

કેચિત્સ્વર્ણમુખૈર્બાણૈર્વિનિહત્ય ભટાન્મૃધે ॥
વ્યનદન્ વીરસન્નાદં સતોયા ઇવ તોયદાઃ

સર્વતશ્શરકૂટેન વીરસ્સરથસારથિમ્ ॥
વીરં સંછાદયામાસ પ્રાવૃટ્સૂર્યમિવાંબુદઃ

અન્યોન્યમભિસંસૃત્ય યુયુધુર્દ્વન્દ્વયોધિનઃ ॥
આહ્વયંતો વિશંતોઽગ્રે ક્ષિપંતો મર્મભિર્મિથઃ

સર્વતો વીરસંઘાશ્ચ નાનાબાહુધ્વજાયુધાઃ ॥
વ્યદૃશ્યંત મહાસંખ્યે કુર્વંતઃ સિંહસંરવમ્

મહારવાન્સ્વશંખાંશ્ચ વિદધ્મુર્વૈ પૃથક્ પૃથક્॥
વલ્ગનં ચક્રિરે તત્ર મહાવીરાઃ પ્રહર્ષિતાઃ

એવં ચિરતરં કાલં દેવદાનવયોર્મહત્ ॥
બભૂવ યુદ્ધં વિકટં કરાલં વીરહર્ષદમ્

મહાપ્રભોશ્ચ લીલેયં શંકરસ્ય પરાત્મનઃ॥
યયા સમીહિતં સર્વં સદેવાસુરમાનુષમ્

॥
ઇતિ શ્રીશિવમહાપુરાણે દ્વિતીયાયાં રુદ્રસંહિતાયાં પઞ્ચમે યુદ્ધખંડે શંખચૂડવધે પરસ્પરયુદ્ધવર્ણનં નામ ષટ્ત્રિંશોઽધ્યાયઃ