શિવ પુરાણ · અધ્યાય 2.5.33

સનત્કુમાર ઉવાચ ॥
તસ્ય તદ્વાક્યમાકર્ણ્ય સુરરાટ્ તતઃ ॥
સક્રોધઃ પ્રાહ ગિરિશો વીરભદ્રાદિકાન્ગણાન્

રુદ્ર ઉવાચ ॥
હે વીરભદ્ર હે નંદિન્ક્ષેત્રપાલષ્ટભૈરવાઃ ॥
સર્વે ગણાશ્ચ સન્નદ્ધાસ્સાયુધા બલશાલિનઃ

કુમારાભ્યાં સહૈવાદ્ય નિર્ગચ્છંતુ મમાજ્ઞયા॥
સ્વસેનયા ભદ્રકાલી નિર્ગચ્છતુ રણાય ચ॥
શંખચૂડવધાર્થાય નિર્ગચ્છામ્યદ્ય સત્વરમ્ ॥

સનત્કુમાર ઉવાચ ॥
ઇત્યાજ્ઞાપ્ય મહેશાનો નિર્યયૌ સૈન્યસંયુતઃ ॥
સર્વે વીરગણાસ્તસ્યાનુ યયુસ્સંપ્રહર્ષિતાઃ

એતસ્મિન્નંતરે સ્કંદગણેશૌ સર્વસૈન્યપૌ ॥
યતતુર્મુદિતૌ નદ્ધૌ સાયુધૌ ચ શિવાંતિકે

વીરભદ્રશ્ચ નન્દી ચ મહાકાલસ્સુભદ્રકઃ ॥
વિશાલાક્ષશ્ચ બાણશ્ચ પિંગલાક્ષો વિકંપનઃ

॥
વિરૂપો વિકૃતિશ્ચૈવ મણિભદ્રશ્ચ બાષ્કલઃ ॥
કપિલાખ્યો દીર્ઘદંષ્દ્રો વિકરસ્તામ્રલોચનઃ

કાલંકરો બલીભદ્રઃ કાલજિહ્વઃ કુટીચરઃ ॥
બલોન્મત્તો રણશ્લાઘ્યો દુર્જયો દુર્ગમસ્તથા

ઇત્યાદયો ગણેશાનાસ્સૈન્યાનાં પતયો વરાઃ ॥
તેષાં ચ ગણનાં વચ્મિ સાવધાનતયા શૃણુ

શંખકર્ણઃ કોટિગણૈર્યુતઃ પરવિમર્દકઃ ॥
દશભિઃ કેકરાક્ષશ્ચ વિકૃતોઽષ્ટાભિરેવ ચ

ચતુષ્ષષ્ટ્યા વિશાખશ્ચ નવભિઃ પારિયાત્રિકઃ ॥
ષડ્ભિસ્સર્વાન્તકઃ શ્રીમાંસ્ત થૈવ વિકૃતાનનઃ

જાલકો હિ દ્વાદશભિઃ કોટિભિર્ગણપુંગવઃ ॥
સપ્તભિસ્સમદઃ શ્રીમાન્દુન્દુભોઽષ્ટાભિરેવ ચ

પંચભિશ્ચ કરાલાક્ષઃ ષડ્ભિસ્સંદારકો વરઃ ॥
કોટિકોટિભિરેવેહ કંદુકઃ કુંડકસ્તથા

વિષ્ટંભોઽષ્ટાભિરેવેહ ગણપસ્સર્વસ ત્તમઃ ॥
પિપ્પલશ્ચ સહસ્રેણ સંનાદશ્ચ તથાવિધઃ

આવેશનસ્તથાષ્ટાભિસ્ત્વષ્ટભિશ્ચન્દ્રતાપનઃ ॥
મહાકેશઃ સહસ્રેણ કોટીનાં ગણપો વૃતઃ

કુંડી દ્વાદશભિર્વીરસ્તથા પર્વતકશ્શુભઃ ॥
કાલશ્ચ કાલકશ્ચૈવ મહાકાલશ્શતેન વૈ

અગ્નિકશ્શત કોટ્યા ચ કોટ્યાગ્નિમુખ એવ ચ ॥
આદિત્યો હ્યર્દ્ધકોટ્યા ચ તથા ચૈવં ઘનાવહઃ

સનાહશ્ચ શતેનૈવ કુમુદઃ કોટિભિસ્તથા ॥
અમોઘઃ કોકિલશ્ચૈવ શતકોટ્યા સુમંત્રકઃ

કાકપાદઃ કોટિષષ્ટ્યા ષષ્ટ્યા સંતાનકસ્તથા ॥
મહાબલશ્ચ નવભિઃ પઞ્ચભિર્મધુપિંગલ

નીલો નવત્યા દેવેશઃ પૂર્ણભદ્રસ્તથૈવ ચ ॥
કોટીનાં ચૈવ સપ્તાનાં ચતુર્વક્ત્રો મહાબલઃ

કોટિકોટિસહસ્રાણાં શતૈર્વિંશતિભિસ્તથા ॥
તત્રાજગ્મુસ્તથા વીરાસ્તે સર્વે સંગરોત્સવે

ભૂતકોટિસહસ્રેણ પ્રમથૈર્કોટિભિ સ્ત્રિભિઃ ॥
વીરભદ્રશ્ચતુષ્ષષ્ટ્યા લોમજાનાં ત્રિકોટિભિઃ

કાષ્ઠારૂઢશ્ચતુઃષષ્ટ્યા સુકેશો વૃષભસ્તથા ॥
વિરૂપાક્ષશ્ચ ભગવાંશ્ચતુષ્ષષ્ટ્યા સનાતનઃ

તાલકેતુઃ ષડાસ્યશ્ચ પંચાસ્યશ્ચ પ્રતાપવાન્ ॥
સંવર્તકસ્તથા ચૈત્રો લંકુલીશસ્સ્વયં પ્રભુઃ

લોકાંતકશ્ચ દીપ્તાત્મા તથા દૈત્યાંતકઃ પ્રભુઃ ॥
દેવો ભૃઙ્ગીરિટિઃ શ્રીમાન્દેવદેવપ્રિયસ્તથા

અશનિર્ભાનુકશ્ચૈવ ચતુઃ ષષ્ટ્યા સહસ્રશઃ ॥
કંકાલઃ કાલકઃ કાલો નન્દી સર્વાન્તકસ્તથા

એતે ચાન્યે ચ ગણપા અસંખ્યાતા મહાબલાઃ॥
યુદ્ધાર્થં નિર્યયુઃ પ્રીત્યા શંખચૂડેન નિર્ભયાઃ

સર્વે સહસ્રહસ્તાશ્ચ જટામુકુટધારિણઃ ॥
ચન્દ્રરેખાવતંસાશ્ચ નીલકંઠાસ્ત્રિલોચનાઃ

રુદ્રાક્ષાભરણાસ્સર્વે તથા સદ્ભસ્મધારિણઃ ॥
હારકુંડલકેયૂરમુકુટાદ્યૈરલંકૃતાઃ

બ્રહ્મેન્દ્રવિષ્ણુસંકાશા અણિમાદિગુણૈર્વૃતાઃ ॥
સૂર્યકોટિપ્રતીકાશાઃ પ્રવીણા યુદ્ધકર્મણિ

પૃથિવીચારિણઃ કેચિત્કેચિત્પાતાલચારિણઃ ॥
કેચિદ્વ્યોમચરાઃ કેચિત્સપ્તસ્વર્ગચરા મુને

કિં બહૂક્તેન દેવર્ષે સર્વલોકનિવાસિનઃ ॥
યયુશ્શિવગણાસ્સર્વે યુદ્ધાર્થં દાનવૈસ્સહ

અષ્ટૌ ચ ભૈરવા રૌદ્રા રુદ્રા શ્ચૈકાદશાશુ યે॥
વસવોઽષ્ટૌ વાસવશ્ચાદિત્યા દ્વાદશ તે દ્રુતમ્

હુતાશનશ્ચ ચન્દ્રશ્ચ વિશ્વકર્માશ્વિનૌ ચ તૌ ॥
કુબેરશ્ચ યમશ્ચૈવ નિરૃતિર્નલકૂબરઃ

વાયુશ્ચ વરુણશ્ચૈવ બુધશ્ચ મંગલશ્ચ વૈ ॥
ગ્રહાશ્ચાન્યે મહેશેન કામદેવશ્ચ વીર્યવાન્

ઉગ્રદંષ્ટ્રશ્ચોગ્રદણ્ડઃ કોરટઃ કોટભસ્તથા ॥
સ્વયં શતભુજા દેવી ભદ્રકાલી મહેશ્વરી

રત્નેન્દ્રસારનિર્માણવિમાનોપરિ સંસ્થિતા॥ ।
રક્તવસ્ત્રપરીધાના રક્તમાલ્યાનુલેપના

નૃત્યંતી ચ હસંતી ચ ગાયંતી સુસ્વરં મુદા ॥
અભયં દદતી સ્વેભ્યો ભયં ચારિભ્ય એવ સા

બિભ્રતી વિકટાં જિહ્વાં સુલોલાં યોજનાયતામ્ ॥
શંખચક્રગદાપદ્મખઙ્ગચર્મધનુશ્શરાન્

ખર્પરં વર્તુલાકારં ગંભીરં યોજનાયતમ્॥
ત્રિશૂલં ગગનસ્પર્શિં શક્તિં ચ યોજનાયતામ્

મુદ્ગરં મુસલં વક્ત્રં ખઙ્ગં ફલકમુલ્બણમ્ ॥
વૈષ્ણવાસ્ત્રં વારુણાસ્ત્રં વાયવ્યં નાગપાશકમ્

નારાયણાસ્ત્રં ગાંધર્વં બ્રહ્માસ્ત્રં ગારુડં તથા ॥
પાર્જન્યં ચ પાશુપતં જૃંભણાસ્ત્રં ચ પાર્વતમ્

મહાવીરં ચ સૌરં ચ કાલકાલં મહાનલમ્ ॥
મહેશ્વરાસ્ત્રં યામ્યં ચ દંડં સંમોહનં તથા

સમર્થમસ્ત્રકં દિવ્યં દિવ્યાસ્ત્રં શતકં પરમ્॥
બિભ્રતી ચ કરૈસ્સર્વૈરન્યાન્યપિ ચ સા તદા

આગત્ય તસ્થૌ સા તત્ર યોગિનીનાં ત્રિકોટિભિઃ ॥
સાર્દ્ધં ચ ડાકિનીનાં વૈ વિકટાનાં ત્રિકોટિભિઃ

ભૂતપ્રેતપિશાચાશ્ચ કૂષ્માણ્ડા બ્રહ્મરાક્ષસાઃ ॥
વેતાલા રાક્ષસાશ્ચૈવ યક્ષાશ્ચૈવ સકિન્નરાઃ

તશ્ચૈવાભિવૃતઃ સ્કંદઃ પ્રણમ્ય ચન્દ્રશેખરમ્ ॥
પિતુઃ પાર્શ્વે સહાયો યઃ સમુવાસ તદાજ્ઞયા

અથ શમ્ભુસ્સમાનીય સ્વસૈન્યં સકલં તદા॥
યુદ્ધાર્થમગમદ્રુદ્રશ્શંઙ્ખચૂડેન નિર્ભયઃ

ચન્દ્રભાગાનદીતીરે વટમૂલે મનોહરે ॥
તત્ર તસ્થૌ મહાદેવો દેવનિસ્તા રહેતવે

ઇતિ શ્રીશિવમહાપુરાણે દ્વિતીયાયાં રુદ્રસંહિતાયાં પઞ્ચમે યુદ્ધખણ્ડે શઙ્ખચૂડવધે મહાદેવયુદ્ધયાત્રાવર્ણનં નામ ત્રય સ્ત્રિંશત્તમોઽધ્યાયઃ