Shiva Purana · Chapter 2.5.28

sanatkumāra uvāca//
tataśca śaṃkhacūḍo'sau jaigīṣavyopadeśataḥ //
tapaścakāra suprītyā brahmaṇaḥ puṣkare ciram

gurudattāṃ brahmavidyāṃ jajāpa niyatendriyaḥ//
sa ekāgramanā bhūtvā karaṇāni nigṛhya ca

tapaṃtaṃ puṣkare taṃ vai śaṃkhacūḍaṃ ca dānavam //
varaṃ dātuṃ jagāmāśu brahmālokagururvibhuḥ

varaṃ brūhīti provāca dānavendraṃ vidhistadā//
sa dṛṣṭvā taṃ nanāmāti namrastuṣṭāva sadgirā

varaṃ yayāce brahmāṇamajeyatvaṃ divaukasām//
tathetyāha vidhistaṃ vai suprasannena cetasā

śrīkṛṣṇakavacaṃ divyaṃ jaganmaṃgalamaṃgalam//
dattavāñśaṃkhacūḍāya sarvatra vijayapradam

badarīṃ saṃprayāhi tvaṃ tulasyā saha tatra vai //
vivāhaṃ kuru tatraiva sā tapasyati kāmataḥ

dharmadhvajasutā seti saṃdideśa ca taṃ vidhiḥ //
antardhānaṃ jagāmāśu paśyatastasya tatkṣaṇāt

tatassa śaṃkhacūḍo hi tapaḥsiddho'tipuṣkare //
gale babaṃdha kavacaṃ jaganmaṃgalamaṃgalam

ājñayā brāhmaṇasso'pi tapaḥsiddhamanorathaḥ//
samāyayau prahṛṣṭāsyastūrṇaṃ badarikāśramam

yadṛcchayā''gatastatra śaṃkhacūḍaśca dānavaḥ//
tapaścarantī tulasī yatra dharmadhvajātmajā

surūpā susmitā tanvī śubhabhūṣaṇabhūṣitā//
sakaṭākṣaṃ dadarśāsau tameva puruṣaṃ param

dṛṣṭvā tāṃ lalitā ramyāṃ suśīlāṃ sundarīṃ satīm //
uvāsa tatsamīpe tu madhuraṃ tāmuvāca saḥ

śaṃkhacūḍa uvāca //
kā tvaṃ kasya sutā tvaṃ hi kiṃ karoṣi sthitātra kim //
maunībhūtā kiṃkaraṃ māṃ saṃbhāvitumihārhasi

sanatkumāra uvāca//
ityevaṃ vacanaṃ śrutvā sakāmaṃ tamuvāca sā

tulasyuvāca //
dharmadhvajasutāhaṃ ca tapasyāmi tapasvinī//
tapovane ca tiṣṭhāmi kastvaṃ gaccha yathāsukham

nārījātirmohinī ca brahmādīnāṃ viṣopamā //
nindyā doṣakarī māyā śṛṃkhalā hyanuśāyinām

sanatkumāra uvāca //
ityuktvā tulasī taṃ ca sarasaṃ virarāma ha //
dṛṣṭvā tāṃ sasmitāṃ sopi pravaktumupacakrame

śaṃkhacūḍa uvāca //
tvayā yatkathitaṃ devi na ca sarvamalīkakam //
kiñcitsatyamalīkaṃ ca kiṃcinmatto niśāmaya

pativratāḥ striyo yāśca tāsāṃ madhye tvamagraṇīḥ //
na cāhaṃ pāpadṛkkāmī tathā tvaṃ neti dhīrmama

āgacchāmi tvatsamīpamājñayā brahmaṇo'dhunā//
gāṃdharveṇa vivāhena tvāṃ grahīṣyāmi śobhane

śaṃkhacūḍo'hamevāsmi devavidrāvakārakaḥ //
māṃ na jānāsi kiṃ bhadre na śruto'haṃ kadācana

danuvaṃśyo viśeṣeṇa manda putraśca dānavaḥ //
sudāmā nāma gopohaṃ pārṣadaśca hareḥ purā

adhunā dānavendro'haṃ rādhikāyāśca śāpataḥ //
jātismaro'haṃ jānāmi sarvaṃ kṛṣṇaprabhāvataḥ

// sanatkumāra uvāca //
evamuktvā śaṃkhacūḍo virarāma ca tatpuraḥ//
dānaveṃdreṇa setyuktā vacanaṃ satyamādarāt //
sasmitaṃ tulasī tuṣṭā pravaktumupacakrame

tulasyuvāca //
tvayāhamadhunā // sattvavicāreṇa parājitā//
sa dhanyaḥ puruṣo loke na striyā yaḥ parājitaḥ

satkriyopyaśucirnityaṃ sa pumānyaḥ striyā jitaḥ //
nindaṃti pitaro devā mānavāssakalāśca tam

śudhyedvipro daśāhena jātake mṛtasūtake //
kṣatriyo dvādaśāhena vaiśyaḥ pañcadaśāhataḥ

śūdro māsena śudhyettu hīti vedānuśāsanam //
na śuciḥ strījitaḥ kvāpi citādāhaṃ vinā pumān

na gṛhṇatīcchayā tasmātpitaraḥ piṇḍatarpaṇam //
na gṛhṇanti surāstena dattaṃ puṣpaphalādikam

tasya kiṃ jñānasutapo japahoma prapūjanaiḥ //
vidyayā dānataḥ kiṃ vā strībhiryasya mano hṛtam

vidyāprabhāvajñānārthaṃ mayā tvaṃ ca parīkṣitaḥ //
kṛtvā kāṃtaparīkṣāṃ vai vṛṇuyātkāminī varam

sanatkumāra uvāca //
ityevaṃ pravadaṃtyāṃ tu tulasyāṃ tatkṣaṇe vidhiḥ //
tatrājagāma saṃsṛṣṭā provāca vacanaṃ tataḥ

brahmovāca //
kiṃ karoṣi śaṃkhacūḍa saṃvādamanayā saha //
gāṃdharveṇa vivāhena tvamasyā grahaṇaṃ kuru

tvaṃ vai puruṣaratnaṃ ca strīratnaṃ ca tviyaṃ satī //
vidagdhāyā vidagdhena saṃgamo guṇavān bhavet

nirvirodhaṃ sukhaṃ rājan ko vā tyajati durlabham //
yo'virodhasukhatyāgī sa paśurnātra saṃśayaḥ

kiṃ tvaṃ parīkṣase kāṃtamīdṛśaṃ guṇinaṃ sati //
devānāmasurāṇāṃ ca dānavānāṃ vimardakam

anena sārddhaṃ suciraṃ vihāraṃ kuru sarvadā //
sthānesthāne yathecchaṃ ca sarvalokeṣu sundari

aṃte prāpsyati goloke śrīkṛṣṇaṃ punareva saḥ //
caturbhujaṃ ca vaikuṇṭhe mṛte tasmiṃstvamāpsyasi

sanatkumāra uvāca//
ityevamāśiṣaṃ dattvā svālayaṃ tu yayau vidhiḥ//
gāṃdharveṇa vivāhena jagṛhe tāṃ ca dānavaḥ

evaṃ vivāhya tulasīṃ pituḥ sthānaṃ jagāma ha//
sa reme ramayā sārddhaṃ vāsagehe manorame

iti śrīśivamahāpurāṇe dvitīyāyāṃ rudrasaṃhitāyāṃ pañcame yuddhakhaṇḍe śaṃkhacūḍatapaḥkaraṇavivāhavarṇanaṃ nāmāṣṭaviṃśo'dhyāyaḥ