Shiva Purana · Chapter 2.5.27

sanatkumāra uvāca//
athānyacchaṃbhucaritaṃ premataḥ śṛṇu vai mune//
yasya śravaṇamātreṇa śivabhaktirdṛḍhā bhavet

śaṃkhacūḍābhidho vīro dānavo devakaṃṭakaḥ//
yathā śivena nihato raṇamūrdhni triśūlataḥ

tacchaṃbhucaritaṃ divyaṃ pavitraṃ pāpanāśanam //
śṛṇu vyāsa susaṃprītyā vacmi susnehatastava

marīcestanayo dhātuḥ putro yaḥ kaśyapo muniḥ //
sa dharmiṣṭhassṛṣṭikarttā vidhyājñaptaḥ prajāpatiḥ

dakṣaḥ prītyā dadau tasmai nijakanyāstrayodaśa//
tāsāṃ prasūtiḥ prasabhaṃ na kathyā bahuvistṛtāḥ

yatra devādinikhilaṃ carācaramabhūjjagat//
vistarāttatpravaktuṃ ca kaḥ kṣamo'sti trilokake

prastutaṃ śṛṇu vṛttāṃtaṃ śaṃbhulīlānvitaṃ ca yat //
tadeva kathayāmyadya śṛṇu bhaktipra varddhanam

tāsu kaśyapatnīṣu danustvekā varāṃganā //
mahārūpavatī sādhvī patisaubhāgyavarddhitā

āsaṃstasyā danoḥ putrā bahavo balavattarāḥ //
teṣāṃ nāmāni nocyaṃte vistārabhayato mune

teṣveko vipracittistu mahābalaparākramaḥ //
tatputro dhārmiko daṃbho viṣṇubhakto jitendriyaḥ

nāsīttattanayo vīrastataściṃtāparo'bhavat//
śukrācāryaṃ guruṃ kṛtvā kṛṣṇamaṃtramavāpya ca

tapaścakāra paramaṃ puṣkare lakṣavarṣakam //
kṛṣṇamaṃtraṃ jajāpaiva dṛḍhaṃ baddhāsanaṃ ciram

tapaḥ prakurvatastasya mūrdhno nissṛtya prajva lat //
visasāra ca sarvatra tattejo hi sudussaham

tena taptāssurāssarve munayo manavastathā //
sunāsīraṃ puraskṛtya brahmāṇaṃ śaraṇaṃ yayuḥ

praṇamya ca vidhātāraṃ dātāraṃ sarvasaṃpadām //
tuṣṭuvurvikalāḥ procuḥ svavṛttāṃtaṃ viśeṣataḥ

tadākarṇya vidhātāpi vaikuṃṭhaṃ tairyayau saha //
tadeva vijñāpayituṃ nikhilena hi viṣṇave

tatra gatvā trilokeśaṃ viṣṇuṃ rakṣākaraṃ param //
praṇamya tuṣṭuvussarve karau baddhvā vinamrakāḥ

devā ūcuḥ //
devadeva na jānīmo jātaṃ kiṃ kāraṇaṃ tviha //
saṃtaptāssa kalā jātāstejasā kena tadvada

taptātmanāṃ tvamavitā dīnabaṃdho'nujīvinām //
rakṣarakṣa ramānātha śaraṇyaśśaraṇāgatān

// sanatkumāra uvāca //
iti śrutvā vaco viṣṇurbrahmādīnāṃ divaukasām //
uvāca vihasanpremṇā śaraṇāgatavatsalaḥ

// viṣṇuruvāca //
susvasthā bhavatāvyagrā na bhayaṃ kurutāmarāḥ //
nopaplavā bhaviṣyante layakālo na vidyate

dānavo daṃbhanāmā hi madbhaktaḥ kurute tapaḥ //
putrārthī śamayiṣyāmi tamahaṃ varadānataḥ

sanatkumāra uvāca //
ityuktāste surāssarve dhairyamālaṃbya vai mune //
yayurbrahmādayassusthāssvasvadhāmāni sarvaśaḥ

acyuto'pi varaṃ dātuṃ puṣkaraṃ saṃjagāma ha //
tapaścarati yatrāsau daṃbhanāmā hi dānavaḥ

tatra gatvā varaṃ brūhītyuvāca parisāṃtvayan //
girā sūnṛtayā bhaktaṃ japaṃtaṃ svamanuṃ hariḥ

tacchrutvā vacanaṃ viṣṇordṛṣṭvā taṃ ca puraḥ sthitam //
praṇanāma mahābhaktyā tuṣṭvāva ca punaḥ punaḥ

daṃbha uvāca //
devadeva namaste'stu puṃḍarīkavilocana //
ramānātha trilokeśa kṛpā kuru mamopari

svabhaktaṃ tanayaṃ dehi mahābala parākramam //
trilokajayinaṃ vīramajeyaṃ ca divaukasām

sanatkumāra uvāca //
ityukto dānavendreṇa taṃ varaṃ pradadau hariḥ //
nivartya cogratapasastatassoṃtaradhānmune

gate harau dānavendraḥ kṛtvā tasyai diśe namaḥ //
jagāma svagṛhaṃ siddhatadāḥ pūrṇa manorathaḥ

kālenālpena tatpatnī sagarbhā bhāgyavatyabhūt //
rarāja tejāsātyaṃtaṃ rocayaṃtī gṛhāṃtaram

sudāmānāma gopo yo kṛṣṇasya pārṣadāgraṇīḥ //
tasyā garbhe viveśāsau rādhāśaptaśca yanmune

asūta samaye sādhvī suprabhaṃ tanayaṃ tataḥ //
jātakaṃ sucakārāsau pitāhūya munīnbahūn

utsavassumahānāsīttasmiñjāte dvijottama //
nāma cakre pitā tasya śaṃkha cūḍeti saddine

piturgehe sa vavṛdhe śuklapakṣe yathā śaśī //
śaiśavebhyastavidyastu sa babhūva sudīptimān

sa bālakrīḍayā nityaṃ pitrorharṣaṃ tatāna ha //
priyo babhūva sarveṣāṃ kulajānāṃ viśeṣataḥ

iti śrīśivamahāpurāṇe dvitīyāyāṃ rudrasaṃhitāyāṃ pañcame yuddhakhaṃḍe śaṃkhacūḍotpattivarṇanaṃ nāma saptaviṃśo'dhyāyaḥ