Shiva Purana · Chapter 2.5.26

vyāsa uvāca //
brahmaputra namaste'stu dhanyastvaṃ śaivasattama //
yacchrāvitā mahādivyā katheyaṃ śāṃkarī śubhā

idānīṃ brūhi suprītyā caritaṃ vaiṣṇavaṃ mune //
sa vṛndāṃ mohayitvā tu kimakārṣītkuto gataḥ

// sanatkumāra uvāca //
śṛṇu vyāsa mahāprājña śaivapravara sattama //
vaiṣṇavaṃ caritaṃ śaṃbhucaritāḍhyaṃ sunirmalam

maunībhūteṣu deveṣu brahmādiṣu maheśvaraḥ //
suprasanno'vadacchaṃbhuśśaraṇāgata vatsalaḥ

śaṃbhuruvāca //
brahmandevavarāssarve bhavadarthe mayā hataḥ //
jalaṃdharo madaṃśopi satyaṃ satyaṃ vadāmyaham

sukhamāpurna vā tātāssatyaṃ brūtāmarāḥ khalu //
bhavatkṛte hi me līlā nirvikārasya sarvadā

sanatkumāra uvāca //
atha brahmādayo devā harṣādutphullalocanāḥ //
praṇamya śirasā rudraṃ śaśaṃsurviṣṇuceṣṭitam

// devā ūcuḥ //
mahādeva tvayā devā rakṣitā śśatrujādbhayāt //
kiṃcidanyatsamudbhūtaṃ tatra kiṃ karavāmahai

vṛndāṃ vimohitā nātha viṣṇunā hi prayatnataḥ //
bhasmībhūtā drutaṃ vahnau paramāṃ gatimāgatā

vṛndālāvaṇyasaṃbhrāṃto viṣṇustiṣṭhati mohitaḥ //
taccitābhasma saṃdhārī tava māyāvimohitaḥ

sa siddhamunisaṃghaiśca bodhito'smābhirādarāt //
na budhyate harissotha tava māyāvimohitaḥ

kṛpāṃ kuru maheśāna viṣṇuṃ bodhaya bodhaya //
tvadadhīnamidaṃ sarvaṃ prākṛtaṃ sacarācaram

sanatkumāra uvāca //
ityākarṇya maheśo hi vacanaṃ tridivaukasām //
pratyuvāca mahālīlassvacchandastānkṛtāṃjalīn

maheśa uvāca //
he brahmanhe surāssarve madvākyaṃ śṛṇutādarāt //
mohinī sarvalokānāṃ mama māyā duratyayā

tadadhīnaṃ jagatsarvaṃ yaddevāsuramānuṣam //
tayaiva mohito viṣṇuḥ kāmādhīno'bhavaddhariḥ

umākhyā sā mahādevī tridevajananī parā //
mūlaprakṛtirākhyātā surāmā girijātmikā

gacchadhvaṃ śaraṇā devā viṣṇumohāpanuttaye //
śaraṇyāṃ mohinīmāyāṃ śivākhyāṃ sarvakāmadām

stutiṃ kuruta tasyāśca macchaktestoṣakāriṇīm //
suprasannā yadi ca sā sarvakāryaṃ kariṣyati

sanatkumāra uvāca //
ityuktvā tānsurāñśaṃbhuḥ pañcāsyo bhagavānharaḥ //
aṃtardadhe drutaṃ vyāsa sarvaiśca svagaṇaissaha

devāśca śāsanācchaṃbhorbrahmādyā hi savāsavā //
manasā tuṣṭuvurmūlaprakṛtiṃ bhaktavatsalām

devā ūcuḥ //
yadudbhavāssattvarajastamoguṇāḥ sargasthitidhvaṃsavidhāna kārakā //
yadicchayā viśvamidaṃ bhavābhavau tanoti mūlaprakṛtiṃ natāḥ sma tām

pāhi trayoviṃśaguṇānsuśabditāñjagatyaśeṣe samadhiṣṭhitā parā //
yadrūpakarmāṇijagattrayo'pi te vidurna mūlaprakṛtiṃ natāḥ sma tām

yadbhaktiyuktāḥ puruṣāstu nityaṃ dāridryamohātyayasaṃbhavādīn //
na prāpnuvaṃtyeva hi bhaktavatsalāṃ sadaiva mūlaprakṛtiṃ natāḥ sma tām

kuru kāryaṃ mahādevi devānāṃ naḥ pareśvari //
viṣṇumohaṃ ha śive durge devi namo'stu te

jalaṃdharasya śaṃbhośca raṇe kailāsavāsinaḥ //
pravṛtte tadvadhārthāya gaurīśāsanataśśive

vṛndā vimohitā devi viṣṇunā hi prayatnataḥ //
svavṛṣāttyājitā vahnau bhasmībhūtā gatiṃ gatā

jalaṃdharo hato yuddhe tadbhayānmo citā vayam //
giriśena kṛpāṃ kṛtvā bhaktānugrahakāriṇā

tadājñayā vayaṃ sarve śaraṇaṃ te samāgatāḥ //
tvaṃ hi śaṃbhuryuvāṃ devi bhaktoddhāraparāyaṇau

vṛndālāvaṇyasaṃbhrāto viṣṇustiṣṭhati tatra vai //
taccitābhasmasaṃdhārī jñānabhraṣṭo vimohitaḥ

saṃsiddhasurasaṃghaiśca bodhito'pi maheśvari //
na budhyate harissotha tava māyāvimohitaḥ

kṛpāṃ kuru mahādevi hariṃ bodhaya bodhaya /
yathā svalokaṃ pāyātsa sucittassurakāryakṛt

iti stuvaṃtaste devāstejomaṃḍalamāsthitam //
dadṛśurgagane tatra jvālāvyāptā digaṃtaram

tanmadhyādbhāratīṃ sarve brahmādyāśca savāsavāḥ //
amarāśśuśruvurvyāsa kāmadāṃ vyomacāriṇīm

ākāśavāṇyuvāca //
ahameva tridhā bhinnā tiṣṭhāmi trividhairguṇaiḥ //
gaurī lakṣmīḥ surā jyotī rajassattvatamoguṇaiḥ // ३४ /
tatra gacchata yūyaṃ vai tāsāmaṃtika ādarāt//
madājñayā prasannāstā vidhāsyaṃte tadīpsitam

sanatkumāra uvāca//
śṛṇvatāmiti tāṃ vācamaṃtarddhānamagānmahaḥ //
devānāṃ vismayotphullanetrāṇāṃ tattadā mune

tatassaveṃ'pi te devāḥ śrutvā tadvākyamādarāt//
gaurīṃ lakṣmīṃ surāṃ caiva nemustadvākyacoditāḥ

tuṣṭuvuśca mahābhaktyā devīstāssakalāssurāḥ//
nānāvidhābhirvāgbhiste brahmādyā natamastakāḥ

tato'raṃ vyāsa devyastā āvirbhūtāśca tatpuraḥ //
mahādbhutaissvatejobhirbhāsayaṃtyo digaṃtaram

atha tā amarā dṛṣṭvā suprasannena cetasā//
praṇamya tuṣṭuvurbhaktyā svakāryaṃ ca nyavedayan

tataścaitāssurāndṛṣṭvā praṇatānbhaktavatsalaḥ //
bījāni pradadustebhyo vākyamūcuśca sādaram

devya ūcuḥ//
imāni tatra bījāni viṣṇuryatrāvatiṣṭhati//
nirvapadhvaṃ tataḥ kāryaṃ bhavatāṃ siddhimeṣyati

sanatkumāra uvāca //
ityuktvā tāstato devyoṃtarhitā abhavanmune//
rudraviṣṇuvidhīnāṃ hi śaktayastriguṇātmikāḥ

tatastuṣṭāḥ surāssarve brahmādyāśca savāsavāḥ //
tāni bījāni saṃgṛhya yayuryatra hariḥ sthitaḥ

vṛndācitābhūmitale cikṣipustāni te surāḥ//
smṛtvā tāssaṃsthitāstatra śivaśaktyaṃśakā mune

nikṣiptebhyaśca bījebhyo vanaspatyastrayo'bhavan//
dhātrī ca mālatī caiva tulasī ca munīśvara

dhātryudbhavā smṛtā dhātrī mābhavā mālatī smṛtā //
gaurībhavā ca tulasī tamassattvarajoguṇāḥ

viṣṇurvanaspatīrdṛṣṭvā tadā strīrūpiṇīrmune //
udatiṣṭhattadā tāsu rāgātiśayavibhramāt

dṛṣṭvā sa yācate mohātkāmāsaktena cetasā //
taṃ cāpi tulasī dhātrī rāgeṇaivāvalokatām

yacca bījaṃ purā lakṣmyā māyayaiva samarpitam //
tasmāttadudbhavā nārī tasminnīrṣyāparābhavat

atassā barbarītyākhyāmavāpātīva garhitām //
dhātrītulasyau tadrāgāttasya prītiprade sadā

tato vismṛtaduḥkho'sau viṣṇustābhyāṃ sahaiva tu //
vaikuṃṭhamagamattuṣṭassarvadevairnamaskṛtaḥ //
kārtike māsi viprendra dhātrī ca tulasī sadā //
sarvadevapriyājñeyā viṣṇoścaiva viśeṣataḥ

tatrāpi tulasī dhanyātīva śreṣṭhā mahāmune //
tyaktvā gaṇeśaṃ sarveṣāṃ prītidā sarvakāmadā

vaikuṇṭhasthaṃ hariṃ dṛṣṭvā brahmendrādyāśca te'marāḥ//
natvā stutvā mahāviṣṇuṃ svasvadhāmāni vai yayuḥ

vaikuṇṭho'pi svalokastho bhraṣṭamohassubodhavān//
sukhī cābhūnmuniśreṣṭha pūrvavatsaṃsmarañchivam

ityākhyānamaghoghaghnaṃ sarvakāmapradaṃ nṛṇām //
sarva kāmavikāraghnaṃ sarvavijñānavarddhanam

ya idaṃ hi paṭhennityaṃ pāṭhayedvāpi bhaktiman//
śṛṇuyācchrāvayedvāpi sa yāti paramāṃ gatim

paṭhitvā ya idaṃ dhīmānākhyānaṃ paramottamam//
saṃgrāmaṃ praviśedvīro vijayī syānna saṃśayaḥ

viprāṇāṃ brahmavidyādaṃ satriyāṇāṃ jayapradam//
vaiśyānāṃ sarvadhanadaṃ śūdrāṇāṃ sukhadaṃ tvidam

śaṃbhubhaktipradaṃ vyāsa sarveṣāṃ pāpanāśanam//
ihaloke paratrāpi sadā sadgatidāyakam

iti śrīśivamahāpurāṇe dvitīyāyāṃ rudrasaṃhitāyāṃ pañcame yuddhakhaṇḍe jalaṃdharavadhānaṃtaradevīstutiviṣṇumohavidhvaṃsavarṇanaṃ nāma ṣaḍviṃśo'dhyāyaḥ