Shiva Purana · Chapter 2.5.25

// sanatkumāra uvāca //
atha brahmādayo devā munayaścākhilāstathā //
tuṣṭuvurdevadeveśaṃ vāgbhiriṣṭābhirānatāḥ

devā ūcuḥ //
devadeva mahādeva śaraṇāgatavatsala //
sādhusaukhyapradastvaṃ hi sarvadā bhaktaduḥkhahā

tvaṃ mahādbhutasallīlo bhaktigamyo durāsadaḥ //
durārādhyo'satāṃ nātha prasannassarvadā bhava //३/
vedo'pi mahimānaṃ te na jānāti hi tattvataḥ //
yathāmati mahātmānassarve gāyaṃti sadyaśaḥ

māhātmyamatigūḍhaṃ te sahasravadanādayaḥ //
sadā gāyaṃti suprītyā punaṃti svagiraṃ hi te

kṛpayā tava deveśa brahmajñānī bhavejjaḍaḥ //
bhaktigamyassadā tvaṃ vā iti vedā bruvaṃti hi

tvaṃ vai dīnadayāluśca sarvatra vyāpakassadā //
āvirbhavasi sadbhaktyā nirvikārassatāṃ gatiḥ

bhaktyaiva te maheśāna bahavassiddhimāgatāḥ //
iha sarvasukhaṃ bhuktvā duḥkhitā nirvikārataḥ // ८ /
purā yadupatirbhakto dāśārhassiddhimāgataḥ//
kalāvatī ca tatpatnī bhaktyaiva paramāṃ prabho

tathā mitrasaho rājā madayaṃtī ca tatpriyā//
bhaktyaiva tava deveśa kaivalyaṃ paramaṃ yayau

sauminī nāma tanayā kaikeyāgrabhuvastathā //
tava bhaktyā sukhaṃ prāpa paraṃ sadyogidurlabham

vimarṣaṇo nṛpavarassaptajanmāvadhi prabho //
bhuktvā bhogāṃśca vividhāṃstvadbhaktyā prāpa sadgatim

candraseno nṛpavarastvadbhaktyā sarvabhogabhuk //
duḥkhamuktaḥ sukhaṃ prāpa paramatra paratra ca

gopīputraḥ śrīkaraste bhaktyā bhuktveha sadgatim /
paraṃ sukhaṃ mahāvīraśiṣyaḥ prāpa paratra vai

tvaṃ satyarathabhūjānerduḥkhahartā gatipradaḥ //
dharmaguptaṃ rājaputramatārṣīssukhinaṃ tviha //

tathā śucivrataṃ vipramadaridraṃ mahāprabho //
tvadbhaktivartinaṃ mātrā jñāninaṃ kṛpayā'karoḥ

citravarmā nṛpavarastvadbhaktyā prāpa sadgatim //
iha loke sadā bhuktvā bhogānamaradurlabhān

candrāṃgado rājaputrassīmaṃtinyā striyā saha //
vihāya sakalaṃ duḥkhaṃ sukhī prāpa mahāgatim

dvijo maṃdaranāmāpi veśyāgāmī khalo'dhamaḥ //
tvadbhaktaḥ śiva saṃpūjya tayā saha gatiṃ gataḥ

bhadrāyuste nṛpasutassukhamāpa gatavyathaḥ //
tvadbhaktakṛpayā mātrā gatiṃ ca paramāṃ prabho

sarvastrībhoganirato durjanastava sevayā //
vimukto'bhūdapi sadā bhakṣyabhojī maheśvara

śaṃbaraśśaṃkare bhaktaścitābhasmadharassadā //
niyamādbhasmanaśśaṃbho svastriyā te puraṃ gataḥ

bhadrasenasya tanayastathā maṃtrisutaḥ prabho //
sudharmaśubhakarmāṇau sadā rudrākṣadhāriṇau

tvatkṛpātaśca tau muktāvāstāṃ bhukteha satsukham //
pūrvajanmani yau kīśakukkuṭau rudrabhūṣaṇau

piṃgalā ca mahānandā veśye dve tava bhaktitaḥ //
sadgatiṃ prāpaturnātha bhaktoddhāraparāyaṇa

śāradā vipratanayā bālavaidhavyamāgatā //
tava bhakteḥ prabhāvāttu putrasaubhā gyavatyabhūt

bindugo dvijamātro hi veśyābhogī ca tatpriyā //
vaṃcukā tvadyaśaḥ śrutvā paramāṃ gatimāyayau

ityādi bahavassiddhiṃ gatā jīvāstava prabho //
bhaktibhāvānmaheśāna dīnabandho kṛpālaya

tvaṃ paraḥ prakṛterbrahma puruṣātparameśvara //
nirguṇastriguṇādhāro brahmaviṣṇuharātmakaḥ

nānākarmakaro nityaṃ nirvikāro'khileśvaraḥ //
vayaṃ brahmādayassarve tava dāsā maheśvara

prasanno bhava deveśa rakṣāsmānsarvadā śiva //
tvatprajāśca vayaṃ nātha sadā tvaccharaṇaṃ gatāḥ

sanatkumāra uvāca //
iti stutvā ca te devā brahmādyāssamunīśvarāḥ //
tūṣṇīṃ babhūvurhi tadā śivāṃghridvandvacetasaḥ

atha śaṃbhurmaheśānaḥ śrutvā devastutiṃ śubhām//
dattvā varānvarānsadyastatraivāṃtardadhe prabhuḥ

devāssarve'pi muditā brahmādyā hataśatravaḥ //
svaṃ svaṃ dhāma yayuḥ prītā gāyaṃtaḥ śivasadyaśaḥ

idaṃ paramamākhyānaṃ jalaṃdharavimardanam //
maheśacaritaṃ puṇyaṃ mahāghaughavināśanam

devastutiriyaṃ puṇyā sarvapāpapraṇāśinī //
sarvasaukhyapradā nityaṃ maheśānaṃdadāyinī

yaḥ paṭhetpāṭhayedvāpi samākhyānamidaṃ dvayam //
bhuktveha paraṃ saukhyaṃ gāṇapatyamavāpnuyāt

iti śrīśivamahāpurāṇe dvitīyāyāṃ rudrasaṃhitāyāṃ pañcame yuddhakhaṇḍe jalaṃdharavadhopākhyāne devastutivarṇanaṃ nāma paṃcaviṃśo'dhyāyaḥ