શિવ પુરાણ · અધ્યાય 2.5.25

॥ સનત્કુમાર ઉવાચ ॥
અથ બ્રહ્માદયો દેવા મુનયશ્ચાખિલાસ્તથા ॥
તુષ્ટુવુર્દેવદેવેશં વાગ્ભિરિષ્ટાભિરાનતાઃ

દેવા ઊચુઃ ॥
દેવદેવ મહાદેવ શરણાગતવત્સલ ॥
સાધુસૌખ્યપ્રદસ્ત્વં હિ સર્વદા ભક્તદુઃખહા

ત્વં મહાદ્ભુતસલ્લીલો ભક્તિગમ્યો દુરાસદઃ ॥
દુરારાધ્યોઽસતાં નાથ પ્રસન્નસ્સર્વદા ભવ ॥૩।
વેદોઽપિ મહિમાનં તે ન જાનાતિ હિ તત્ત્વતઃ ॥
યથામતિ મહાત્માનસ્સર્વે ગાયંતિ સદ્યશઃ

માહાત્મ્યમતિગૂઢં તે સહસ્રવદનાદયઃ ॥
સદા ગાયંતિ સુપ્રીત્યા પુનંતિ સ્વગિરં હિ તે

કૃપયા તવ દેવેશ બ્રહ્મજ્ઞાની ભવેજ્જડઃ ॥
ભક્તિગમ્યસ્સદા ત્વં વા ઇતિ વેદા બ્રુવંતિ હિ

ત્વં વૈ દીનદયાલુશ્ચ સર્વત્ર વ્યાપકસ્સદા ॥
આવિર્ભવસિ સદ્ભક્ત્યા નિર્વિકારસ્સતાં ગતિઃ

ભક્ત્યૈવ તે મહેશાન બહવસ્સિદ્ધિમાગતાઃ ॥
ઇહ સર્વસુખં ભુક્ત્વા દુઃખિતા નિર્વિકારતઃ ॥ ૮ ।
પુરા યદુપતિર્ભક્તો દાશાર્હસ્સિદ્ધિમાગતઃ॥
કલાવતી ચ તત્પત્ની ભક્ત્યૈવ પરમાં પ્રભો

તથા મિત્રસહો રાજા મદયંતી ચ તત્પ્રિયા॥
ભક્ત્યૈવ તવ દેવેશ કૈવલ્યં પરમં યયૌ

સૌમિની નામ તનયા કૈકેયાગ્રભુવસ્તથા ॥
તવ ભક્ત્યા સુખં પ્રાપ પરં સદ્યોગિદુર્લભમ્

વિમર્ષણો નૃપવરસ્સપ્તજન્માવધિ પ્રભો ॥
ભુક્ત્વા ભોગાંશ્ચ વિવિધાંસ્ત્વદ્ભક્ત્યા પ્રાપ સદ્ગતિમ્

ચન્દ્રસેનો નૃપવરસ્ત્વદ્ભક્ત્યા સર્વભોગભુક્ ॥
દુઃખમુક્તઃ સુખં પ્રાપ પરમત્ર પરત્ર ચ

ગોપીપુત્રઃ શ્રીકરસ્તે ભક્ત્યા ભુક્ત્વેહ સદ્ગતિમ્ ।
પરં સુખં મહાવીરશિષ્યઃ પ્રાપ પરત્ર વૈ

ત્વં સત્યરથભૂજાનેર્દુઃખહર્તા ગતિપ્રદઃ ॥
ધર્મગુપ્તં રાજપુત્રમતાર્ષીસ્સુખિનં ત્વિહ ॥

તથા શુચિવ્રતં વિપ્રમદરિદ્રં મહાપ્રભો ॥
ત્વદ્ભક્તિવર્તિનં માત્રા જ્ઞાનિનં કૃપયાઽકરોઃ

ચિત્રવર્મા નૃપવરસ્ત્વદ્ભક્ત્યા પ્રાપ સદ્ગતિમ્ ॥
ઇહ લોકે સદા ભુક્ત્વા ભોગાનમરદુર્લભાન્

ચન્દ્રાંગદો રાજપુત્રસ્સીમંતિન્યા સ્ત્રિયા સહ ॥
વિહાય સકલં દુઃખં સુખી પ્રાપ મહાગતિમ્

દ્વિજો મંદરનામાપિ વેશ્યાગામી ખલોઽધમઃ ॥
ત્વદ્ભક્તઃ શિવ સંપૂજ્ય તયા સહ ગતિં ગતઃ

ભદ્રાયુસ્તે નૃપસુતસ્સુખમાપ ગતવ્યથઃ ॥
ત્વદ્ભક્તકૃપયા માત્રા ગતિં ચ પરમાં પ્રભો

સર્વસ્ત્રીભોગનિરતો દુર્જનસ્તવ સેવયા ॥
વિમુક્તોઽભૂદપિ સદા ભક્ષ્યભોજી મહેશ્વર

શંબરશ્શંકરે ભક્તશ્ચિતાભસ્મધરસ્સદા ॥
નિયમાદ્ભસ્મનશ્શંભો સ્વસ્ત્રિયા તે પુરં ગતઃ

ભદ્રસેનસ્ય તનયસ્તથા મંત્રિસુતઃ પ્રભો ॥
સુધર્મશુભકર્માણૌ સદા રુદ્રાક્ષધારિણૌ

ત્વત્કૃપાતશ્ચ તૌ મુક્તાવાસ્તાં ભુક્તેહ સત્સુખમ્ ॥
પૂર્વજન્મનિ યૌ કીશકુક્કુટૌ રુદ્રભૂષણૌ

પિંગલા ચ મહાનન્દા વેશ્યે દ્વે તવ ભક્તિતઃ ॥
સદ્ગતિં પ્રાપતુર્નાથ ભક્તોદ્ધારપરાયણ

શારદા વિપ્રતનયા બાલવૈધવ્યમાગતા ॥
તવ ભક્તેઃ પ્રભાવાત્તુ પુત્રસૌભા ગ્યવત્યભૂત્

બિન્દુગો દ્વિજમાત્રો હિ વેશ્યાભોગી ચ તત્પ્રિયા ॥
વંચુકા ત્વદ્યશઃ શ્રુત્વા પરમાં ગતિમાયયૌ

ઇત્યાદિ બહવસ્સિદ્ધિં ગતા જીવાસ્તવ પ્રભો ॥
ભક્તિભાવાન્મહેશાન દીનબન્ધો કૃપાલય

ત્વં પરઃ પ્રકૃતેર્બ્રહ્મ પુરુષાત્પરમેશ્વર ॥
નિર્ગુણસ્ત્રિગુણાધારો બ્રહ્મવિષ્ણુહરાત્મકઃ

નાનાકર્મકરો નિત્યં નિર્વિકારોઽખિલેશ્વરઃ ॥
વયં બ્રહ્માદયસ્સર્વે તવ દાસા મહેશ્વર

પ્રસન્નો ભવ દેવેશ રક્ષાસ્માન્સર્વદા શિવ ॥
ત્વત્પ્રજાશ્ચ વયં નાથ સદા ત્વચ્છરણં ગતાઃ

સનત્કુમાર ઉવાચ ॥
ઇતિ સ્તુત્વા ચ તે દેવા બ્રહ્માદ્યાસ્સમુનીશ્વરાઃ ॥
તૂષ્ણીં બભૂવુર્હિ તદા શિવાંઘ્રિદ્વન્દ્વચેતસઃ

અથ શંભુર્મહેશાનઃ શ્રુત્વા દેવસ્તુતિં શુભામ્॥
દત્ત્વા વરાન્વરાન્સદ્યસ્તત્રૈવાંતર્દધે પ્રભુઃ

દેવાસ્સર્વેઽપિ મુદિતા બ્રહ્માદ્યા હતશત્રવઃ ॥
સ્વં સ્વં ધામ યયુઃ પ્રીતા ગાયંતઃ શિવસદ્યશઃ

ઇદં પરમમાખ્યાનં જલંધરવિમર્દનમ્ ॥
મહેશચરિતં પુણ્યં મહાઘૌઘવિનાશનમ્

દેવસ્તુતિરિયં પુણ્યા સર્વપાપપ્રણાશિની ॥
સર્વસૌખ્યપ્રદા નિત્યં મહેશાનંદદાયિની

યઃ પઠેત્પાઠયેદ્વાપિ સમાખ્યાનમિદં દ્વયમ્ ॥
ભુક્ત્વેહ પરં સૌખ્યં ગાણપત્યમવાપ્નુયાત્

ઇતિ શ્રીશિવમહાપુરાણે દ્વિતીયાયાં રુદ્રસંહિતાયાં પઞ્ચમે યુદ્ધખણ્ડે જલંધરવધોપાખ્યાને દેવસ્તુતિવર્ણનં નામ પંચવિંશોઽધ્યાયઃ