Shiva Purana · Chapter 2.5.23

vyāsa uvāca//
sanatkumāra sarvajña vada tvaṃ vadatāṃ vara//
kimakārṣīddharistatra dharmaṃ tatyāja sā katham

sanatkumāra upāca //
viṣṇurjālaṃdharaṃ gatvā daityasya puṭabhedanam //
pātivratyasya bhaṃgāya vṛndāyāścā karonmatim //

vṛndāṃ sa darśayāmāsa svapnaṃ māyāvināṃ varaḥ //
svayaṃ tannagarodyānamāsthito'dbhutavigrahaḥ

atha vṛndā tadā devī tatpatnī niśi suvratā//
harermāyāprabhāvāttu dussvapnaṃ sā dadarśa ha

svapnamadhye hi sā viṣṇumāyayā pradadarśa ha //
bharttāraṃ mahiṣārūḍhaṃ tailābhyaktaṃ digaṃbaram

kṛṣṇaprasūnabhūṣāḍhyaṃ kravyādagaṇasevitam //
dakṣiṇāśāṃ gataṃ muṃḍaṃ tamasā ca vṛtaṃ tadā

svapuraṃ sāgare magnaṃ sahasaivātmanā saha //
ityādi bahudussvapnānniśāṃte sā dadarśa ha

tataḥ prabudhya sā bālā taṃ svapnaṃ svaṃ vicinvatī //
dadarśoditamādityaṃ sacchidraṃ niḥprabhaṃ muhuḥ

tadaniṣṭamidaṃ jñātvā rudaṃtī bhayavihvalā //
kutracinnāpa sā śarma gopurāṭṭālabhūmiṣu

tatassakhīdvayayutā nagarodyānamāgamat //
tatrāpi sā gatā bālā na prāpa kutracitsukham

tato jalaṃdharastrī sā nirviṇṇodvignamānasā //
vanādvanāṃtaraṃ yātā naiva vedātmanā tadā

bhramatī sā tato bālā dadarśātīva bhīṣaṇau //
rākṣasau siṃhavadanau dṛṣṭvā daśanabhāsurau

tau dṛṣṭvā vihvalātīva palāyanaparā tadā //
dadarśa tāpasaṃ śāṃtaṃ saśiṣyaṃ maunamāsthitam

tatastatkaṃṭhamāsādya nijāṃ bāhulatāṃ bhayāt //
mune māṃ rakṣa śaraṇamāgatāsmītyabhāṣata

munistāṃ vihvalāṃ dṛṣṭvā rākṣasānugatāṃ tadā //
huṃkāreṇaiva tau ghorau cakāra vimukhau drutam

taddhuṃkārabhayatrastau dṛṣṭvā tau vimukhau gatau //
vismitātīva daityendrapatnī sābhūnmune hṛdi

tatassā munināthaṃ taṃ bhayānmuktā kṛtāṃjaliḥ //
praṇamya daṃḍavadbhūmau vṛndā vacanamabravīt

vṛndovāca //
muninātha dayāsindho parapīḍānivāraka //
rakṣitāhaṃ tvayā ghorādbhayādasmātkha lodbhavāt

samarthassarvathā tvaṃ hi sarvajño'pi kṛpānidhe //
kiṃcidvijñaptumicchāmi kṛpayā tanniśāmaya

jalaṃdharo hi madbhartā rudraṃ yoddhuṃ gataḥ prabho //
sa tatrāste kathaṃ yuddhe tanme kathaya suvrata

sanatkumāra uvāca //
munistadvākyamākarṇya maunakapaṭamāsthitaḥ //
karttuṃ svārthaṃ vidhānajñaḥ kṛpayorddhvamavaikṣata

tāvatkapīśāvāyātau taṃ praṇamyāgrataḥ sthitau //
tatastadbhrūlatāsaṃjñāniyuktau gaganaṃ gatau

nītvā kṣaṇārddhamāgatya punastasyāgrataḥ sthitau //
tasyaiva kaṃ kabaṃdhaṃ ca hastāvāstāṃ munīśvara

śiraḥ kabaṃdhaṃ hastau tau dṛṣṭvābdhitanayasya sā //
papāta mūrchitā bhūmau bhartṛvyasanaduḥkhitā

// vṛndovāca //
yaḥ purā sukhasaṃvādairvinodayasi māṃ prabho //
sa kathaṃ na vadasyadya vallabhāṃ māmanāgasam

yena devāssagaṃdharvā nirjitā viṣṇunā saha //
kathaṃ sa tāpasenādya trailokyavijayī hata

nāṃgīkṛtaṃ hi me vākyaṃ rudratattvamajānatā //
paraṃ brahma śivaśceti vadaṃtyā daityasattama

tatastvaṃ hi mayā jñātastava sevāprabhāvataḥ //
garvitena tvayā naiva kusaṃgavaśagena hi

itthaṃprabhāṣya bahudhā svadharmasthā ca tatpriyā//
vilalāpa vicitraṃ sā hṛdayena vidūyatā

tatassā dhairyamālaṃbya duḥkhocchravā sānvimuṃcatī //
uvāca munivaryaṃ taṃ supraṇamya kṛtāṃjaliḥ

vṛndovāca // //
kṛpānidhe muniśreṣṭha paropakaraṇādara //
mayi kṛtvā kṛpāṃ sādho jīvayainaṃ mama prabhum

yattvamasya punaśśakto jīvanāya mato mama //
atassaṃjīvayainaṃ me prāṇanāthaṃ munīśvara

sanatkumāra uvāca //
ityuktvā daityapatnī sā pativratyaparāyaṇāḥ //
pādayoḥ patitā tasya duḥkhaśvāsān vimuñcatī

muniruvāca //
nāyaṃ jīvayituṃ śakto rudreṇa nihato yudhi //
rudreṇa nihatā yuddhe na jīvanti kadācana

tathāpi kṛpayāviṣṭa enaṃ saṃjīvayāmyaham //
rakṣyāśśaraṇagāśceti jānandharmaṃ sanātanam //३५/
// sanatkumāra uvāca //
ityuktvā sa munistasyā jīvayitvā patiṃ mune //
aṃtardadhe tato viṣṇussarvamāyāvināṃ varaḥ

drutaṃ sa jīvitastenotthitaḥ sāgaranandanaḥ//
vṛndāmāliṃgya tadvaktraṃ cucuṃba prītamānasaḥ /३७//
atha vṛndāpi bhartāraṃ dṛṣṭvā harṣitamānasā //
jahau śokaṃ ca nikhilaṃ svapnavaddhṛdyamanyata

atha prasannahṛdayā sā hi saṃjātahṛcchayā //
reme tadvanamadhyasthā tadyuktā bahuvāsarān

kadācitsuratasyāṃte dṛṣṭvā viṣṇuṃ tameva hi //
nirbhartsya krodhasaṃyuktā vṛndā vacanamabravīt

vṛndovāca//
dhik tadevaṃ hare śīlaṃ paradārābhigāminaḥ //
jñāto'si tvaṃ mayā samyaṅmāyī pratyakṣatāpasaḥ

sanatkumāra uvāca //
ityuktvā krodhamāpannā darśayaṃtī svatejasam //
śaśāpa keśavaṃ vyāsa pātivratyaratā ca sā

re mahādhama daityāre paradharmavidūṣaka //
gṛhṇīṣva śaṭha maddattaṃ śāpaṃ sarvaviṣolbaṇam

yau tvayā māyayā khyātau svakīyau darśitau mama//
tāveva rākṣasau bhūtvā bhāryāṃ tava hariṣyataḥ

tvaṃ cāpi bhāryāduḥkhārto vane kapisahāyavān//
bhrama sarpeśvareṇāyaṃ yaste śiṣyatvamāgataḥ४५//
sanatkumāra uvāca//
ityuktvā sā tadā vṛndā praviśaddhavyavāhanam//
viṣṇunā vāryamāṇāpi tasmitāsaktacetasā४६//
tasminnavasare devā brahmādyā nikhilā mune //
āgatā khe samaṃ dāraiḥ sadgatiṃ vai didṛkṣavaḥ

atha daityendrapatnyāstu tajjyotiḥ paramaṃ mahat//
paśyatāṃ sarvadevānāmalokamagamaddrutam

śivātanau vilīnaṃ tadvṛndātejo babhūva ha //
āsījjayajayārāvaḥ khasthitāmara paṃktiṣu

evaṃ vṛndā mahārājñī kālanemisutottamā//
pātivratyaprabhāvācca muktiṃ prāpa parāṃ mune

tato haristāmanusaṃsmanmuhurvṛndācitābhasmarajovaguṃṭhitaḥ //
tatraiva tasthau surasiddhasaṃghakaiḥ prabodhyamānopi yayau na śāṃtim

iti śrīśivamahāpurāṇe dvitīyāyāṃ rudrasaṃhitāyāṃ pañcame yuddhakhaṃḍe jalaṃdharavadhopākhyāne vṛndāpativratabhaṃgadehatyāgavarṇanaṃ nāma trayoviṃśo'dhyāyaḥ