Shiva Purana · Chapter 2.5.18

sanatkumāra uvāca//
evaṃ śāsati dharmeṇa mahīṃ tasminmahāsure//
babhūvurduḥkhino devā bhrātṛbhāvānmunīśvara

duḥkhitāste surāssarve śivaṃ śaraṇamāyayuḥ //
manasā śaṃkaraṃ devadevaṃ sarvaprabhuṃprabhum

tuṣṭuvurvāgbhiriṣṭābhirbhagavaṃtaṃ maheśvaram //
nivṛttaye svaduḥkhasya sarvadaṃ bhaktavatsalam

āhūya sa mahādevo bhaktānāṃ sarvakāmadaḥ////
nāradaṃ prerayāmāsa devakāryacikīrṣayā

atha devamunirjñānī śaṃbhubhaktassatāṃ gatiḥ //
śivājñayā yayau daityapure devānsa nāradaḥ

vyākulāste surāssarve vāsavādyā drutaṃ munim //
āgacchaṃtaṃ samālokya samuttasthurhi nāradam

dadusta āsanaṃ nattvā munaye prītipūrvakam //
nāradāya surāśśakramukhā utkaṃṭhitānanāḥ

sukhāsīnaṃ munivaramāsane supraṇamya tam //
punaḥ procussurā dīnā vāsavādyā munīśvaram

devā ūcuḥ //
bhobho munivaraśreṣṭha duḥkhaṃ śṛṇu kṛpākara //
śrutvā tannāśaya kṣipraṃ prabhustvaṃ śaṃkarapriyaḥ

jalaṃdhareṇa daityena surā vidrāvitā bhṛśam//
svasthānādbhartṛbhāvācca duḥkhitā vayamākulāḥ

svasthānāduṣṇaraśmiśca candro nissāritastathā //
vahniśca dharmarājaśca lokapālāstathetare

subaliṣṭhena vai tena sarve devāḥ prapīḍitāḥ //
duḥkhaṃ prāptā vayaṃ cātiśaraṇaṃ tvāṃ samāgatāḥ

saṃgrāme sa hṛṣīkeśaṃ svavaśaṃ kṛtavān balī //
jalaṃdharo mahādaityaḥ sarvāmaravimardakaḥ

tasya vaśyo varādhīno'vātsīttatsadane hariḥ //
salakṣmyā sahito viṣṇuryo nassarvārthasādhakaḥ

jalaṃdharavināśāya yatnaṃ kuru mahāmate //
tvaṃ no daivavaśātprāptassadā sarvārthasādhakaḥ

sanatkumāra uvāca //
ityākarṇya vacasteṣāmamarāṇāṃ sa nāradaḥ //
āśvāsya muniśārdūlastānuvāca kṛpākaraḥ

nārada uvāca //
jāne'haṃ vai surā yūyaṃ daityarājaparājitāḥ//
duḥkha prāptāḥ pīḍitāśca sthānānnissāritāḥ khaluḥ

svaśaktyā bhavatāṃ svārthaṃ kariṣye nātra saṃśayaḥ//
anukūlo'hamiva vo duḥkhaṃ prāptā yato 'marāḥ

sanatkumāra uvāca //
evamuktvā muniśreṣṭha draṣṭuṃ dānavavallabham //
āśvāsya sakalāndevāñjalaṃdharasabhāṃ yayau

athāgataṃ muniśreṣṭhaṃ dṛṣṭvā devo jalaṃdharaḥ //
utthāya parayā bhaktyā dadau śreṣṭhāsanaṃ varam

sa taṃ saṃpūjya vidhivaddānavendro'ti vismitaḥ //
suprahasya tadā vākyaṃ jagāda munisattamam

jalaṃdhara uvāca //
kuta āgamyate brahmankiṃ ca dṛṣṭaṃ tvayā kvacit//
yadarthamiha āyātastadājñāpaya māṃ mune

sanatkumāra uvāca //
ityākarṇya vacastasya daityendrasya mahāmuniḥ //
pratyuvāca prasannātmā nārado hi jalaṃdharam

nārada uvāca //
sarvadānavadaityendra jalaṃdhara mahāmate //
dhanyastvaṃ sarvalokeśa ratnabhoktā tvameva hi

madāgamanahetuṃ vai śṛṇu daityendrasattama //
yadarthamiha cāyātastvahaṃ vakṣyekhilaṃ hi tat

gataḥ kailāsaśikharaṃ daityendrāhaṃ yadṛcchayā //
yojanāyutavistīrṇaṃ kalpadrumamahāvanam

kāmadhenuśatākīrṇaṃ ciṃtāmaṇisudīpitam //
sarvarukmamayaṃ divyaṃ sarvatrādbhutaśobhitam

tatromayā sahāsīnaṃ dṛṣṭavānasmi śaṃkaram //
sarvāṅgasundaraṃ gauraṃ trinetraṃ candraśekharam

taṃ dṛṣṭvā mahadāścaryaṃ vitarko me'bhavattadā//
kvāpīdṛśī bhavedvṛddhistrailokye vā na veti ca

tāvattavāpi daityendra samṛddhissaṃsmṛtā mayā//
tadvilokanakāmo'haṃ tvatsāṃnidhyamihā gataḥ

sanatkumāra uvāca //
iti nāradataḥ śrutvā sa daityendro jalaṃdharaḥ //
svasamṛddhiṃ samagrāṃ vai darśayāmāsa sādaram

dṛṣṭvā sa nārado jñānī devakāryasusādhakaḥ //
prabhupreraṇayā prāha daityendraṃ taṃ jalaṃdharam

nārad uvāca //
tavāsti susamṛddhirhi varavīra khilādhunā //
trailokyasya patistvaṃ hi citraṃ kiṃ cātra saṃbhavam

maṇayo ratnapuṃjāśca gajādyāśca samṛddhayaḥ //
te gṛhe'dya vibhāṃtīha yāni ratnāni tānyapi

gajaratnaṃ tvayānītaṃ śakrasyairāvatastathā //
aśvaratnaṃ mahāvīra sūryasyoccaiḥśravā hayaḥ

kalpavṛkṣastvayānīto nidhayo dhanadasya ca //
haṃsayuktavimānaṃ ca tvayānītaṃ hi vedhasaḥ

ityevaṃ vararatnāni divi pṛthvyāṃ rasātale //
yāni daityendra te bhāṃti gṛhe tāni samastataḥ

tvatsamṛddhimimāṃ paśyansampūrṇāṃ vividhāmaham //
prasanno'smi mahāvīra gajāśvādisuśobhitām

jāyāratnaṃ mahāśreṣṭhaṃ jalaṃdhara na te gṛhe //
tadānetuṃ viśeṣeṇa strīratnaṃ vai tvamarhasi

yasya gehe suratnāni sarvāṇi hi jalaṃdhara //
jāyāratnaṃ na cettāni na śobhaṃte vṛthā dhruvam

sanatkumāra uvāca //
ityevaṃ vacanaṃ śrutvā nāradasya mahātmanaḥ //
uvāca daityarājo hi madanākulamānasaḥ

jalaṃdhara uvāca //
bho bho nārada devarṣe namastestu mahāprabho //
jāyāratnavaraṃ kutra vartate tadvadādhunā

brahmāṃḍe yatra kutrāpi tadratnaṃ yadi varttate //
tadāneṣye tato brahmansatyaṃ satyaṃ na saṃśayaḥ

nārada uvāca//
kailāse hyatiramye ca varvaddhiṃ susamākule //
yogirūpadharaśśaṃbhurasti tatra digambaraḥ

tasya bhāryā suramyā hi sarvalakṣaṇalakṣitā//
sarvāṃgasundarī nāmnā pārvatīti manoharā

tadīdṛśaṃ rūpamananyasaṃgataṃ dṛṣṭaṃ na kutrāpi kutūhalāḍhyam //
atyadbhutaṃ mohanakṛtsuyogināṃ sudarśanīyaṃ paramarddhikāri

svacitte kalpayāmyadya śivādanyassamṛddhivān //
jāyāratnānvitādvīra trilokyā na jalaṃdhara

yasyā lāvaṇyajaladhau nimagnaścaturānanaḥ //
svadhairyyaṃ mumuce pūrvaṃ tayā kānyopamīyate

gatarāgo'pi hi yayā madanārissvalīlayā //
nijataṃtro'pi yatassa svātma vaśagaḥ kṛtaḥ

yathā strīratnasaṃbhoktussamṛddhistasya sābhavat //
tathā na tava daityendra sarvaratnādhipasya ca

sanatkumāra uvāca //
ityuktvā sa tu devarṣirnārado lokaviśrutaḥ//
yayau vihāyasā devopakārakaraṇodyataḥ

iti śrīśivamahāpurāṇe dvitīyāyāṃ rudrasaṃhitāyāṃ pañcame yuddhakhaṇḍe jalaṃdharavadhopākhyāne devarṣijalaṃdharasaṃvādo nāmāṣṭadaśo'dhyāyaḥ