Shiva Purana · Chapter 2.5.16

// sanatkumāra uvāca //
punardaityaṃ samāyāṃtaṃ dṛṣṭvā devāssavāsavāḥ //
bhayātprakaṃpitāssarve sahaivādudruvurdrutam

vaikuṃṭhaṃ prayayussarve puraskṛtya prajāpatim //
tuṣṭuvuste surā natvā saprajāpatayo'khilāḥ

devā ūcuḥ //
hṛṣīkeśa mahābāho bhagavan madhusūdana //
namaste devadeveśa sarvadaityavināśaka

matsyarūpāya te viṣṇo vedānnītavate namaḥ //
satyavratena sadrājñā pralayābdhivihāriṇe

kurvāṇānāṃ surāṇāṃ ca mathanāyodyamaṃ bhṛśam//
bibhrate maṃdaragiriṃ kūrmarūpāya te namaḥ

namaste bhagavannātha kratave sūkarātmane//
vasuṃdharāṃ janādhārāṃ mūddhato bibhrate namaḥ

vāmanāya namastubhyamuprendrākhyāya viṣṇave //
viprarūpeṇa daityendraṃ baliṃ chalayate vibho

namaḥ paraśurāmāya kṣatraniḥkṣatrakāriṇe //
māturhitakṛte tubhyaṃ kupitāyāsatāṃ druhe

rāmāya lokarāmāya maryādāpuruṣāya te//
rāvaṇāṃtakarāyāśu sītāyāḥ pataye namaḥ

namaste jñānagūḍhāya kṛṣṇāya paramātmana //
rādhāvihāraśīlāya nānālīlākarāya ca

namaste gūḍhadehāya vedaniṃdākarāya ca //
yogācāryāya jaināya vauddharūpāya māpate

namaste kalkirūpāya mlecchānāmaṃtakāriṇe//
anantaśaktirūpāya saddharmasthāpanāya ca //१२
namaste kapilarūpāya devahūtyai mahātmane //
vadate sāṃkhyayogaṃ ca sāṃkhyācāryāya vai prabho

namaḥ paramahaṃsāya jñānaṃ saṃvadate param //
vidhātre jñānarūpāya yenātmā saṃprasīdati

vedavyāsāya vedānāṃ vibhāgaṃ kurvate namaḥ //
hitāya sarvalokānāṃ purāṇaracanāya ca

evaṃ matsyāditanubhirbhaktakāryodyatāya te //
sargasthitidhvaṃsakartre namaste brahmaṇe prabho

ārtihaṃtre svadāsānāṃ sukhadāya śubhāya ca //
pītāmbarāya haraye tārkṣyayānāya te namaḥ//
sarvakriyāyaikakartre śaraṇyāya namonamaḥ

daityasaṃtāpitāmartya duḥkhādidhvaṃsavajraka //
śeṣatalpaśayāyārkacandranetrāya te namaḥ

kṛpāsindho ramānātha pāhi naśśaraṇāgatān //
jalaṃdhareṇa devāśca svargātsarve nirākṛtāḥ

sūryo nissāritaḥ sthānāccandro vahnistathaiva ca //
pātālānnāgarājaśca dharmarājo nirākṛtaḥ

vicaraṃti yathā martyāśśobhaṃte naiva te surāḥ //
śaraṇaṃ te vayaṃ prāptā vadhastasya viciṃtyatām

// sanatkumāra uvāca //
iti dīnavacaśśrutvā devānāṃ madhusūdanaḥ //
jagāda karuṇāsindhurme ghanirhrādayā girā

// viṣṇuruvāca //
bhayaṃ tyajata he devā gamiṣyāmyahamāhavam//
jalaṃdhareṇa daityena kariṣyāmi parākramam

ityuktvā sahasotthāya daityāriḥ khinnamānasaḥ //
ārohadgaruḍaṃ vegātkṛpayā bhaktavatsalaḥ

gacchantaṃ vallabhaṃ dṛṣṭvā devaissārddhaṃ samudrajā //
sāṃjalirbāṣpanayanā lakṣmīrvacanamabravīt

lakṣmyuvāca//
ahaṃ te vallabhā nātha bhaktā yadi ca sarvadā//
tatkathaṃ te mama bhrātā yuddhe vadhyaḥ kṛpānidhe

viṣṇuruvāca //
jalaṃdhareṇa daityena kariṣyāmi parākramam//
taissaṃstuto gamiṣyāmi yuddhāya tvaritānvitaḥ

rudrāṃśasaṃbhavatvācca brahmaṇo vacanādapi //
prītyā ca tava naivāyaṃ mama vadhyo jalaṃdharaḥ

sanatkumāra uvāca //
ityuktvā garuḍārūḍhaśśaṃkhacakragadāsibhṛt//
viṣṇurvegādyayau yoddhuṃ devaiśśakrādibhissaha

drutaṃ sa prāpa tatraiva yatra daityo jalaṃdharaḥ//
kurvan siṃharavaṃ devairjvaladbhirviṣṇutejasā

athāruṇānujajavapakṣavātaprapīḍitāḥ //
vātyāvivartitā daityā babhramuḥ khe yathā ghanāḥ

tato jalaṃdharo dṛṣṭvā daityān vātyāprapīḍitān//
uddhṛtya vacanaṃ krodhāddrutaṃ viṣṇuṃ samabhyagāt

etasminnaṃtare devāścakruryuddhaṃ praharṣitāḥ //
tejasā ca hareḥ puṣṭā mahābalasamanvitāḥ

yuddhodyataṃ samālokya devasainyamupasthitam//
daityānājñāpayāmāsa samare cātidurmadān

jalaṃdhara uvāca //
bhobho daityavarā yūyaṃ yuddhaṃ kuruta dustaram//
śakrādyairamarairadya prabalaiḥ kātaraissadā

mauryāstu lakṣasaṃkhyātā dhaumrā hi śatasaṃkhyakāḥ//
asurāḥ koṭisaṃkhyātāḥ kālakeyāstathaiva ca

kālakānāṃ daurhṛdānāṃ kaṃkānāṃ lakṣasaṃkhyayā //
anye'pi svabalairyuktā viniryāṃtu mamājñayā

sarve sajjā viniryāta bahusenābhisaṃyutāḥ //
nānāśastrāstrasaṃyuktā nirbhayāḥ gatasaṃśayāḥ

bhobho śuṃbhaniśuṃbhau ca devānsamarakātarān //
kṣaṇena sumahāvīryau tucchānnāśayataṃ yuvām

sanatkumāra uvāca //
daityā jalaṃdharājñaptā itthaṃ yuddhaviśāradāḥ//
yuyudhuste surāssarve caturaṃgabalānvitāḥ

gadābhistīkṣṇabāṇaiśca śūlapaṭṭiśatomaraiḥ //
kecitparaśuśūlaiśca nijaghnuste parasparam

nānāyudhaiśca paraistatra nijaghnuste balānvitā //
devāstathā mahāvīrā hṛṣīkeśabalānvitāḥ //
yuyudhustīkṣṇabāṇāśca kṣipaṃtassiṃhavadravāḥ

kecidbāṇaistu tīkṣṇaiśca kecinmusalatomaraiḥ //
kecitparaśuśūlaiśca nijaghnuste parasparam

itthaṃ surāṇāṃ daityānāṃ saṃgrāmassamabhūnmahān//
atyulbaṇo munīnāṃ hi siddhānāṃ bhaya kārakaḥ

iti śrīśivamahāpurāṇe dvitīyāyāṃ rudrasaṃhitāyāṃ pañcame yuddhakhaṃḍe devayuddhavarṇanaṃ nāma ṣoḍaśo'dhyāyaḥ