Shiva Purana · Chapter 2.5.15

// sanatkumāra uvāca //
ekadā vāridhisuto vṛndāpati rudāradhīḥ//
sabhāryyassaṃsthito vīro'suraissarvaiḥ samanvitaḥ

tatrājagāma suprītassuvarcāstvatha bhārgavaḥ//
tejaḥ puṃjo mūrta iva bhāsayansakalā diśaḥ

taṃ dṛṣṭvā gurumāyāntamasurāste'khilā drutam //
praṇemuḥ prītamanasassiṃdhuputro'pi sādaram

dattvāśīrvacanaṃ tebhyo bhārgavastejasāṃ nidhiḥ //
niṣasādāsane ramye saṃtasthuste'pi pūrvavat

atha siṃdhvātmajo vīro dṛṣṭvā prītyā nijāṃ sabhām //
jalaṃdharaḥ prasanno'bhūdanaṣṭavaraśāsanaḥ

tatsthitaṃ chinnaśirasaṃ dṛṣṭvā rāhuṃ sa daityarāṭ //
papraccha bhārgavaṃ śīghramidaṃ sāgaranandanaḥ

jalaṃdhara uvāca //
kenedaṃ vihitaṃ rāhośśiracchedanakaṃ prabho //
tadbrūhi nikhilaṃ vṛttaṃ yathāvattattvato guro

sanatkumāra uvāca //
ityākarṇya vacastasya sindhuputrasya bhārgavaḥ //
smṛtvā śivapadāṃbhojaṃ pratyuvāca yathārthavat

śukra uvāca//
jalaṃdhara mahāvīra sarvāsurasahāyaka //
śṛṇu vṛttāṃtamakhilaṃ yathāvatkathayāmi te

purābhavadbalirvīro virocanasuto balī //
hiraṇyakaśipoścaiva prapautro dharmavittamaḥ

parājitāssurāstena rameśaṃ śaraṇaṃ yayuḥ //
savāsavāssvavṛttāṃtamācakhyuḥ svārthasādhakāḥ

tadājñayā suraiḥ sārddhaṃ cakrussaṃdhimatho surāḥ //
svakāryasiddhaye tātacchalakarmavicakṣaṇāḥ

athāmṛtārthe siṃdhośca maṃthanaṃ cakrurādarāt //
viṣṇossahāyinaste hi surāssarve'suraissaha

tato ratnopaharaṇamakārṣurdaityaśatravaḥ //
jagṛhuryatnato devāḥ papurapyamṛtaṃ chalāt

tataḥ parābhavaṃ cakrurasurāṇāṃ sahāyataḥ //
viṣṇossurāssacakrāste'mṛtāpānādbalānvitāḥ

śiraśchedaṃ cakārāsau pibataścāmṛtaṃ hariḥ //
rāhordevasabhāṃ hi pakṣapātī haressadā

sanatkumrāra uvāca //
evaṃ kavistasya śiraśchedaṃ rāhośśaśaṃsa ca //
amṛtārthe samudrasya maṃthanaṃ devakāritam

ratnopaharaṇaṃ caiva daityānāṃ ca parābhavam //
devairamṛtapānaṃ ca kṛtaṃ sarvaṃ ca vistarāt

tadākarṇya mahāvīrombudhibālaḥ pratāpavān //
cukrodha krodharaktākṣassvapiturmaṃthanaṃ tadā

atha dūtaṃ samāhūya ghasmarābhidhamuttamam //
sarvaṃ śaśaṃsa caritaṃ yadāha gururātmavān

atha taṃ preṣayāmāsa svadūtaṃ śakrasannidhau//
saṃmānya bahuśaḥ prītyā'bhayaṃ dattvā viśāradam

dūtastriviṣṭapaṃ tasya jagāmāramalaṃ sudhīḥ //
ghasmaroṃ'budhibālasya sarvadevasamanvitam

tatra gatvā sa dūtastu sudharmāṃ prāpya satvaram //
garvādakharvamaulirhi devendraṃ vākyamabravīt

ghasmara uvāca //
jalaṃdharo'bdhi tanayassarvadaityajaneśvaraḥ //
supratāpī mahāvīrassvayaṃ kavisahāyavān

dūto'haṃ tasya vīrasya ghasmarākhyo na ghasmaraḥ //
preṣitastena vīreṇa tvatsakāśamihāgataḥ

avyāhatājñasvarvatra jalaṃdhara udagradhīḥ //
nirjitākhiladaityārissa yadāha śṛṇuṣva tat

jalaṃdhara uvāca //
kasmāttvayā mama pitā mathitassāgaro'driṇā //
nītāni sarvaratnāni piturme devatādhama

ucitaṃ na kṛtaṃ te'dya tāni śīghraṃ prayaccha me //
mamāyāhi vicāryetthaṃ śaraṇaṃ daivataissaha

anyathā te bhayaṃ bhūri bhaviṣyati surādhama //
rājyavidhvaṃsanaṃ caiva satyametadbravīmyaham

sanatkumāra uvāca //
iti dūtavacaḥ śrutvā vismitastridaśādhipaḥ //
uvāca taṃ smarannindro bhayaroṣasamanvitaḥ

adrayo madbhayāttrastāssvakukṣisthā yataḥ kṛtāḥ //
anye'pi maddviṣastena rakṣitā ditijāḥ purā

tasmāttadratnajātaṃ tu mayā sarvaṃ hṛtaṃ kila //
na tiṣṭhati mama drohī sukhaṃ satyaṃ bravīmyaham

śaṃkhopyeva purā daityo māṃ dviṣansāgarātmajaḥ //
abhavanmūḍhacittastu sādhusaṃgātsamujjhita

mamānujena hariṇā nihatasya hi pāpadhīḥ //
hiṃsakassādhusaṃdhasya pāpiṣṭhassāgarodare

tadgaccha dūta śīghraṃ tvaṃ kathayasvāsya tattvataḥ //
abdhiputrasya sarvaṃ hi siṃdhormaṃthanakāraṇam

sanatkumāra uvāca //
itthaṃ visarjito dūto ghasmarākhyassubuddhimān //
tadendreṇāgamattūrṇṇaṃ yatra vīro jalaṃdharaḥ

tadidaṃ vacanaṃ daityarājo hi tena dhīmatā //
kathito nikhilaṃ śakraproktaṃ dūtena vai tadā

tanniśamya tato daityo roṣātprasphuritādharaḥ //
udyogamakarottūrṇaṃ sarvadevajigīṣayā

tadodyoge'surendrasya digbhyaḥ pātālatastathā //
ditijāḥ pratyapadyaṃta koṭiśaḥkoṭiśastathā

atha śuṃbhaniśuṃbhādyai balādhipatikoṭibhiḥ //
nirjagāma mahāvīraḥ sindhuputraḥ pratāpavān

prāpa triviṣṭapaṃ sadyaḥ sarvasainyasamāvṛtaḥ //
dadhmau śaṃkhaṃ jaladhijo nedurvīrāśca sarvataḥ

gatvā triviṣṭapaṃ daityo nandanādhiṣṭhito'bhavat //
sarva sainyaṃ samāvṛtya kurvāṇaḥ siṃhavadravam

puramāvṛtya tiṣṭhattaddṛṣṭvā sainyabalaṃ mahat//
niryayustvamarāvatyā devā yuddhāya daṃśitāḥ //

tatassamabhavadyuddhaṃ devadānavasenayoḥ //
musalaiḥ parighairbāṇairgadāparaśuśaktibhiḥ

te'nyonyaṃ samadhāvetāṃ jaghnatuśca parasparam //
kṣaṇenābhavatāṃ sene rudhiraughapariplute

patitaiḥ pātyamānaiśca gajāśvarathapattibhiḥ //
vyarājata raṇe bhūmissaṃdhyābhrapaṭalairiva

tatra yuddhe mṛtāndaityānbhārgavastānajīvayat //
vidyayāmṛtajīvinyā maṃtritaistoyabindubhiḥ

devānapi tathā yuddhe tatrājīvayadaṃgirāḥ //
divyauṣadhaissamānīya droṇādressa punaḥpunaḥ

dṛṣṭavānsa tathā yuddhe punareva samutthitān //
jalaṃdharaḥ krodhavaśo bhārgavaṃ vākyamabravīt

jalaṃdhara uvāca //
mayā devā hatā yuddhe uttiṣṭhaṃti kathaṃ punaḥ //
tataḥ saṃjīvinī vidyā naivānyatreti vai śrutā

sanatkumāra uvāca//
ityākarṇya vacastasya sindhuputrasya bhārgavaḥ //
pratyuvāca prasannātmā guruśśukro jalaṃdharam

śukra uvāca //
divyauṣadhīssamānīya droṇādreraṃgirāssurān //
jīvayatyeṣa vai tāta satyaṃ jānīhi me vacaḥ

jayamicchasi cettāta śṛṇu me vacanaṃ śubham //
tataḥ so'raṃ bhujābhyāṃ tvaṃ droṇamabdhāvupāhara

//sanatkumāra uvāca //
ityuktassa tu daityendro guruṇā bhārgaveṇa ha //
drutaṃ jagāma yatrāsāvāste caivādrirāṭ ca saḥ

bhujābhyāṃ tarasā daityo nītvā droṇaṃ ca taṃ tadā//
prākṣipatsāgare tūrṇaṃ citraṃ na haratejasi

punarāyānmahāvīrassindhuputro mahāhavam//
jaghānāstraiśca vividhaissurānkṛtvā balaṃ mahat

atha devānhatāndṛṣṭvā droṇādrimagamadguruḥ //
tāvattatra girīdraṃ taṃ na dadarśa surārcitaḥ

jñātvā daityahṛtaṃ droṇaṃ dhiṣaṇo bhayavihvalaḥ //
āgatya devānprovāca jīvo vyākulamānasaḥ

gururuvāca //
palāyadhvaṃ surāssarve droṇo nāsti girirmahān //
dhruvaṃ dhvastaśca daityena pāthodhitanayena hi

jalaṃdharo mahādaityo nāyaṃ jetuṃ kṣamo yataḥ //
rudrāṃśasaṃbhavo hyeṣa sarvāmaravimardanaḥ

mayā jñātaḥ prabhāvo'sya yathotpannaḥ svayaṃ surāḥ //
śivāpamānakṛcchakraceṣṭitaṃ smaratākhilam

sanatkumāra uvāca //
śrutvā tadvacanaṃ devāssurācāryaprakīrtitam//
jayāśāṃ tyaktavaṃtaste bhayavihvalitāstathā

daityarājena tenātihanyamānāssamaṃtataḥ //
dhairyaṃ tyaktvā palāyaṃta diśo daśa savāsavāḥ

devānvidrāvitāndṛṣṭvā daityassāgaranaṃdanaḥ //
śaṃkhabherī jayaravaiḥ praviveśāmarāvatīm

praviṣṭe nagarīṃ daitye devāḥ śakrapurogamāḥ //
suvarṇādriguhāṃ prāptā nyavasandaityatāpitāḥ

tadaiva sarveṣvasuro'dhikāreṣvindrādikānāṃ viniveśya samyak//
śuṃbhādikāndaityavarān pṛthakpṛthaksvayaṃ suvarṇādiguhāṃ vyagānmune

iti śrīśivamahāpurāṇe dvitīyāyāṃ rudrasaṃhitāyāṃ pañcame yuddhakhaṇḍe jalaṃdharavadhopākhyāne devajalaṃdharayuddhavarṇanaṃ nāma paṃcadaśo'dhyāyaḥ