Shiva Purana · Chapter 2.4.9

brahmovāca //
devadeva guha svāmiñśāṃkare pārvatīsuta //
na śobhate raṇo viṣṇu tārakāsurayorvṛthā

viṣṇunā na hi vadhyo'sau tārako balavānati //
mayā dattavarastasmātsatyaṃ satyaṃ vadāmyaham

nānyo haṃtāsya pāpasya tvāṃ vinā pārvatīsuta //
tasmāttvayā hi kartavyaṃ vacanaṃ me mahāprabho

sannaddho bhava daityasya vadhāyāśu paraṃtapa //
tadvadhārthaṃ samutpannaḥ śaṃkarāttvaṃ śivāsuta

rakṣa rakṣa mahāvīra tridaśānvyathitānraṇe //
na bālastvaṃ yuvā naiva kiṃ tu sarveśvaraḥ prabhuḥ

śakraṃ paśya tathā viṣṇuṃ vyākulaṃ ca surān gaṇān//
evaṃ jahi mahādaityaṃ trailokyaṃ sukhinaṃ kuru

anena vijitaścendro lokapālaiḥ purā saha //
viṣṇuścāpi mahāvīro tarjitastapaso balāt

trailokyaṃ nirjitaṃ sarvamasureṇa durātmanā//
idānīṃ tava sānnidhyātpunaryuddhaṃ kṛtaṃ ca taiḥ

tasmāttvayā nihaṃtavyastārakaḥ pāpapūruṣaḥ //
anyavadhyo na caivāyaṃ madvarācchaṃkarātmaja

//brahmovāca//
iti śrutvā mama vacaḥ kumāraḥ śaṃkarātmajaḥ //
vijahāsa prasannātmā tathāstviti vaco'bravīt

viniścityāsuravadhaṃ śāṃkarissa mahā prabhuḥ //
vimānādavatīryātha padātirabhavattadā

padbhyāṃ tadāsau paridhāvamāno reje'tivīraḥ śivajaḥ kumāraḥ//
kare samādāya mahāprabhāṃ tāṃ śaktiṃ maholkāmiva dīptidīptām

dṛṣṭvā tamāyātamatipracaṃḍamavyākulaṃ ṣaṇmukhamaprameyam//
daityo babhāṣe surasattamānsa kumāra eṣa dviṣatāṃ prahaṃtā

anena sākaṃ hyahamekavīro yotsye ca sarvānahameva vīrān//
gaṇāṃśca sarvānapi ghātayāmi salokapālānharināyakāṃśca

ityevamuktvā sa tadā mahābalaḥ kumāramuddiśya yayau ca yoddhum //
jagrāha śaktiṃ paramādbhutāṃ ca sa tārako devavarānbabhāṣe

// tāraka uvāca //
kumāro me'grataścādya bhavadbhiśca kathaṃ kṛtaḥ //
yūyaṃ gatatrapā devā viśeṣācchakrameśvarau

puraitābhyāṃ kṛtaṃ karma viruddhaṃ vedamārgataḥ //
tacchṛṇudhvaṃ mayā proktaṃ varṇayāmi viśeṣataḥ

tatra viṣṇuśchalī doṣī hyavivekī viśe ṣataḥ //
baliryena purā baddhaśchalamāśritya pāpataḥ

tenaiva yatnataḥ pūrvamasurau madhukaiṭabhau //
śirauhīnau kṛtau dhaurtyādvedamārgo vivarjitaḥ

mohinīrūpato'nena paṃktibhedaḥ kṛto hi vai //
devāsurasudhāpāne vedamārgo vigarhitaḥ

rāmo bhūtvā hatā nārī vālī vidhvaṃsito hi saḥ //
punarvaiśravaṇo viprau hato nītirhatā śruteḥ

pāpaṃ vinā svakīyā strī tyaktā pāparatena yat //
tatrāpi śrutimārgaśca dhvaṃsitassvārthahetave

svajananyāśśiraśchinnamavatāre rasākhyake//
guruputrāpamānaśca kṛto'nena durātmanā

kṛṣṇo bhūtvānyanāryaśca dūṣitāḥ kuladharmataḥ //
śrutimārgaṃ parityajya svavivāhāḥ kṛtāstathā

punaśca vedamārgo hi niṃdito navame bhave//
sthāpitaṃ nāstikamataṃ vedamārgavirodhakṛt

evaṃ yena kṛtaṃ pāpaṃ vedamārgaṃ visṛjya vai //
sa kathaṃ vijayedyuddhe bhaveddharmavatāṃvaraḥ

bhrātā jyeṣṭhaśca yastasya śakraḥ pāpī mahānmataḥ //
tena pāpānyanekāni kṛtāni nijahetutaḥ

nikṛtto hi ditergarbhassvārtha hetorviśeṣataḥ //
dharṣitā gautamastrī vai hato vṛtraśca viprajaḥ

viśvarūpadvijātervai bhāgineyasya yadguroḥ //
nikṛttāni ca śīrṣāṇi tadadhvādhvaṃsitaśśruteḥ

kṛtvā bahūni pāpāni hariśśakraḥ punaḥpunaḥ //
tejobhirvihatāveva naṣṭavīryau viśeṣataḥ

tayorbalena no yūyaṃ saṃgrāme jayamāpsyatha //
kimarthaṃ mūḍhatāṃ prāpya prāṇāṃstyaktumihāgatāḥ

jānantau dharmametau na svārthalaṃpaṭamānasau //
dharmaṃ vinā'marāḥ kṛtyaṃ niṣphalaṃ sakalaṃ bhavet

mahādhṛṣṭāvimau medya kṛtavaṃtau puraśśiśum //
ahaṃ bālaṃ vadhiṣyāmi tayosso'pi bhaviṣyati

kiṃ bāla ito yāyāddūraṃ prāṇaparīpsayā //
ityuktoddiśya ca harī vīrabhadramuvāca saḥ

purā hatāstvayā viprā dakṣayajñe hyanekaśaḥ //
tatkarmaṇaḥ phalaṃ cādya darśayiṣyāmi te'nagha

brahmovāca //
ityevamuktvā tu vidhūya puṇyaṃ nijaṃ sa tanniṃdanakarmaṇā vai //
jagrāha śaktiṃ paramādbhutāṃ ca sa tārako yuddhavatāṃ variṣṭhaḥ

taṃ bālāntikamāyātaṃ tārakāsuramojasā //
ājaghāna ca vajreṇa śakro guhapurassaraḥ

tena vajraprahāreṇa tārako jarjarīkṛtaḥ//
bhūmau papāta sahasā niṃdāhatabalaḥ kṣaṇam

patito'pi samutthāya śaktyā taṃ prāharadruṣā //
puraṃdaraṃ gajasthaṃ hi pātayāmāsa bhūtale

hāhākāro mahānāsītpatite ca puraṃdare //
senāyāṃ nirjarāṇāṃ hi taddṛṣṭvā kleśa āviśat

tārakeṇā'pi tatraiva yatkṛtaṃ karma duḥkhadam //
svanāśakāraṇaṃ dharmavirudaṃ tannibodha me

patitaṃ ca padākramya hastādvajraṃ pragṛhya vai/
punarudvajraghātena śakramātāḍayadbhṛśam

evaṃ tiraskṛtaṃ dṛṣṭvā śakraviṣṇupratāpavān //
cakramudyasya bhagavāṃstārakaṃ sa jaghāna ha

cakraprahārābhito nipapāta kṣitau hi saḥ //
punarutthāya daityendraśaktyā viṣṇuṃ jaghāna tam

tena śaktiprahāreṇa patito bhuvi cācyutaḥ//
karo mahānāsīccukruśuścā'tinirjarāḥ

nimeṣeṇa punarviṣṇuryāvaduttiṣṭhate svayam//
tāvatsa vīrabhadro hi tatkṣaṇādāgato'suram

triśūlaṃ ca samudyamya vīrabhadraḥ pratāpavān //
tārakaṃ ditijādhīśaṃ jaghāna prasabhaṃ balī

tattriśūlaprahāreṇa sa papāta kṣitau tadā //
patito'pi mahātejāstārakaḥ punarutthitaḥ

kṛtvā krodhaṃ mahāvīrassakalāsuranāyakaḥ //
jaghāna parayā śaktyā vīrabhadraṃ tadorasi

vīrabhadro'pi patito bhūtale mūrchitaḥ kṣaṇam //
tacchaktyā parayā krodhānnihato vakṣasi dhuvam

sagaṇaścaiva devāste gaṃdharvoragarākṣasāḥ //
hāhākāreṇa mahatā cukruśuśca muhurmuhuḥ

nimeṣamātrātsahasā mahaujāssa vīrabhadro dviṣatāṃ nihaṃtā//
triśūlamudyamya taḍitprakāśaṃ jājvalyamānaṃ prabhayā vireje

svarociṣā bhāsitadigvitānaṃ sūryendubimbāgnisamānamaṃḍalam //
mahāprabhaṃ vīrabhayāvahaṃ paraṃ kālākhyamatyaṃtakaraṃ mahojjvalam

yāvattriśūlena tadā haṃtukāmo mahābalaḥ //
vīrabhadro'suraṃ yāvatkumāreṇa nivāritaḥ

iti śrīśivamahāpurāṇe dvitīyāyāṃ rudrasaṃhitāyāṃ caturthe kumārakhaṃḍe tārakavākyaśakraviṣṇuvī rabhadrayuddhavarṇanaṃ nāma navamo'dhyāyaḥ