Shiva Purana · Chapter 2.4.8

brahmovāca //
iti te varṇitastāta devadānava senayoḥ //
saṃgrāmastumulo'tīva tatprabhvo śṛṇu nārada

evaṃ yuddhe'titumule devadānavasaṃkṣaye //
tārakeṇaiva devendraśśaktyā ramayā saha

sadyaḥ papāta nāgāśca dharaṇyāṃ mūrcchito'bhavat//
paraṃ kaśmalamāpede vajradhārī sureśvaraḥ

tathaiva lokapāssarve'suraiśca balavattaraiḥ //
parājitā raṇe tāta mahāraṇaviśāradaiḥ

anye'pi nirjarā daityairyuddhyamānāḥ parājitāḥ //
asahaṃto hi tattejaḥ palāyanaparāyaṇāḥ

jagarjurasurāstatra jayinassukṛtodyamāḥ //
siṃhanādaṃ prakurvantaḥ kolāhalaparāyaṇāḥ

etasminnaṃtare tatra vīrabhadro ruṣānvitaḥ //
āsasāda gaṇairvīraistārakaṃ vīramāninam

nirjarān pṛṣṭhataḥ kṛtvā śivakopodbhavo balī//
tatsammukho babhūvātha yoddhukāmo gaṇāgraṇīḥ

tadā te pramathāssarve daityāśca paramotsavāḥ//
yuyudhussaṃyuge'nyonyaṃ prasaktāśca mahāraṇe

triśūlairṛṣṭibhiḥ pāśaiḥ khaḍgaiḥ paraśupaṭṭiśaiḥ //
nijaghnussamare'nyonyaṃ raṇe raṇaviśāradāḥ

tārako vīrabhadreṇa sa triśūlāhato bhṛśam //
papāta sahasā bhūmau kṣaṇaṃ mūrchāpariplutaḥ

utthāya sa drutaṃ vīrastārako daityasattamaḥ //
labdhasaṃjño balācchaktyā vīrabhadraṃ jaghāna ha

vīrabhadrastathā vīro mahātejā hi tārakam //
jaghāna triśikhenāśu ghoreṇa niśitena tam

sopi śaktyā vīrabhadraṃ jaghāna samare tataḥ //
tārako ditijādhīśaḥ prabalo vīrasaṃmataḥ

evaṃ saṃyuddhyamānau tau jaghnatuścetaretaram //
nānāstraśastraissamare raṇavidyāviśāradau

tayormahātmanostatra dvandvayuddhamabhūttadā //
sarveṣāṃ paśyatāmeva tumulaṃ romaharṣaṇam

tato bherīmṛdaṃgāśca paṭahānakagomukhāḥ //
vinedurvihatā vīraiśśṛṇvatāṃ subhayānakāḥ

yuyudhātetisannaddhau prahārairjarjarīkṛtau //
anyonyamatisaṃrabdhau tau budhāṃgārakāviva

evaṃ dṛṣṭvā tadā yuddhaṃ vīrabhadrasya tena ca //
tatra gatvā vīrabhadramavocastvaṃ śivapriyaḥ

nārada uvāca //
vīrabhadra mahāvīra gaṇānāmagraṇīrbhavān //
nivartasva raṇādasmādrocate na vadhastvayā

evaṃ niśamya tvadvākyaṃ vīrabhadro gaṇāgraṇīḥ //
avadatsa ruṣāviṣṭastvāṃ tadā tu kṛtāṃjaliḥ

vīrabhadra uvāca //
munivarya mahāprājña śṛṇu me paramaṃ vacaḥ //
tārakaṃ ca vadhiṣyāmi paśya me'dya parākramam

ānayaṃti ca ye vīrāssvāminaṃ raṇasaṃsadi //
te pāpino mahāklībā vinaśyanti raṇaṃ gatāḥ

asadgatiṃ prāpnuvanti teṣāṃ ca nirayo dhuvam //
vīrabhadro hi vijñeyo na vācyaste kadācana

śastrāstrairbhinnagātrā ye raṇaṃ kurvaṃti nirbhayāḥ //
ihāmutra praśaṃsyāste labhyante sukhamadbhutam

śṛṇvantu mama vākyāni devā haripurogamāḥ //
atārakāṃ mahīmadya kariṣye svāmivarjitām

ityuktvā pramarthaissārddhaṃ vīrabhadro hi śūladhṛk //
viciṃtya manasā śaṃbhuṃ yuyudhe tārakeṇa hi

vṛṣārūḍhairanekaiśca triśūlavaradhāribhiḥ //
mahāvīrastrinetraiśca sa reje raṇasaṃgataḥ

kolāhalaṃ prakurvaṃto nirbhayāśśataśo gaṇāḥ //
vīrabhadraṃ puraskṛtya yuyudhurdānavaissaha

asurāste'pi yuyudhustārakāsurajīvinaḥ //
balotkaṭā mahāvīrā mardayanto gaṇān ruṣā

punaḥ punaścaiva babhūva saṃgaro mahotkaṭo daityavarairgaṇānām //
praharṣamāṇāḥ paramāstrakovidāstadā gaṇāste jayino babhūvuḥ

gaṇairjitāste prabalairasurā vimukhā raṇe//
palāyanaparā jātā vyathitā vyagramānasāḥ

evaṃ bhraṣṭaṃ svasainyaṃ taddṛṣṭvā tatpālako'suraḥ //
tārako hi ruṣāviṣṭo haṃtuṃ devagaṇān yayau

bhujānāmayutaṃ kṛtvā siṃhamāruhya vegataḥ //
pātayāmāsa tāndevāngaṇāṃśca raṇamūrddhani

sa dṛṣṭvā tasya tatkarma vīrabhadro gaṇāgraṇīḥ //
cakāra sumahatkopaṃ tadvadhāya mahābalī

smṛtvā śivapadāṃbhojaṃ jagrāha triśikhaṃ param //
jajvalustejasā tasya diśaḥ sarvā nabhastathā

etasminnantare svāmī vārayāmāsa taṃ raṇam //
vīrabāhumukhānsadyo mahākautukadarśakaḥ

tadājñayā vīrabhadro nivṛtto'bhūdraṇāttadā //
kopaṃ cakre mahāvīrastārako'suranāyakaḥ

cakāra bāṇavṛṣṭiṃ ca suropari tadā'suraḥ //
tapto'hvāsītsurānsadyo nānāstraraṇakovidaḥ

evaṃ kṛtvā mahatkarma tārako'surapālakaḥ //
sarveṣāmapi devānāmaśakyo balināṃ varaḥ

evaṃ nihanyamānāṃstān dṛṣṭvā devān bhayākulān //
kopaṃ kṛtvā raṇāyāśu saṃnaddho'bhavadacyutaḥ

cakraṃ sudarśanaṃ śārṅgaṃ dhanurādāya sāyudhaḥ //
abhyudyayau mahādaityaṃ raṇāya bhagavān hariḥ

tatassamabhavadyuddhaṃ haritārakayormahat //
lomaharṣaṇamatyugraṃ sarveṣāṃ paśyatāṃ mune

gadāmudyamya sa harirjaghānāsuramojasā //
dvidhā cakāra tāṃ daityastriśikhena mahābalī

tatassa kruddho bhagavāndevānāmabhayaṃkaraḥ //
śārṅgacyutaiśśaravyūhairjaghānāsuranāyakam

so'pi daityo mahāvīrastārakaḥ paravīrahā //
ciccheda sakalānbāṇānsvaśarairniśitairdrutam

atha śaktyā jaghānāśu murāriṃ tārakāsuraḥ //
bhūmau papāta sa haristatprahāreṇa mūrcchitaḥ

jagrāha sa ruṣā cakramutthitaḥ kṣaṇato'cyutaḥ //
siṃhanādaṃ mahatkṛtvā jvalajjvālāsamākulam

tena tañca jaghānāsau daityānāmadhipaṃ hariḥ //
tatprahāreṇa mahatā vyathito nyapatadbhuvi

punaścotthāya daityendrastārako'suranāyakaḥ //
ciccheda tvaritaṃ cakraṃ svaśaktyātibalānvitaḥ

punastayā mahāśaktyā jaghānāmaravallabham //
acyuto'pi mahāvīrā nandakena jaghāna tam

evamanyonyamasuro viṣṇuśca balavānubhau //
yuyudhāte raṇe bhūri tatrākṣatabalau mune

iti śrīśivamahāpurāṇe dvitīyāyāṃ rudrasaṃhitāyāṃ caturthe kumārakhaṇḍe deva daityasāmānyayuddhavarṇanaṃ nāmāṣṭamo'dhyāyaḥ