Shiva Purana · Chapter 2.4.7

// brahmovāca //
haryyādayassurāste ca dṛṣṭvā taccaritaṃ vibhoḥ //
suprasannā babhūvurhi viśvāsāsaktamānasāḥ

valgaṃtaḥ kurvato nādaṃ bhāvitāśśivatejasā //
kumārante puraskṛtya tārakaṃ haṃtumāyayuḥ

devānāmudyamaṃ śrutvā tārako'pi mahābalaḥ//
sainyena mahatā sadyo yayau yoddhuṃ surān prati

devā dṛṣṭvā samāyāṃtaṃ tārakasya mahābalam//
balena bahukurvantaḥ siṃhanādaṃ visismiyuḥ

tadā nabho''ṅganā vāṇīṃ jagādopari satvaram //
śaṅkarapreritā sadyo haryādīnakhilān surān

// vyomavāṇyuvāca //
kumāraṃ ca puraskṛtya surā yūyaṃ samudyatāḥ //
daityānvijitya saṃgrāme jayino'tha bhaviṣyatha

brahmovāca//
vācaṃ tu khecarīṃ śrutvā devāssarve samutsukāḥ //
vīraśabdān prakurvaṃto nirbhayā hyabhavaṃstadā

kumāraṃ ca puraskṛtya sarve te jātasādhvasāḥ //
yoddhukāmāssurā jagmurmahīsāgarasaṃgamam

ājagāma drutaṃ tatra yatra devāssa tārakaḥ //
sainyena mahatā sārddhaṃ surai rbahubhirāvṛt

raṇaduṃdubhayo neduḥ pralayāṃbudnissvanāḥ //
karkaśāni ca vādyāni parāṇi ca tadāgame

garjamānāstadā daityāstārakeṇasureṇa ha //
kaṃpayanto bhuvaṃ pādakramairvalgunakārakāḥ

tacchrutvā ravamatyugraṃ sarve devā vinirbhayāḥ //
aikapadyena cottasthuryoddhukāmāśca tārakam

gajamāropya devendraḥ kumāraṃ tyagrato'bhavat //
surasainyena mahatā lokapālaissamāvṛtaḥ

tadā duṃdubhayo nedurbherītūryāṇyanekaśaḥ //
vīṇāveṇumṛdaṃgāni tathā gaṃdharvanissvanāḥ

gajaṃ dattvā mahendrāya kumāro yānamāruhat //
anekāścaryasaṃbhūtaṃ nānāratnasamanvitam

vimānamāruhya tadā mahāyaśāssa śāṃkarissarvaguṇairupetaḥ //
śriyā sametaḥ parayā babhau mahān saṃvījyamānaścamarairmahāgrabhaiḥ

prācetasaṃ chatramatīvasuprabhaṃ ratnairupetaṃ vividhairvirājitam//
dhṛtaṃ tadā tacca kumāramūrdhni vai hyanantacāndraiḥ kiraṇairmahāprabhaiḥ

militāste tadā sarve devāśśakrapurogamā //
svaiḥsvairbalaiḥ parivṛtā yuddhakāmā mahābalāḥ

evaṃ devāśca daityāśca yoddhukāmāḥ sthitā bhuvi //
sainyena mahatā tena vyūhaṃ kṛtvā pṛthak pṛthak

te sene suradaityānāṃ śuśubhāte parasparam //
haṃtukāme tadānyonyaṃ stūyamāne ca bandibhiḥ

ubhe senaṃ tadā teṣāmagarjetāṃ vanopame //
bhayaṃkare'tyavīrāṇāmitareṣāṃ sukhāvahe

etasminnantare tatra balonmattāḥ parasparam//
daityā devā mahāvīrā yuyudhuḥ krodhavihvalāḥ

āsītsutumulaṃ yuddhaṃ devadaityasamākulam //
ruṇḍamuṃḍāṃkitaṃ sarvaṃ kṣaṇena samapadyata

bhūmau nipatitāstatra śataśo'tha sahasraśaḥ //
nikṛttāṃgā mahāśastrairnihatā vīrasaṃmatāḥ

keṣāṃcidbāhavaśchinnā khaḍpātaissudāruṇaiḥ //
keṣāṃcidūravaśchinnā vīrāṇāṃ mānināṃ mṛdhe

kecinmathitasarvāṃgā gadābhirmudgaraistathā //
kecinnirbhinnahṛdayāḥ pāśairbhallaiśca pātitāḥ

kecidvidāritāḥ pṛṣṭhe kuṃtairṛṣṭibhiraṃkuśaiḥ //
chinnānyapi śirāṃsyeva patitāni ca bhūtale

bahūni ca kabaṃdhāni nṛtyamānāni tatra vai //
valgamānāni śataśo udyatāstrakarāṇi ca

nadyaḥ pravartitāstatra śataśo'sṛṅvahāstadā //
bhūtapretādayastatra śataśaśca samāgatāḥ

gomāyavaśśivā tatra bhakṣayantaḥ palaṃ bahu //
tathā gṛdhravaṭāśyenā vāyasā māṃsabhakṣakāḥ //
bubhujuḥ patitānāṃ ca palāni subahūni vai

etasminnantare tatra tārakākhyo mahābalaḥ //
sainyena mahatā sadyo yayau yoddhuṃ surān prati

devā dṛṣṭvā samāyāntaṃ tārakaṃ yuddhadurmadam //
yoddhukāmaṃ tadā sadyo yayuśśakrādayastadā //
babhūvātha mahonnādassenayorubhayorapi

athābhūddvaṃdvayuddhaṃ hi surāsuravimardanam//
yaṃ dṛṣṭvā harṣitā vīrāḥ klībāśca bhayamāgatā

tārako yuyudhe yuddhe śakreṇa ditijo balī//
agninā saha saṃhrādo jaṃbhenaiva yamaḥ svayam

mahāprabhurnairṛtena pāśī saha balena ca //
suvīro vāyunā sārdhaṃ pavamānena guhyarāṭ

īśānena samaṃ śaṃbhuryuyudhe raṇavittamaḥ //
śuṃbhaśśeṣeṇa yuyudhe kuṃbhaścandreṇa dānavaḥ

kuṃbaro mihireṇājau mahābala parākramaḥ //
yuyudhe paramāstraiśca nānāyuddhaviśāradaḥ

evaṃ dvandvena yuddhena mahatā ca surāsurāḥ //
saṃgare yuyudhussarve balena kṛtaniśca yāḥ //३८
anyonyaṃ sparddhamānāste'marā daityā mahābalāḥ //
tasmindevāsure yuddhe durjayā abhavanmune

tadā ca teṣāṃ suradānavānāṃ babhūva yuddhaṃ tumulaṃ jayaiṣiṇām //
sukhāvahaṃ vīramanasvināṃ vai bhayāvahaṃ caiva tathetareṣām

mahī mahāraudratarā vinaṣṭakaissurāsurairvai patitairanekaśaḥ //
tasminnagamyātibhayānakā tadā jātā mahāsaukhyavahā manasvinām

iti śrīśivamahāpurāṇe dvitīyāyāṃ rudrasaṃhitāyāṃ caturthe kumārakhaṇḍe yuddhaprāraṃbhavarṇanaṃ nāma saptamo'dhyāyaḥ