Shiva Purana · Chapter 2.4.6

// brahmovāca //
atha tatra sa gāṃgeyo darśayāmāsa sūtikām //
tāmeva śṛṇu suprītyā nārada tvaṃ svabhaktidām

dvija eko nāradākhya ājagāma tadaiva hi //
tatrādhvarakaraḥ śrīmāñśaraṇārthaṃ guhasya vai

sa vipraḥ prāpya nikaṭaṃ kārttikasya prasannadhīḥ //
svābhiprāyaṃ samācakhyau supraṇamya śubhaiḥ stavaiḥ

// vipra uvāca //
śṛṇu svāminvaco medya kaṣṭaṃ me vinivāraya //
sarvabrahmāṃḍanāthastvamataste śaraṇaṃ gataḥ

ajamedhādhvaraṃ kartumāraṃbhaṃ kṛtavānaham //
so'jo gato gṛhānme hi troṭayitvā svabaṃdhanam

na jāne sa gataḥ kutrā'nveṣaṇaṃ tatkṛtaṃ bahu //
na prāpto'tassa balavān bhaṃgo bhavati me kratoḥ

tvayi nāthe sati vibho yajñabhaṃgaḥ kathaṃ bhavet //
vicāryyaivā'khileśāna kāma pūrṇaṃ kuruṣva me

tvāṃ vihāya śaraṇyaṃ kaṃ yāyāṃ śivasuta prabho //
sarvabrahmāṃḍanāthaṃ hi sarvāmarasusevitam

dīnabaṃdhurdayāsindhussusevyā bhaktavatsalaḥ//
haribrahmādidevaiśca sustutaḥ parameśvaraḥ

pārvatīnandanasskandaḥ paramekaḥ paraṃtapaḥ //
paramātmā'tmadassvāmī satāṃ ca śaraṇārthinām

dīnānātha maheśa śaṃkarasuta trailokyanātha prabho māyādhīśa samāgato'smi śaraṇaṃ māṃ pāhi viprapriya //
tvaṃ sarvaprabhupriyaḥ khilavidabrahmādidevaistutastvaṃ māyākṛtirātmabhaktasukhado rakṣāparo māyikaḥ

bhaktaprāṇaguṇākarastriguṇato bhinnosi śaṃbhupriyaḥ śaṃbhuḥ śaṃbhusutaḥ prasannasukhadassaccitsvarūpo mahān//
sarvajñastripuraghnaśaṃkarasutaḥ satpremavaśyassadā ṣaḍvaktraḥ priyasādhurānatapriyassarveśvara śśaṃkaraḥ //
sādhudrohakaraghna śaṃkaraguro brahmāṃḍanātho prabhuḥ sarveṣāmamarādisevitapado māṃ pāhi sevāpriya

vairibhayaṃkara śaṃkara janaśaraṇasya vande tava padapadmaṃ sukhakaraṇasya //
vijñaptiṃ mama karṇe skanda nidhehi nijabhaktiṃ janacetasi sadā vidhehi

karoti kiṃ tasya balī vipakṣo dakṣo'pi pakṣobhayāpārśvaguptaḥ //
kintakṣakopyāmiṣabhakṣako vā tvaṃ rakṣako yasya sadakṣamānaḥ

vibudhagururapi tvāṃ stotumīśo na hi syātkathaya kathamahaṃ syāṃ maṃdabuddhirvarārcyaḥ //
śuciraśuciranāryo yādṛśastādṛśo vā padakamala parāgaṃ skanda te prārthayāmi

he sarveśvara bhaktavatsala kṛpāsindho tvadīyo'smyahaṃ bhṛtyassvasya na sevakasya gaṇapasyā'' gaśśataṃ satprabho //
bhaktiṃ kvāpi kṛtāṃ manāgapi vibho jānāsi bhṛtyārtihā//
tvatto nāstyaparo'vitā na bhagavan matto naraḥ pāmaraḥ

kalyāṇakarttā kalikalmaṣaghnaḥ kuberabandhuḥ karuṇārdracittaḥ //
triṣaṭkanetro rasavaktraśobhī yajñaṃ prapūrṇaṃ kuru me guha tvam

rakṣakastvaṃ trilokasya śaraṇāgatavatsalaḥ //
yajñakarttā yajñabharttā harase vighnakāriṇām

vighnavāraṇa sādhūnāṃ sarga kāraṇa sarvataḥ //
pūrṇaṃ kuru mameśāna sutayajña namostu te

sarvatrātā skanda hi tvaṃ sarvajñātā tvameva hi //
sarveśvarastvamīśāno niveśasakalā'vanaḥ

saṃgītajñastvamevāsi vedavijñaḥ paraḥ prabhuḥ //
sarvasthātā vidhātā tvaṃ devadevassatāṃ gatiḥ

bhavānīnandanaśśaṃbhutanayo vayunaḥ svarāṭ //
dhyātā dhyeyaḥ pitṝṇāṃ hi pitā yoniḥ sadātmanām

// brahmovāca //
ityākarṇya vacastasya devasamrāṭ śivātmajaḥ //
svagaṇaṃ vīrabāhvākhyaṃ preṣayāmāsa tatkṛte

tadājñayā vīrabāhustadanveṣaṇahetave//
praṇamya svāminaṃ bhaktyā mahāvīro drutaṃ yayau

anveṣaṇaṃ cakārāsau sarvabrahmāṇḍagolake //
na prāpa tamajaṃ kutra śuśrāva tadupadravam

jagāmā'tha sa vaikuṃṭhaṃ tatrā'jaṃ pradadarśa tam //
upadravaṃ prakurvantaṃ galayūpaṃ mahābalam

dhṛtvā taṃ śṛṃgayo vīro dharṣayitvā tivegataḥ //
ānināya svāmipuro vikurvaṃtaṃ ravaṃ bahu

dṛṣṭvā taṃ kārtikasso'ramāruroha sa taṃ prabhuḥ //
dhṛtabrahmāṇḍagarimā mahāsūtikaro guhaḥ

muhūrtamātratasso'jo brahmāṃḍaṃ sakalaṃ mune //
babhrāma śrama evāśu punastatsthānamāgataḥ

tata uttīrya sa svāmī samuvāsa svamāsanam//
so'jaḥ sthitastu tatraiva sa nārada uvāca tam

// nārada uvāca //
namaste deva deveśa dehi me'jaṃ kṛpānidhe//
kuryāmadhvaramānandātsakhāyaṃ kuru māmaho

// kārttika uvāca //
vadhayogyo na viprā'jaḥ svagṛhaṃ gaccha nārada //
pūrṇo'stu te'dhvarassarvaḥ prasādādeva me kṛtaḥ

brahmovāca //
ityākarṇya dvijassvāmī vacanaṃ prītamānasaḥ//
jagāma svālayaṃ dattvā tasmā āśiṣamuttamām

iti śrīśivamahāpurāṇe dvitīyāyāṃ rudrasaṃhitāyāṃ caturthe kumārakhaṃḍe kumārā'dbhutacari tavarṇanaṃ nāma ṣaṣṭho'dhyāyaḥ