શિવ પુરાણ · અધ્યાય 2.4.7

॥ બ્રહ્મોવાચ ॥
હર્ય્યાદયસ્સુરાસ્તે ચ દૃષ્ટ્વા તચ્ચરિતં વિભોઃ ॥
સુપ્રસન્ના બભૂવુર્હિ વિશ્વાસાસક્તમાનસાઃ

વલ્ગંતઃ કુર્વતો નાદં ભાવિતાશ્શિવતેજસા ॥
કુમારન્તે પુરસ્કૃત્ય તારકં હંતુમાયયુઃ

દેવાનામુદ્યમં શ્રુત્વા તારકોઽપિ મહાબલઃ॥
સૈન્યેન મહતા સદ્યો યયૌ યોદ્ધું સુરાન્ પ્રતિ

દેવા દૃષ્ટ્વા સમાયાંતં તારકસ્ય મહાબલમ્॥
બલેન બહુકુર્વન્તઃ સિંહનાદં વિસિસ્મિયુઃ

તદા નભોઽઽઙ્ગના વાણીં જગાદોપરિ સત્વરમ્ ॥
શઙ્કરપ્રેરિતા સદ્યો હર્યાદીનખિલાન્ સુરાન્

॥ વ્યોમવાણ્યુવાચ ॥
કુમારં ચ પુરસ્કૃત્ય સુરા યૂયં સમુદ્યતાઃ ॥
દૈત્યાન્વિજિત્ય સંગ્રામે જયિનોઽથ ભવિષ્યથ

બ્રહ્મોવાચ॥
વાચં તુ ખેચરીં શ્રુત્વા દેવાસ્સર્વે સમુત્સુકાઃ ॥
વીરશબ્દાન્ પ્રકુર્વંતો નિર્ભયા હ્યભવંસ્તદા

કુમારં ચ પુરસ્કૃત્ય સર્વે તે જાતસાધ્વસાઃ ॥
યોદ્ધુકામાસ્સુરા જગ્મુર્મહીસાગરસંગમમ્

આજગામ દ્રુતં તત્ર યત્ર દેવાસ્સ તારકઃ ॥
સૈન્યેન મહતા સાર્દ્ધં સુરૈ ર્બહુભિરાવૃત્

રણદુંદુભયો નેદુઃ પ્રલયાંબુદ્નિસ્સ્વનાઃ ॥
કર્કશાનિ ચ વાદ્યાનિ પરાણિ ચ તદાગમે

ગર્જમાનાસ્તદા દૈત્યાસ્તારકેણસુરેણ હ ॥
કંપયન્તો ભુવં પાદક્રમૈર્વલ્ગુનકારકાઃ

તચ્છ્રુત્વા રવમત્યુગ્રં સર્વે દેવા વિનિર્ભયાઃ ॥
ઐકપદ્યેન ચોત્તસ્થુર્યોદ્ધુકામાશ્ચ તારકમ્

ગજમારોપ્ય દેવેન્દ્રઃ કુમારં ત્યગ્રતોઽભવત્ ॥
સુરસૈન્યેન મહતા લોકપાલૈસ્સમાવૃતઃ

તદા દુંદુભયો નેદુર્ભેરીતૂર્યાણ્યનેકશઃ ॥
વીણાવેણુમૃદંગાનિ તથા ગંધર્વનિસ્સ્વનાઃ

ગજં દત્ત્વા મહેન્દ્રાય કુમારો યાનમારુહત્ ॥
અનેકાશ્ચર્યસંભૂતં નાનારત્નસમન્વિતમ્

વિમાનમારુહ્ય તદા મહાયશાસ્સ શાંકરિસ્સર્વગુણૈરુપેતઃ ॥
શ્રિયા સમેતઃ પરયા બભૌ મહાન્ સંવીજ્યમાનશ્ચમરૈર્મહાગ્રભૈઃ

પ્રાચેતસં છત્રમતીવસુપ્રભં રત્નૈરુપેતં વિવિધૈર્વિરાજિતમ્॥
ધૃતં તદા તચ્ચ કુમારમૂર્ધ્નિ વૈ હ્યનન્તચાન્દ્રૈઃ કિરણૈર્મહાપ્રભૈઃ

મિલિતાસ્તે તદા સર્વે દેવાશ્શક્રપુરોગમા ॥
સ્વૈઃસ્વૈર્બલૈઃ પરિવૃતા યુદ્ધકામા મહાબલાઃ

એવં દેવાશ્ચ દૈત્યાશ્ચ યોદ્ધુકામાઃ સ્થિતા ભુવિ ॥
સૈન્યેન મહતા તેન વ્યૂહં કૃત્વા પૃથક્ પૃથક્

તે સેને સુરદૈત્યાનાં શુશુભાતે પરસ્પરમ્ ॥
હંતુકામે તદાન્યોન્યં સ્તૂયમાને ચ બન્દિભિઃ

ઉભે સેનં તદા તેષામગર્જેતાં વનોપમે ॥
ભયંકરેઽત્યવીરાણામિતરેષાં સુખાવહે

એતસ્મિન્નન્તરે તત્ર બલોન્મત્તાઃ પરસ્પરમ્॥
દૈત્યા દેવા મહાવીરા યુયુધુઃ ક્રોધવિહ્વલાઃ

આસીત્સુતુમુલં યુદ્ધં દેવદૈત્યસમાકુલમ્ ॥
રુણ્ડમુંડાંકિતં સર્વં ક્ષણેન સમપદ્યત

ભૂમૌ નિપતિતાસ્તત્ર શતશોઽથ સહસ્રશઃ ॥
નિકૃત્તાંગા મહાશસ્ત્રૈર્નિહતા વીરસંમતાઃ

કેષાંચિદ્બાહવશ્છિન્ના ખડ્પાતૈસ્સુદારુણૈઃ ॥
કેષાંચિદૂરવશ્છિન્ના વીરાણાં માનિનાં મૃધે

કેચિન્મથિતસર્વાંગા ગદાભિર્મુદ્ગરૈસ્તથા ॥
કેચિન્નિર્ભિન્નહૃદયાઃ પાશૈર્ભલ્લૈશ્ચ પાતિતાઃ

કેચિદ્વિદારિતાઃ પૃષ્ઠે કુંતૈરૃષ્ટિભિરંકુશૈઃ ॥
છિન્નાન્યપિ શિરાંસ્યેવ પતિતાનિ ચ ભૂતલે

બહૂનિ ચ કબંધાનિ નૃત્યમાનાનિ તત્ર વૈ ॥
વલ્ગમાનાનિ શતશો ઉદ્યતાસ્ત્રકરાણિ ચ

નદ્યઃ પ્રવર્તિતાસ્તત્ર શતશોઽસૃઙ્વહાસ્તદા ॥
ભૂતપ્રેતાદયસ્તત્ર શતશશ્ચ સમાગતાઃ

ગોમાયવશ્શિવા તત્ર ભક્ષયન્તઃ પલં બહુ ॥
તથા ગૃધ્રવટાશ્યેના વાયસા માંસભક્ષકાઃ ॥
બુભુજુઃ પતિતાનાં ચ પલાનિ સુબહૂનિ વૈ

એતસ્મિન્નન્તરે તત્ર તારકાખ્યો મહાબલઃ ॥
સૈન્યેન મહતા સદ્યો યયૌ યોદ્ધું સુરાન્ પ્રતિ

દેવા દૃષ્ટ્વા સમાયાન્તં તારકં યુદ્ધદુર્મદમ્ ॥
યોદ્ધુકામં તદા સદ્યો યયુશ્શક્રાદયસ્તદા ॥
બભૂવાથ મહોન્નાદસ્સેનયોરુભયોરપિ

અથાભૂદ્દ્વંદ્વયુદ્ધં હિ સુરાસુરવિમર્દનમ્॥
યં દૃષ્ટ્વા હર્ષિતા વીરાઃ ક્લીબાશ્ચ ભયમાગતા

તારકો યુયુધે યુદ્ધે શક્રેણ દિતિજો બલી॥
અગ્નિના સહ સંહ્રાદો જંભેનૈવ યમઃ સ્વયમ્

મહાપ્રભુર્નૈરૃતેન પાશી સહ બલેન ચ ॥
સુવીરો વાયુના સાર્ધં પવમાનેન ગુહ્યરાટ્

ઈશાનેન સમં શંભુર્યુયુધે રણવિત્તમઃ ॥
શુંભશ્શેષેણ યુયુધે કુંભશ્ચન્દ્રેણ દાનવઃ

કુંબરો મિહિરેણાજૌ મહાબલ પરાક્રમઃ ॥
યુયુધે પરમાસ્ત્રૈશ્ચ નાનાયુદ્ધવિશારદઃ

એવં દ્વન્દ્વેન યુદ્ધેન મહતા ચ સુરાસુરાઃ ॥
સંગરે યુયુધુસ્સર્વે બલેન કૃતનિશ્ચ યાઃ ॥૩૮
અન્યોન્યં સ્પર્દ્ધમાનાસ્તેઽમરા દૈત્યા મહાબલાઃ ॥
તસ્મિન્દેવાસુરે યુદ્ધે દુર્જયા અભવન્મુને

તદા ચ તેષાં સુરદાનવાનાં બભૂવ યુદ્ધં તુમુલં જયૈષિણામ્ ॥
સુખાવહં વીરમનસ્વિનાં વૈ ભયાવહં ચૈવ તથેતરેષામ્

મહી મહારૌદ્રતરા વિનષ્ટકૈસ્સુરાસુરૈર્વૈ પતિતૈરનેકશઃ ॥
તસ્મિન્નગમ્યાતિભયાનકા તદા જાતા મહાસૌખ્યવહા મનસ્વિનામ્

ઇતિ શ્રીશિવમહાપુરાણે દ્વિતીયાયાં રુદ્રસંહિતાયાં ચતુર્થે કુમારખણ્ડે યુદ્ધપ્રારંભવર્ણનં નામ સપ્તમોઽધ્યાયઃ