Shiva Purana · Chapter 2.4.5

brahmovāca //
etasminnaṃtare tatra dadarśa rathamuttamam //
adbhutaṃ śobhitaṃ śaśvadviśvakarmavinirmitam

śatacakraṃ suvistīrṇaṃ manoyāyi manoharam //
prasthāpitaṃ ca pārvatyā veṣṭitaṃ pārṣadairvaraiḥ

samārohattato'naṃto hṛdayena vidūyatā //
kārttikaḥ parama jñānī parameśānavīryajaḥ

tadaiva kṛttikāḥ prāpya muktakeśyaśśucā''turāḥ //
unmattā iva tatraiva vaktumārebhire vacaḥ

kṛttikā ūcuḥ //
vihāyā'smān kṛpāsindho gacchasi tvaṃ hi nirdayaḥ //
nāyaṃ dharmo mātṛvargān pālito yat sutastyajet

snehena varddhito'smābhiḥ putro'smākaṃ ca dharmataḥ //
kiṃ kurmaḥ kva ca yāsyāmo vayaṃ kiṃ karavāma ha

ityuktvā kṛttikāssarvāḥ kṛtvā vakṣasi kārttikam//
drutaṃ mūrcchāmavāpustāssutavicchedakāraṇāt

tāḥ kumāro bodhayitvā adhyātmavacanena vai //
tābhiśca pārṣadaissārddhamāruroha rathaṃ mune

dṛṣṭvā śrutvā maṃgalāni bahūni sukhadāni vai //
kumāraḥ pārṣadaissārddhaṃ jagāma pitṛmandiram

dakṣeṇa naṃdiyuktaśca manoyāyirathena ca //
kumāraḥ prāpa kailāsaṃ nyagrodhā'kṣayamūlake

tatra tasthau kṛttikābhiḥ pārṣadapravaraiḥ saha//
kumāraśśāṃkariḥ prīto nānālīlāviśāradaḥ

tadā sarve suragaṇā ṛṣayaḥ siddhacāraṇāḥ //
viṣṇunā brahmaṇā sārddhaṃ samācakhyustadāgamam

tadā dṛṣṭvā ca gāṃgeyaṃ yayau pramuditaśśivaḥ /
anyaissameto hariṇā brahmaṇā ca surarṣibhiḥ

śaṃkhāśca bahavo nedurbherī tūryāṇyanekaśaḥ //
utsavastu mahānāsīddevānāṃ tuṣṭacetasām

tadānīmeva taṃ sarve vīrabhadrādayo gaṇāḥ //
kurvantaḥ svanvayuḥ keliṃ nānātāladharasvarāḥ

stāvakāḥ stūyamānāśca cakruste guṇakīrttanam //
jayaśabdaṃ namaśśabdaṃ kurvāṇāḥ prītamānasāḥ

draṣṭuṃ yayustaṃ śarajaṃ śivātmajamanuttamam

pārvatī maṃgalaṃ cakre rājamārgaṃ manoharam //
padmarāgādimaṇibhissaṃskṛtaṃ paritaḥ puram

patiputravatībhiśca sādhvībhiḥ strībhiranvitā //
lakṣmyāditriṃśaddevīśca puraḥ kṛtvā samāyayau

rambhādyapsaraso divyāssa smitā veṣasaṃyutāḥ //
saṃgītanartanaparā babhūvuśca śivājñayā

ye taṃ samīkṣayāmāsurgāgeyaṃ śaṃkaropamam //
dadṛśuste mahattejo vyāptamāsījjagattraye

tattejasā vṛtaṃ bālaṃ taptacāmīkaraprabham //
vavaṃdire drutaṃ sarve kumāraṃ sūryavarcasam

jahurṣurvinataskaṃdhā namaśśabdaratāstadā //
parivāryopatasthuste vāmadakṣiṇamāgatāḥ

ahaṃ viṣṇuśca śakraśca tathā devādayo'khilāḥ //
daṇḍavatpatitā bhūmau parivāryya kumārakam

etasminnantare śaṃbhurgirijā ca mudānvitā //
mahotsavaṃ samāgamya dadarśa tanayaṃ mudā

putraṃ nirīkṣya ca tadā jagadekabaṃdhuḥ prītyānvitaḥ paramayā parayā bhavānyā //
snehānvito bhujagabhogayuto hi sākṣātsarveśvaraḥ parivṛtaḥ pramathaiḥ pareśaḥ २६//
atha śaktidharaḥ skandau dṛṣṭvā tau pārvatīśivau //
avaruhya rathāttūrṇaṃ śirasā praṇanāma ha

upaguhya śivaḥ prītyā kumāraṃ mūrdhni śaṃkaraḥ //
jaghrau premṇā parameśānaḥ prasannaḥ snehakartṛkaḥ

upaguhya guhaṃ tatra pārvatī jātasaṃbhramā //
prasnutaṃ pāyayāmāsa stanaṃ snehapariplutā

tadā nīrājito devaissakalatrairmudānvitaiḥ //
jayaśabdena mahatā vyāptamāsīnnabhastalam

ṛṣayo brahmaghoṣeṇa gītenaiva ca gāyakāḥ //
vādyaiśca bahavastatropatasthuśca kumārakam

svamaṃkamāropya tadā maheśaḥ kumārakaṃ taṃ prabhayā samujjvalam //
babhau bhavānīpatireva sākṣācchriyā'nvitaḥ putravatāṃ variṣṭhaḥ

kumāraḥ svagaṇaiḥ sārddhamājagāma śivālayam //
śivājñayā mahotsāhaissaha devairmahāsukhī

daṃpatī tau tadā tatraikapadyena virejatuḥ //
vivaṃdyamānāvṛṣibhirāvṛtau surasattamaiḥ

kumāraḥ krīḍayāmāsa śivotsaṃge mudānvitaḥ //
vāsukiṃ śivakaṃṭhasthaṃ pāṇibhyāṃ samapīḍayat

prahasya bhagavāñ śaṃbhuśśaśaṃsa girijāṃ tadā //
nirīkṣya kṛpayā dṛṣṭyā kṛpālurlīlayākṛtim

madasmitena ca tadā bhagavānmaheśaḥ prāpto mudaṃ ca paramāṃ girijāsametaḥ //
premṇā sa gadgadagiro jagadekabaṃdhurnovāca kiṃcana vibhurbhuvanaikabharttā

atha śaṃbhurjagannātho hṛṣṭo laukikavṛttavān //
ratnasiṃhāsane ramye vāsayāmāsa kārttikam

vedamaṃtrābhipūtaiśca sarvatīrthodapūrṇakaiḥ //
sadratnakuṃbhaśatakaiḥ snāpayā māsa taṃ mudā

sadratnasāraracitakirīṭamukuṭāṃgadam//
vaijayantī svamālāṃ ca tasmai cakraṃ dadau hariḥ

śūlaṃ pinākaṃ paraśuṃ śakti pāśupataṃ śaram //
saṃhārāstraṃ ca paramāṃ vidyāṃ tasmai dadau śivaḥ

adāmahaṃ yajñasūtraṃ vedāṃśca vedamātaram //
kamaṇḍaluṃ ca brahmāstraṃ vidyāṃ caivā'rimardinīm

gajendraṃ caiva vajraṃ ca dadau tasmai sureśvaraḥ //
śvetacchatraṃ ratnamālāṃ dadau vastuṃ jaleśvaraḥ

manoyāyirathaṃ sūryassannāhaṃ ca mahācayam //
yamadaṃḍaṃ yamaścaiva sudhākuṃbhaṃ sudhānidhiḥ

hutāśano dadau prītyā mahāśaktiṃ svasūnave //
dadau svaśastraṃ nirṛtirvāyavyāstraṃ samīraṇaḥ

gadāṃ dadau kuberaśca śūlamīśo dadau mudā //
nānāśastrāṇyupāyāṃśca sarve devā dadurmudā

kāmāstraṃ kāmadevo'tha dadau tasmai mudānvitaḥ //
gadāṃ dadau svavidyāśca tasmai ca parayā mudā

kṣīrodo'mūlyaratnāni viśiṣṭaṃ ratnanūpuram//
himālayo hi divyāni bhūṣaṇānyaṃśukāni ca

citrabarhaṇanāmānaṃ svaputraṃ garuḍo dadau //
aruṇastāmracūḍākhyaṃ balinaṃ caraṇāyudham

pārvatī sasmitā hṛṣṭā paramaiśvaryamuttamam //
dadau tasmai mahāprītyā ciraṃjīvitvameva ca

lakṣmīśca saṃpadaṃ divyāṃ mahāhāraṃ manoharam //
sāvitrī siddhavidyāṃ ca samastāṃ pradadau mudā

anyāścāpi mune devyo yāyāstatra samāgatāḥ //
svātmavatsu dadustasmai tathaiva śiśupālikāḥ

mahāmahotsavastatra babhūva munisattama //
sarve prasannatāṃ yātā viśeṣācca śivāśivau

etasminnaṃtare kāle provāca prahasan mudā//
mune brahmādikān devān rudro bhargaḥ pratāpavān

śiva uvāca //
he hare he vidhe devāssarve śṛṇuta madvacaḥ // //
sarvathāhaṃ prasannosmi varānvṛṇuta aicchikān

// brahmovāca //
tacchrutvā vacanaṃ śaṃbhormuneviṣṇvādayassurāḥ //
sarve procuḥ prasannāsyā devaṃ paśupatiṃ prabhum

kumāreṇa hato hyeṣa tārako bhavitā prabho //
tadarthameva saṃjātamidaṃ caritamuttamam

tasmādadyaiva yāsyāmastārakaṃ hantumudyatā //
ājñāṃ dehi kumārāya sa taṃ haṃtuṃ sukhāya naḥ

// brahmovāca //
tatheti matvā sa vibhurdattavāṃstanayaṃ tadā //
devebhyastārakaṃ haṃtuṃ kṛpayā paribhāvitaḥ

śivājñayā surāssarve brahmaviṣṇumukhāstadā //
puraskṛtya guhaṃ sadyo nirjagmurmilitā gireḥ

bahirnissṛtya kailāsāttvaṣṭā śāsanato hareḥ //
virece nagaraṃ ramyamadbhutaṃ nikaṭe gireḥ

tatra ramyaṃ gṛhaṃ divyamadbhutaṃ paramo jjvalam //
guhārthaṃ nirmame tvaṣṭā tatra siṃhāsanaṃ varam

tadā harissudhīrbhaktyā kārayāmāsa maṃgalam //
kārttikasyābhiṣekaṃ hi sarvatīrthajalaissuraiḥ

sarvathā samalaṃkṛtya vāsayāmāsa saṃgraham //
kārttikasya vidhiṃ prītyā kārayāmāsa cotsavam

//
brāhmāṃḍādhipatitvaṃ hi dadau tasmai mudā hariḥ //
cakāra tilakaṃ tasya samānarca suraissaha

praṇamya kārttikaṃ prītyā sarvadevarṣibhissaha //
tuṣṭāva vividhasstotraiḥ śivarūpaṃ sanātanam

varasiṃhāsanastho hi śuśubhe'tīva kārtikaḥ //
svāmibhāvaṃ samāpanno brahmāṃḍasyāsi pālakaḥ

iti śrīśivamahāpurāṇe dvitīyāyāṃ rudrasaṃhitāyāṃ caturthe kumārakhaṇḍe kumārābhiṣekavarṇanaṃ nāma paṃcamo'dhyāyaḥ