Shiva Purana · Chapter 2.4.4

nārada uvāca //
devadeva prajānātha tataḥ kimabhavadvidhe //
vadedānīṃ kṛpātastu śivalīlāsamanvitam

// brahmovāca //
kṛttikābhirgṛhīte vai tasmiñśaṃbhusute mune //
kaścitkālo vyatīyāya bubudhe na himādrijā

tasminnavasare durgā smerānanasaroruhā//
uvāca svāminaṃ śaṃbhuṃ devadeveśvaraṃ prabhum

//
pārvatyuvāca //
devadeva mahādeva śṛṇu me vacanaṃ śubham //
pūrvapuṇyātibhāreṇa tvaṃ mayā prāpta īśvara

kṛpayā yogiṣu śreṣṭho vihāraistatparo'bhavaḥ //
ratibhaṃgaḥ kṛto devaistatra me bhavatā bhava

bhūmau nipatitaṃ vīryaṃ nodare mama te vibho //
kutra yātaṃ ca taddeva kena daivena nihṇutam

kathaṃ matsvāmino vīryamamoghaṃ te maheśvara //
moghaṃ yātaṃ ca kiṃ kiṃvā śiśurjātaśca kutracit

brahmovāca //
pārvatīvacanaṃ śrutvā prahasya jagadīśvaraḥ //
uvāca devānāhūya munīṃścāpi munīśvara

// maheśvara uvāca //
devāḥ śṛṇuta madvākyaṃ pārvatīvacanaṃ śrutam //
amoghaṃ kutra me vīryaṃ yātaṃ kena ca nihnutam

//
sabhayaṃ nāpatatkṣipraṃ sa ceddaṃḍaṃ na cārhati //
śaktau rājā na śāstā yaḥ prajābādhyaśca bhakṣakaḥ

śaṃbhostadvacanaṃ śrutvā samālocya parasparam //
ūcussarve krameṇaiva trastāstu purataḥ prabhoḥ

viṣṇuruvāca //
te mithyāvādinassaṃtu bhārate gurudārikāḥ //
gurunindāratāśśaśvattvadvīryaṃ yaiśca nihnutam

brahmovāca //
tvadvīryaṃ nihnutaṃ yena puṇyakṣetre ca bhārate //
sa nā'nvito bhavettatra sevane pūjane tava

lokapālā ūcuḥ //
tvadavīryaṃ nihnutaṃ yena pāpinā patitabhramāt //
bhājanaṃ tasya sotyantaṃ tattapaṃ karma saṃtatim

devā ūcuḥ //
kṛtvā pratijñāṃ yo mūḍho nā''pādayati pūrṇatām //
bhājanaṃ tasya pāpasya tvadvīryaṃ yena nihnutam

devapatnya ūcuḥ //
yā nidati svabhartāraṃ paraṃ gacchati pūruṣam //
mātṛbandhuvihīnā ca tvadvīryaṃ nihnutaṃ yayā

// brahmovāca //
devānāṃ vacanaṃ śrutvā devadeveśvaro haraḥ //
karmmaṇāṃ sākṣiṇaścāha dharmādīnsabhayaṃ vacaḥ

śrīśiva uvāca //
devairna nihnutaṃ kena tadvīryaṃ nihnutaṃ dhruvam //
tadamoghaṃ bhagavato maheśasya mama prabhoḥ

yūyaṃ ca sākṣiṇo viśve satataṃ sarvakarmaṇām //
yuṣmākaṃ nihnutaṃ kimvā kiṃ jñātuṃ vaktumarhatha

// brahmovāca //
īśvarasya vacaḥ śrutvā sabhāyāṃ kaṃpitāśca te //
parasparaṃ samālokya krameṇocuḥ purāḥ prabhoḥ

brahmovāca //
rate tu tiṣṭhato vīryaṃ papāta vasudhātale //
mayā jñātamamoghaṃ tacchaṃkarasya prakopataḥ

// kṣitiruvāca //
vīryaṃ soḍhumaśaktāhaṃ tadvahno nyakṣipaṃ purā //
ato'tra durvahaṃ brahmannabalāṃ kṣaṃtumarhasi

vahniruvāca //
vīryaṃ soḍhumaśaktohaṃ tava śaṃkara parvate //
kailāse nyakṣipaṃ sadyaḥ kapotātmā sudussaham

// giriruvāca //
vīryaṃ soḍhumaśakto'haṃ tava śaṃkara lokapa //
gaṃgāyāṃ prākṣipaṃ sadyo dussahaṃ parameśvara

// gaṃgovāca //
vīryaṃ soḍhumaśaktāhaṃ tava śaṃkara lokapa //
vyākulā'ti prabho nātha nyakṣipaṃ śarakānane

// vāyuruvāca //
śareṣu patitaṃ vīryaṃ sadyo bālo babhūva ha //
atīva sundaraśśambho svarnadyāḥ pāvane taṭe

sūrya uvāca //
rudaṃtaṃ bālakaṃ dṛṣṭvā gamamastācalaṃ prabho //
preritaḥ kālacakreṇa niśāyāṃ sthātumakṣamaḥ

candra uvāca // rudaṃtaṃ bālakaṃ prāpya gṛhītvā kṛttikāgaṇaḥ //
jagāma svālayaṃ śaṃbho gacchanbadarikāśramam

jalamuvāca //
amuṃ rudaṃtamānīya stanyapānena tāḥ prabho //
varddhayāmāsurīśasya sutaṃ tava raviprabham

// saṃdhyovāca //
adhunā kṛttikānāṃ ca vanaṃ tampoṣya putrakam //
tannāma cakrustāḥ premṇā kārttikaśceti kautukāt

rātriruvāca //
na cakrurbālakaṃ tāśca locanānāmagocaram //
prāṇebhyopi prītipātraṃ yaḥ poṣṭā tasya putrakaḥ

dinamuvāca //
yāni yāni ca vastrāṇi bhūṣaṇāni varāṇi ca //
praśaṃsitāni svādūni bhojayāmāsureva tam

brahmovāca //
teṣāṃ tadvacanaṃ śrutvā saṃtuṣṭaḥ purasūdanaḥ //
mudaṃ prāpya dadau prītyā viprebhyo bahudakṣiṇām

putrasya vārttāṃ saṃprāpya pārvatī hṛṣṭamānasā //
koṭiratnāni viprebhyo dadau bahudhanāni ca

lakṣmī sarasvatī menā sāvitrī sarvayoṣitaḥ //
viṣṇussarve ca devāśca brāhmaṇebhyo dadurdhanam

preritassa prabhurdevairmunibhiḥ parvatairatha //
dūtān prasthāpayāmāsa svaputro yatra tān gaṇān

vīrabhadraṃ viśālākṣaṃ śaṃkukarṇaṃ karākramam //
nandīśvaraṃ mahākālaṃ vajradaṃṣṭraṃ mahonmadam

gokarṇāsyaṃ dadhimukhaṃ jvaladagniśikhopamam //
lakṣaṃ ca kṣetrapālānāṃ bhūtānāṃ ca trilakṣakam

rudrāṃśca bhairavāṃścaiva śivatulyaparākramān //
anyāṃśca vikṛtākārānasaṃkhyānapi nārada

te sarve śivadūtāśca nānāśastrāstrapāṇayaḥ //
kṛttikānāṃ ca bhavanaṃ veṣṭayāmāsuruddhatāḥ

dṛṣṭvā tān kṛttikāssarvā bhayavihnalamānasāḥ //
kārttikaṃ kathayāmāsurjvalaṃtaṃ brahmatejasā

// kṛttikā ūcuḥ //
vatsa sainyānyasaṃkhyāni veṣṭayāmāsurālayam //
kiṃ kartavyaṃ kva gaṃtavyaṃ mahābhayamupasthitam

kārtikeya uvāca //
bhayaṃ tyajata kalyāṇyo bhayaṃ kiṃ vā mayi sthite //
durnivāryo'smi bālaśca mātaraḥ kena vāryate

// brahmovāca //
etasminnaṃtare tatra sainyendro nandikeśvaraḥ //
purataḥ kārtikeyasyopaviṣṭassamuvāca ha

nandīśvara uvāca //
bhrātaḥ pravṛttiṃ śṛṇu me mātaraśca śubhāvahām //
prerito'haṃ maheśena saṃhartrā śaṃkareṇa ca

kailāse sarvadevāśca brahmaviṣṇuśivādayaḥ //
sabhāyāṃ saṃsthitāstāta mahatyutsavamaṃgale

tadā śivā sabhāyāṃ vai śaṃkaraṃ sarva śaṃkaram //
sambodhya kathayāmāsa tavānveṣaṇahetukam

papraccha tāñśivo devān kramāttvatprāptihetave //
pratyuttaraṃ daduste tu pratyekaṃ ca yathocitam

tvāmatra kṛttikāsthāne kathayāmāsurīśvaram //
sarve dharmādayo dharmādharmasya karmasākṣiṇaḥ

prababhūva rahaḥ krīḍā pārvatīśivayoḥ purā //
dṛṣṭasya ca suraiśśaṃbhorvīryaṃ bhūmau papāta ha

bhūmistadakṣipadvahnau vahniścādrau sa bhūdharaḥ //
gaṃgāyāṃ so'kṣipadvegāt taraṃgaiśśarakānane

tatra bālo'bhavastvaṃ hi devakāryakṛti prabhuḥ //
tatra labdhaḥ kṛttikābhistvaṃ bhūmiṃ gaccha sāṃpratam

tavābhiṣekaṃ śaṃbhustu kariṣyati suraissaha //
lapsyase sarvaśastrāṇi tārakākhyaṃ haniṣyasi

putrastvaṃ viśvasaṃharttustvāṃ prāptuñcā'kṣamā imāḥ //
nāgniṃ goptuṃ yathā śaktaśśuṣkavṛkṣassva koṭare

dīptavāṃstvaṃ ca viśveṣu nāsāṃ geheṣu śobhase //
yathā patanmahākūpe dvijarājo na rājata

karoṣi ca yathā'lokaṃ nā''cchanno'smāsu tejasā //
yathā sūryaḥ kalāchanno na bhavenmānavasya ca

viṣṇustvaṃ jagatāṃ vyāpī nānyo jātosi śāṃbhava //
yathā na keṣāṃ vyāpyaṃ ca tatsarvaṃ vyāpakaṃ nabhaḥ

yogīndro nā'nuliptaśca bhāgī cetparipoṣaṇe //
naiva lipto yathātmā ca karmayogeṣu jīvinām

viśvāraṃbhastvamīśaśca nāsu te saṃbhavet sthitiḥ //
guṇānāṃ tejasāṃ rāśiryathātmānaṃ ca yoginaḥ

bhrātarye tvāṃ na jānaṃti te narā hatabuddhayaḥ //
nādriyante yathā bhekāstvekavāsāśca paṃkajān

kārttikeya uvāca // //
bhrātassarvaṃ vijānāsi jñānaṃ traikālikaṃ ca yat //
jñānī tvaṃ kā praśaṃsā te yato mṛtyuñjayāśritaḥ

karmaṇāṃ janma yeṣāṃ vā yāsu yāsu yoniṣu //
tāsu te nirvṛtiṃ bhrātaḥ prāpnuvaṃtīha sāṃpratam

kṛttikā jñānavatyaśca yoginyaḥ prakṛteḥ kalāḥ //
stanyenāsāṃ varddhito'hamupakāreṇa saṃtatam

āsāmahaṃ poṣyaputro madaṃśā yoṣitastvimāḥ //
tasyāśca prakṛteraṃśāstatastatsvāmivīryajaḥ

na madbhaṃgo he śailendrakanyayā nandikeśvara //
sā ca me dharmato mātā yathemāssarvasaṃmatāḥ

śambhunā preṣitastvaṃ ca śaṃbhoḥ putrasamo mahān //
āgacchāmi tvayā sārddhaṃ drakṣyāmi devatākulam

ityevamuktvā taṃ śīghraṃ saṃbodhya kṛttikāgaṇam //
kārttikeyaḥ pratasthe hi sārddhaṃ śaṃkarapārṣadaiḥ

iti śrīśivamahāpurāṇe dvitīyāyāṃ rudrasaṃhitāyāṃ caturthe kumārakhaṇḍe kārttikeyānveṣaṇanandisaṃvādavarṇanaṃ nāma caturtho'dhyāyaḥ