Shiva Purana · Chapter 2.4.3

nārada uvāca //
devadeva prajānātha brahman sṛṣṭikara prabho //
tataḥ kimabhavattatra tadvadā'dya kṛpāṃ kuru

brahmovāca //
tasminnavasare tāta viśvāmitraḥ pratāpavān //
prerito vidhinā tatrāgacchatprīto yadṛcchayā

sa dṛṣṭvā'laukikaṃ dhāma tatsutasya sutejasaḥ //
abhavatpūrṇakāmastu suprasanno nanāma ca

akarotsunutiṃ tasya suprasannena cetasā //
vidhipreritavāgbhiśca viśvāmitraḥ prabhāvavit

tatasso'bhūtsutastatra suprasanno mahoti kṛt //
suprahasyādbhutamaho viśvāmitramuvāca ca

śivasuta uvāca //
śivecchayā mahājñāninnakasmāttvamihāgataḥ //
saṃskāraṃ kuru me tāta yathāvadvedasaṃmitam

adyārabhya purodhāstvaṃ bhava me prītimāvahan //
bhaviṣyasi sadā pūjyassarveṣāṃ nātra saṃśayaḥ

// brahmovāca // //
ityākarṇya vacastasya suprasanno hi gādhijaḥ //
tamuvācānudāttena svareṇa ca suvismitaḥ

viśvāmitra uvāca //
śṛṇu tāta na vipro'haṃ gādhikṣatriyabālakaḥ //
viśvāmitreti vikhyātaḥ kṣatriyo viprasevakaḥ

iti svacaritaṃ khyātaṃ mayā te varabālaka //
kastvaṃ svacaritaṃ brūhi vismitāyākhilaṃ hi me

brahmovāca //
ityākarṇya vaca stasya tatsvavṛttaṃ jagāda ha //
tataścovāca suprītyā gādhijaṃ taṃ mahotikṛt

// śivasuta uvāca //
viśvāmitra varānme tvaṃ brahmarṣirnā'tra saṃśayaḥ //
vaśiṣṭhādyāśca nityaṃ tvāṃ praśaṃsiṣyaṃti cādarāt

atastvamājñayā me hi saṃskāraṃ kartumarhasi //
idaṃ sarvaṃ sugopyaṃ te kathanīyaṃ na kutracit

brahmovāca //
tatokārṣītsa saṃskāraṃ tasya prītyā'khilaṃ yathā //
śivabālasya devarṣe vedoktavidhinā param

śivabālopi suprīto divyajñānamadātparam //
viśvāmitrāya munaye mahotikārakaḥ prabhuḥ

purohitaṃ cakārāsau viśvāmitraṃ śucessuta //
tadārabhya dvijavaro nānālīlāviśāradaḥ

itthaṃ līlā kṛtā tena kathitā sā mayā mune //
tallīlāmaparāṃ tāta śṛṇu prītyā vadāmyaham

tasminnavasare tāta śvetanāmā ca saṃprati //
tatrā'paśyatsutaṃ divyaṃ nijaṃ parama pāvanam

tatastaṃ pāvako gatvā dṛṣṭvāliṃgya cucumba ca //
putreti coktvā tasmai sa śastraṃ śaktindadau ca saḥ

guhastāṃ śaktimādāya tacchṛṃgaṃ cāruroha ha //
taṃ jaghāna tayā śaktyā śṛṃgo bhuvi papāta saḥ

daśapadmamitā vīrā rākṣasāḥ pūrvamāgatāḥ//
tadvadhārthaṃ drutaṃ naṣṭā babhūvustatprahārataḥ

hāhākāro mahānāsīccakaṃpe sācalā mahī//
trailokyaṃ ca sureśānassadevastatra cāgamat

dakṣiṇe tasya pārśve ca vajreṇa sa jaghāna ca //
śākhanāmā tato jātaḥ pumāṃścaiko mahābalaḥ

punaśśakro jaghānā''śu vāmapārśve hi taṃ tadā //
vajreṇā'nyaḥ pumāñjāto viśākhākhyo'paro balī

tatastaddhṛdayaṃ śakro jaghāna pavinā tadā //
paro'bhūnnaigamopākhyaḥ pumāṃstadvanmahābalaḥ

tadā skaṃdādicatvāro mahāvīrā mahābalāḥ //
indraṃ haṃtuṃ drutaṃ jagmussoyaṃ taccharaṇaṃ yayau

śakrassa sāmaragaṇo bhayaṃ prāpya guhāttataḥ //
yayau svalokaṃ cakito na bhedaṃ jñātavānmune

sa bālakastu tatraiva tasthā''vānaṃdasaṃyutaḥ //
pūrvavannirbhayastāta nānālīlākaraḥ prabhuḥ

tasminnavasare tatra kṛttikākhyāśca ṣaṭ striyaḥ //
snātuṃ samāgatā bālaṃ dadṛśustaṃ mahāprabhum

grahītuṃ taṃ manaścakrussarvāstā kṛttikāḥ striyaḥ //
vādo babhūva tāsāṃ tadgrahaṇecchāparo mune

tadvādaśamanārthaṃ sa ṣaṇmukhāni cakāra ha //
papau dugdhaṃ ca sarvāsāṃ tuṣṭāstā abhavanmune // ३१ /
tanmanogatimājñāya sarvāstāḥ kṛttikāstadā //
tamādāya yayurlokaṃ svakīyaṃ muditā mune

taṃ bālakaṃ kumārākhyaṃ stanaṃ dattvā stanārthine //
varddhayāmāsurīśasya sutaṃ sūryādhikaprabham

na cakrurbālakaṃ yāśca locanānāmagocaram //
prāṇebhyopi premapātraṃ yaḥ poṣṭā tasya putraka

yāni yāni ca vastrāṇi trailokye durlabhāni ca //
dadustasmai ca tāḥ premṇā bhūṣaṇāni varāṇi vai

dinedine tāḥ pupuṣurbālakaṃ taṃ mahāprabhum //
prasaṃsitāni svādūni bhojayitvā viśeṣataḥ

athaikasmin dine tāta sa bālaḥ kṛttikātmajaḥ //
gatvā devasabhāṃ divyāṃ sucaritraṃ cakāra ha

svamaho darśayāmāsa devebhyo hi mahādbhutam //
saviṣṇubhyo'khilebhyaśca mahotikarabālakaḥ

taṃ dṛṣṭvā sakalāste vai sācyutāssarṣayassurāḥ //
vismayaṃ prāpuratyantaṃ papracchustaṃ ca bālakam

ko bhavāniti tacchrutvā na kiṃcitsa jagāda ha //
svālayaṃ sa jagāmā'śu guptastasthau hi pūrvavat

iti śrīśivamahāpurāṇe dvitīyāyāṃ rudrasaṃhitāyāṃ caturthe kumārakhaṇḍe kārtikeyalīlāvarṇanaṃ nāma tṛtīyo'dhyāyaḥ