Shiva Purana · Chapter 2.4.17

nārada uvāca //
brahman vada mahāprājña tadvṛttāntekhile śrute //
kimakārṣīnmahādevī śrotumicchāmi tattvataḥ

brahmovāca //
śrūyatāṃ muniśārdūla kathayāmyadya taddhruvam //
caritaṃ jagadaṃbāyā yajjātaṃ tadanaṃtaram

mṛdaṃgānpaṭahāṃścaiva gaṇāścāvādayaṃstathā //
mahotsavaṃ tadā cakrurhate tasmingaṇādhipe

śivopi tacchiraśchitvā yāvadduḥkhamupādade //
tāvacca girijā devī cukrodhāti munīśvara

kiṃ karomi kva gacchāmi hāhāduḥkhamupāgatam //
kathaṃ duḥkhaṃ vinaśyetāsyā'tidukhaṃ mamādhunā

matsuto nāśitaścādya devessarvairgaṇaistathā //
sarvāṃstānnāśayiṣyāmi pralayaṃ vā karomyaham

ityevaṃ duḥkhitā sā ca śaktīśśatasahasraśaḥ //
nirmame tatkṣaṇaṃ kruddhā sarvalokamaheśvarī

nirmitāstā namaskṛtya jagadaṃbāṃ śivāṃ tadā //
jājvalyamānā hyavadanmātarādiśyatāmiti

tacchutvā śaṃbhuśaktissā prakṛtiḥ krodhatatparā //
pratyuvāca tu tāssarvā mahāmāyā munīśvara

devyuvāca //
he śaktayo'dhunā devyo yuṣmābhirmannideśataḥ //
pralayaścātra karttavyo nātra kāryā vicāraṇā

devāṃścaiva ṛṣīṃścaiva yakṣarākṣasakāṃstathā //
asmadīyānparāṃścaiva sakhyo bhakṣata vai haṭhāt

brahmovāca //
tadājñaptāśca tāssarvāśśaktayaḥ krodhatatparāḥ //
devādīnāṃ ca sarveṣāṃ saṃhāraṃ kartumudyatāḥ

yathā ca tṛṇasaṃhāramanalaḥ kurute tathā //
evaṃ tāśśaktayassarvāssaṃhāraṃ kartumudyatāḥ

gaṇapo vātha viṣṇurvā brahmā vā śaṃkarastathā //
indro vā yakṣarājo vā skaṃdo vā sūrya eva vā

sarveṣāṃ caiva saṃhāraṃ kurvaṃti sma niraṃtaram //
yatrayatra tu dṛśyeta tatratatrāpi śaktayaḥ

karālī kubjakā khaṃjā laṃbaśīrṣā hyanekaśaḥ //
haste dhṛtvā tu devāṃśca mukhe caivākṣipaṃstadā

taṃ saṃhāraṃ tadā dṛṣṭvā haro brahmā tathā hariḥ //
indrādayo'khilāḥ devā gaṇāśca ṛṣayastathā

kiṃ kariṣyati sā devī saṃhāraṃ vāpyakālataḥ //
iti saṃśayamāpannā jīvanāśā hatā'bhavat

sarve ca militāśceme ki karttavyaṃ viciṃtyatām //
evaṃ vicārayantaste tūrṇamūcuḥ parasparam

yadā ca girijā devī prasannā hi bhavediha //
tadā caiva bhavetsvāsthyaṃ nānyathā koṭiyatnataḥ

śivopi duḥkhamāpanno laukikīṃ gatimāśritaḥ //
mohayansakalāṃstatra nānālīlāviśāradaḥ

sarveṣāṃ caiva devānāṃ kaṭirbhagnā yadā tadā //
śivā krodhamayī sākṣādgaṃtuṃ na pura utsahet /

svīyo vā parakīyo vā devo vā dānavopi vā //
gaṇo vāpi ca dikpālo yakṣo vā kinnaro muniḥ

viṣṇurvāpi tathā brahmā śaṃkaraśca tathā prabhuḥ //
na kaścidgirijāgre ca sthātuṃ śakto'bhavanmune

jājvalyamānaṃ tattejassarvatodāhi te'khilāḥ //
dṛṣṭvā bhītatarā āsan sarve dūrataraṃ sthitāḥ

etasminsamaye tatra nārado divyadarśanaḥ //
āgatastvaṃ mune devagaṇānāṃ sukhahetave

brahmāṇaṃ māṃ bhavaṃ viṣṇuṃ śaṃkaraṃ ca praṇamya sāḥ //
samāgatya militvoce vicārya kāryameva vā

sarve saṃmaṃtrayāṃ cakrustvayā devā mahātmanā //
duḥkhaśāṃtiḥ kathaṃ syādvai samūcustata eva te

yāvacca girijā devī kṛpāṃ naiva kariṣyati//
tāvannaiva sukhaṃ syādvai nātra kāryā vicāraṇā

ṛṣayo hi tvadādyāśca gatāste vai śivāntikam//
sarve prasādayāmāsuḥ krodhaśāntyai tadā śivām

punaḥ punaḥ praṇemuśca stutvā stotrairanekaśaḥ //
sarve prasādayanprītyā procurdevagaṇājñayā

surarṣaya ūcuḥ //
jagadamba namastubhyaṃ śivāyai te namostu te //
caṃḍikāyai namastubhyaṃ kalyāṇyai te namostu te

ādiśaktistvamevāṃba sarvasṛṣṭikarī sadā//
tvameva pālinī śaktistvameva pralayaṃkarī

prasannā bhava deveśi śāṃtiṃ kuru namostu te//
sarvaṃ hi vikalaṃ devi trijagattava kopataḥ

brahmovāca //
evaṃ stutā parā devī ṛṣibhiśca tvadādibhiḥ //
kruddhadṛṣṭyā tadā tāśca kiṃcinnovāca sā śivā

tadā ca ṛṣayassarve natvā taccaraṇāṃbujam //
punarūcuśśivāṃ bhaktyā kṛtāṃjalipuṭāśśanaiḥ

ṛṣaya ūcuḥ // kṣamyatāṃ devi saṃhāro jāya te'dhunā //
tava svāmī sthitaścātra paśya paśya tamaṃbike

vayaṃ ke ca ime devā viṣṇubrahmādayastathā //
prajāśca bhavadīyāśca kṛtāṃjalipuṭāḥ sthitāḥ

kṣaṃtavyaścāparādho vai sarveṣāṃ parameśvari //
sarve hi vikalāścādya śāṃtiṃ teṣāṃ śive kuru

brahmovāca //
ityuktvā ṛṣayassarve sudīnataramākulāḥ //
saṃtasthire caṃḍikāgre kṛtāṃjalipuṭāstadā

evaṃ śrutvā vacasteṣāṃ prasannā caṃḍikā'bhavat //
pratyuvāca ṛṣīṃstānvai karuṇāviṣṭamānasā

devyuvāca //
matputro yadi jīveta tadā saṃharaṇaṃ nahi //
yathā hi bhavatāṃ madhye pūjyo'yaṃ ca bhaviṣyati

sarvādhyakṣo bhavedadya yūyaṃ kuruta tadyadi //
tadā śāṃtirbhavelloke nānyathā sukhamāpsyatha

// brahmovāca //
ityuktāste tadā sarve ṛṣayo yuṣmadādayaḥ //
tebhyo devebhya āgatya sarvaṃ vṛttaṃ nyavedayan

te ca sarve tathā śrutvā śaṃkarāya nyavedayan //
natvā prāṃjalayo dīnāḥ śakraprabhṛtayassurāḥ

provāceti surāñchrutvā śivaścāpi tathā punaḥ //
karttavyaṃ ca tathā sarvalokasvāsthyaṃ bhavediha

uttarasyāṃ punaryāta prathamaṃ yo milediha//
tacchiraśca samāhṛtya yojanīyaṃ kalevare //

// brahmovāca //
tatastaistatkṛtaṃ sarvaṃ śivājñāpratipālakaiḥ //
kalevaraṃ samānīya prakṣālya vidhivacca tat

pūjayitvā punaste vai gatāścodaṅmukhāstadā //
prathamaṃ militastatra hastī cāpyekadaṃtakaḥ

tacchiraśca tadā nītvā tatra te'yojayan dhruvam //
saṃyojya devatāssarvāḥ śivaṃ viṣṇuṃ vidhiṃ tadā

praṇamya vacanaṃ procurbhavaduktaṃ kṛtaṃ ca naḥ //
anaṃtaraṃ ca tatkāryaṃ bhavatādbhavaśeṣitam

brahmovāca //
tataste tu virejuśca pārṣadāśca surāḥ sukham //
atha tadvacanaṃ śrutvā śivoktaṃ paryapālayan

ūcuste ca tadā tatra brahmaviṣṇusurāstathā //
praṇamyeśaṃ śivaṃ devaṃ svaprabhuṃ guṇavarjitam

yasmāttvattejasassarve vayaṃ jātā mahātmanaḥ //
tvattejastatsamāyātu vedamaṃtrābhiyogataḥ

ityevamabhimaṃtreṇa maṃtritaṃ jalamuttamam//
smṛtvā śivaṃ sametāste cikṣipustatkalevare

tajjalasparśamātreṇa cidyuto jīvito drutam //
tadottasthau supta iva sa bālaśca śivecchayā

subhagassundarataro gajavaktrassuraktakaḥ //
prasannavadanaścātisuprabho lalitākṛtiḥ

taṃ dṛṣṭvā jīvitaṃ bālaṃ śivāputraṃ munīśvara//
sarve mumudire tatra sarvaduḥkhaṃ kṣayaṃ gatam

devyai saṃdarśayāmāsuḥ sarve harṣasamanvitāḥ //
jīvitaṃ tanayaṃ dṛṣṭvā devī hṛṣṭatarābhavat

iti śrīśivamahāpurāṇe dvitīyāyāṃ rudrasaṃhitāyāṃ caturthe kumārakhaṃḍe gaṇeśajīvanavarṇanaṃ nāma saptadaśo'dhyāyaḥ