Shiva Purana · Chapter 2.4.16

brahmovāca //
iti śrutvā maheśāno bhaktānugrahakārakaḥ //
tvadvācā yudakāmobhūttena bālena nārada

viṣṇumāhūya saṃmaṃtrya balena mahatā yutaḥ //
sāmarassammukhastasyāpyabhūddevastrilocanaḥ

devāśca yuyudhustena smṛtvā śivapadāmbujam //
mahābalā mahotsāhāśśivasaddṛṣṭilokitāḥ

yuyudhe'tha haristena mahābalaparākramaḥ//
mahādevyāyudho vīraḥ pravaṇaḥ śivarūpakaḥ

yaṣṭyā gaṇādhipassotha jaghānāmarapuṅgavān//
hariṃ ca sahasā vīraśśaktidattamahābalaḥ

sarve'maragaṇāstatra vikuṃṭhitabalā mune //
abhūvan viṣṇunā tena hatā yaṣṭyā parāṅmukhāḥ

śivopi saha sainyena yuddhaṃ kṛtvā ciraṃ mune //
vikarālaṃ ca taṃ dṛṣṭvā vismayaṃ paramaṃ gataḥ

chalenaiva ca haṃtavyo nānyathā hanyate punaḥ //
iti buddhiṃ samāsthāya sainyamadhye vyavasthitaḥ

śive dṛṣṭe tadā deve nirguṇe guṇarūpiṇi//
viṣṇau caivātha saṃgrāme āyāte sarvadevatāḥ

gaṇāścaiva maheśasya mahāharṣaṃ tadā yayuḥ//
sarve parasparaṃ prītyā militvā cakrurutsavam

atha śaktisuto vīro vīragatyā svayaṣṭitaḥ //
prathama pūjayāmāsa viṣṇuṃ sarvasukhāvaham

ahaṃ ca mohayiṣyāmi hanyatāṃ ca tvayā vibho //
chalaṃ vinā na vadhyo'yaṃ tāmasoyaṃ durāsadaḥ

iti kṛtvā matiṃ tatra susaṃmaṃtrya ca śaṃbhunā //
ājñāṃ prāpyā'bhavacchaivī viṣṇurmohaparāyaṇaḥ

śaktidvayaṃ tathā līnaṃ hariṃ dṛṣṭvā tathāvidham //
dattvā śaktibalaṃ tasmai gaṇeśāyābhavanmune

śaktidvaye'tha saṃlīne yatra viṣṇuḥ sthitassvayam //
parighaṃ kṣiptavāṃstatra gaṇeśo balavattaraḥ

kṛtvā yatnaṃ kimapyatra vaṃcayāmāsa tadgatim//
śivaṃ smṛtvā maheśānaṃ svaprabhuṃ bhaktavatsalam

ekatastanmukhaṃ dṛṣṭvā śaṃkaropyājagāma ha //
svatriśūlaṃ samādāya sukruddho yuddhakāmyayā

sa dadarśāgataṃ śaṃbhuṃ śūlahstaṃ maheśvaram //
haṃtukāmaṃ nijaṃ vīraśśivāputro mahābalaḥ

śaktyā jaghāna taṃ haste smṛtvā mātṛpadāṃbujam //
sa gaṇaśo mahāvīraśśivaśaktipravarddhitaḥ

triśūlaṃ patitaṃ hastācchivasya paramātmanaḥ //
dṛṣṭvā sadūtikastaṃ vai pinākaṃ dhanurādade

tamapyapātayadbhūmau parigheṇa gaṇeśvaraḥ //
hatāḥ paṃca tathā hastāḥ pañcabhiśśūlamādade

aho duḥkhataraṃ nūnaṃ saṃjātamadhunā mama //
bhavetpunargaṇānāṃ kiṃ bhavācārī jagāviti

etasminnaṃtare vīraḥ parigheṇa gaṇeśvaraḥ //
jaghāna sagaṇān devānśaktidattabalānvitaḥ

gatā daśadiśo devāssagaṇā. parighārdditāḥ//
na tasthussamare kepi tenādbhutaprahā riṇā

viṣṇustaṃ ca gaṇaṃ dṛṣṭvā dhanyoyamiti cābravīt//
mahābalo mahāvīro mahāśūro raṇapriyaḥ

bahavo devatāścaiva mayā dṛṣṭāstathā punaḥ //
dānavā bahavo daityā yakṣagaṃdharvarākṣasāḥ

naitena gaṇanāthena samatāṃ yāṃti kepi ca //
trailokye'pyakhile tejo rūpaśauryaguṇādibhiḥ

evaṃ saṃbruvate'muṣmai parighaṃ bhrāmayan sa ca //
cikṣepa viṣṇave tatra śaktiputro gaṇeśvaraḥ

cakraṃ gṛhītvā hariṇā smṛtvā śivapadāmbujam //
tena cakreṇa parigho drutaṃ khaṃḍīkṛtastadā

khaṃḍaṃ tu parighasyāpi haraye prākṣipadgaṇaḥ//
gṛhītvā garuḍenāpi pakṣiṇā viphalīkṛtaḥ

evaṃ vicaritaṃ kālaṃ mahāvīrāvubhāvapi //
viṣṇuścāpi gaṇaścaiva yuyudhāte parasparam

punarvīravaraśśaktisutassmṛtaśivo balī //
gṛhītvā yaṣṭimatulāṃ tayā viṣṇuṃ jaghāna ha

aviṣahya prahāraṃ taṃ sa bhūmau nipapāta ha //
drutamutthāya yuyudhe śivāputreṇa tena vai

etadaṃtaramāsādya śūlapāṇistathottare //
āgatya ca triśūlena tacchiro nirakṛṃtata

chinne śirasi tasyaiva gaṇanāthasya nārada //
gaṇasainyaṃ devasainyamabhavacca suniścalam

nāradena tvayā''gatya devyai sarvaṃ niveditam //
mānini śrūyatāṃ mānastyājyo naiva tvayādhunā

ityuktvā'ntarhitastatra nārada tvaṃ kalipriyaḥ //
avikārī sadā śaṃbhurmanogatikaro muniḥ

iti śrīśivapurāṇe dvitīyāyāṃ rudrasaṃhitāyāṃ caturthe kumārakhaṇḍe gaṇeśayuddhagaṇeśaśiraśchedana varṇanaṃ nāma ṣoḍaśo'dhyāyaḥ